Suusun 7 - LAWA A BOO SONBORE

Lɔ naarɛɛbaali n kan lɛa

¹ Maa nɛ, n yiri koa maa boon kɛn li, n maa doroon kɛn tamaa parsiini.

² Bɛ̀ n tá li n yii goã koo, maa dí-pɛn kɛn tamaa, ka maa daraan kɛn nɛ ka gɔn màn giɔ̀mɔ kaka bɛ́ lɔn.

³ N gɔn paraa ǹ ganaa, n nə ǹ tamaa n foo ne.

⁴ Ga sii-doɛ̃ ganaa ka n miãnɛn bɛ́ lɔn, n ga yiridɛnaabaa ganaa n giaára lɛa.

⁵ Ǹ tá n kanbiɛ lɔ kɔrɔ ganaa, lɔ mɛn bɛ́ n ba doɛ̃ wa, a lɛ gɔ́ɔ̃ ǹ boo n paparɛ.

Lɔ kɔrɔ a minin kũ ǹ boo

⁶ Ǹ kɔn pinaa, man golee ne maa kion a fenɛtərə lɛa, má n yii kɔ a mɔnaa koo ne.

⁷ Ma nɛ tenən yɛ, goon nə ǹ bii yiriwɛɛnaa lɛa.

⁸ Á kiɛ̃ á pii zii saa kunu lɔ kɔrɔ goon a kion ganaa, á woo kion lɛ-a sɔnsɔn.

⁹ Wasamiɛ̃n nɛ, wɔlɔ tì li, wɔlɔ nyín giɛ̃-a.

¹⁰ Lɔ lɛ daa n da lɛ. A wɔ ǹ mɔnaan man ka lɔ kɔrɔ wɔn bɛ́ lɔn, minin sã wole lɛa.

¹¹ Bɛa lɔ lɛ yii n kaka, sìi goon din ba-a wa. A boe la á giɛ̃ kion wa.

¹² A n we dɔndɔɔnən nɛ, zaman bǎãn nɛ, n yii diɛ minin la biikoo tumaa li.

¹³ Á tɔntɔraa lɛ kũ, á n sɔɔ a nɛ, á pɛ nɛ ka foo tãbaa nɛ:

¹⁴ «Ma bɛ́ má n lɛ kɔ Lawa la ka wúlu mànan mɛnɛn nɛ, má bɛn bɔ pelo. Bɛa siĩ tá ma li kion.

¹⁵ Bɛ lɛ nɛ, má soo ma á n diɛ n lɛ. Man giɛ n li, á ke má n yɛ.

¹⁶ Má maa waa ǹ piì yɔrɔ bɔ, má Ezipti mɔnaa sonboren naa la.

¹⁷ Má *miíri nyɔɔ gìĩ kɔɔ̃n pɛsɛ̃ la.

¹⁸ Daa wɔ n tan, wɔ n dinin foo kɔɔ̃n kɔ, yǎa biɛ̃ baayɛlɛ. Wɔ á re foo kɔɔ̃baa yii kun.

¹⁹ Ma zuũ a piɛ wa. Á woo zii sɔsɔɔ nɛ.

²⁰ Á woo ka wɔrɔ gigiã nɛ, a ba n bɔyɛɛ a daa bɛ̀ mui a lɛ̀ waa kanaa waáraa bie wa.»

²¹ Á bɛa yiri sã ǹ boon lɛn da á nɛginin lɛ gù dɛ nɛ, á kũ á kiɛ̃ nɛ ka bɛa boo paparan lɛn nɛ.

²² Á bɔ á mɛ lɔ lɛ kio kəni ka dii bɛ́ woe a dɛ ǹ bǎã-n lɔn. Ka kòso nɛ bɛ́ lɔn, giĩ yiriwɛɛnaa lɛ n woe a dɔlɔ bɔ ǹ bǎã ganaa,

²³ yǎa bɛ̀ gɔn dɔ a ganaa ǹ mɛn waáraa, a n gɛ̀ bɔlɔ pii. A n ka bàan nə́ ke n nanaɛ̃ lɔn woe n doe zɔ̀ɔ nɛ, a ná a ba doɛ̃ mà nyin nya ǹ bǎã-n wa.

²⁴ Kanna kəni, maa nɛ, ma bɛ́ boon mɛnɛn pii n ni, n too kɔ ma lon,

²⁵ n nyan toa lɔ kɛ miã nə n foo si wa. N nyan nə n saa li wa.

²⁶ A giala, a basaã kɔ min mɛnɛn manɛ, ǹ tá gigiã. A gɔn dɔ min kakan dinin ganaa.

²⁷ Bɛ̀ n woo a li, ma nə́ n woo gɛ̀ li, ma nə́ n woo geren piɛ.