Suusun 8 - LAWA A BOO SONBORE

Sii-doɛ̃ n lɛ dia we

¹ Sii-doɛ̃ n lɛ dia we, yiridɛnaabaa nə n lɛn siɛ lɔn. Ka a miɛ̃ wa?

² Kelen mɛnɛn mìi la bɛ́ yii zii gialaa, ziin bɔ kɔn-a bǎãn nɛ, yiriwoorobaa n golee-n walan.

³ A nə n lɛ dii kunu kiɛnlɛn ganaa, kiwi lɛ a wɔ ǹ bǎãn nɛ, ka kiɛ̃ ǹ bǎãn nɛ.

⁴ «Kasɛn minbuiin nɛn, man ka dinin bíi we. Man boo diɛ ka dinin tumaa nɛ.

⁵ Kasɛn mɛnɛn doɛ̃ bɛ́ a tɛ wa, ka n daraa sii giala ma ganaa. Kasɛn mɛnɛn bɛ́ yiriwɛɛnaan lɛa, ka ga sii-doɛ̃ li.

⁶ Ka n too kɔ sɔnbɔraanɛ, man die boo wenaa diɛ ka nɛ, man die diɛ ka a fubaa nɛ.

⁷ Taãn nɛ, man sonbore pii. A giala, soɛ boon tumaa tìĩ n boe-n ma nɛ.

⁸ Ma bɛ́ boo mɛn tumaa diɛ, maǹ ka te. Ma a minin sã ǹ boon diɛ wa, ma a soɛ boe wa.

⁹ Min mɛn yiri bɛ́ á tan, bɛ n giɛ maa boon kɛn ganaa boo peperen lɛa. Min mɛn bɛ́ sii-dɔ̃li lɛa, bɛ nə ǹ kuĩ ka a parsiini.

¹⁰ Ka maa daraan kɛn narɛ a la wɔrɔ nɛ, ka doɛ̃ tamaa a la sana nɛ.

¹¹ Taãn nɛ, masɛ sii-doɛ̃, barka tá ma nɛ á la nyaǹ mànan manɛ, ma giɔ̀mɔ á kaka á la foo sii màn tumaa nɛ.»

Sii-doɛ̃ nə n din nyɛɛ

¹² Masɛ sii-doɛ̃, ma ba n niɛ̃ taasiɛ sonbore ganaa wa. Man taasiɛ we ma tɔn sii zɛnaa.

¹³ Sii baraa tìĩ a bɔ ma nyin ni, n nyɛɛbaa Dɛnaa Lawa yii-n lɛa. Din koa nɛ, bɔlɔ baraa nɛ, sii bɔbɔnɛɛ laanka soɛ nɛ, bɛn tìĩ n boe-n ma nɛ.

¹⁴ Doroo laanka gɔn waa n masɛ wɔ lɛa. Ma din ni sii-doɛ̃ lɛa, pàã n ma din lon.

¹⁵ Ma din barka nɛ, kiin man kiibaa zɛnɛɛ, kiri-kurulin man kiri pepere we.

¹⁶ Ma din barka nɛ, kiãn laanka min golen man nyɛɛnaan boe, kɔnlɛ ka min mɛn tumaa bɛ́ kiri kuri.

¹⁷ Min mɛnɛn bɛ́ ma narɛɛ, ma dɔ n bɛn narɛ. Min mɛnɛn bɛ́ giɛ ma li, ǹ ba foɛ̃ ma li wa.

¹⁸ Ma din ni naforo koe, ka gugurubaa nɛ. Gɔn màn mɛn bɛ́ beleboe, ma din nə bɛ dɔ koe.

¹⁹ Là tá maa bǐɛ̃ ganaa á la sana yoreen ne. Maa man-gɔ dɔ á soɛ wɔrɔ gɛlɛ taãn-taãn kɛ nɛ.

²⁰ Man tɔ we peperebaa zii la. Zii mɛn bɛ́ ǹ nə́ dí-pɛn tamaɛ la, maa wɔ n ka bɛ nɛ.

²¹ Min mɛnɛn bɛ́ ma narɛ, man bǐɛ̃ biɛ bɛn la, ma ǹ kion pã ka gɔn màn giɔ̀mɔ kakaan nɛ.

²² Dɛnaa Lawa na á ma zɛnaa bibinaa nɛ á tɔ́n màn gialakun kɔsɔn kɛn zɛnaa.

²³ A na á ma din zɛnaa lɛlɛ lɛlɛ, màn tumaa a giala kɔ waáraa, bɛ̀ tán tɔn nə n zɛnaa wa.

²⁴ Ma bɛ́ yii, bɛ̀ yisi mu banban wa, bɛ̀ mu yala banban wa.

²⁵ Kelen laan bɛ̀ ǹ nə n zɛnɛɛ, tentenen laan bɛ̀ man yii, bɛ̀ masɛ yɛ.

²⁶ Bɛa biikoo lɛ li, bɛ̀ Dɛnaa Lawa tɔn tán laanka wurun zɛnaa wa, bɛ̀ a tɔn tán-a gusuũ nàn bibinaa zɛnaa wa.

²⁷ A bɛ́ lon zɛnɛɛ ǹ mɛn waáraa, bɛ̀ ma tan. A bɛ́ yìsi mu lɛ dan boe ǹ mɛn waáraa, bɛ̀ ma tan.

²⁸ A bɛ́ labaran koɛ lon ǹ mɛn waáraa, bɛ̀ ma tan. A bɛ́ pàã koe tán a mu yalan la ǹ mɛn waáraa, bɛ̀ ma tan.

²⁹ A bɛ́ lɛ dan koɛ yìsi mu la ǹ mɛn waáraa, a bɛ́ n gɔn wɛɛ yìsi mu ni mà a baran bɛ la bɔ wa, a bɛ́ tán goã daɛ ǹ mɛn waáraa, bɛ̀ ma tan.

³⁰ Man má goã a li, má n dí nyɛɛ kun ni. Man má goã kɔɔ̃n a ganaa baraabaraa, ma nə n nyɛnyɛɛ biikoo tumaa li a yɔrɔ-a.

³¹ Ma nə n nyɛnyɛɛ a din a kanaa kɛ dɔ gɔ́ɔ̃ nɛ. A n kɔɔ̃n ma ganaa ma goã minbuiinin bii.

Min mɛn bɛ́ n too koe sii-doɛ̃ lon, gɛ̀rɛsiɛdɛnaa nɛ

³² Kanna kəni maa nɛnyaanan lɛn, ka n too kɔ ma lon. Ma bɛ́ boo mɛn diɛ, min mɛnɛn bɛ́ n too koe bɛ li, bɛn foo á re kɔɔ̃n koe.

³³ Ka n too kɔ maa gɔn waa ǹ boon li, ń giɛ ka á sii-dɔ̃lin biɛ. Ka nyan nə n piã ǹ nɛ wa.

³⁴ Min mɛnɛn bɛ́ n too koe ma lon, bɛn wɔ á re bǐɛ̃ koe. Maǹ lɛ̀ wɛɛ maa kiɛnlɛ-a baraa nɛ. Maǹ maa kion a wɔ ǹ kiɛnlɛ lɛduĩ.

³⁵ Taãn nɛ, bɛ̀ min mɛn ma yɛ, a na á yiikoonaabaa yɛ. A sii n kɔɔ̃n koe Dɛnaa Lawa ganaa.

³⁶ Sɛnɛ, bɛ̀ min mɛn ma dɔ̃ wa, a n busu lɛa ǹ Dɛnaa ganaa. Ma tìĩ bɛ́ boe-n min mɛnɛn tumaa nɛ, bɛn man gɛ̀ narɛ.