Suusun 4 - LAWA A BOO SONBORE

Sii-doɛ̃ n sii sonbore lɛa

¹ Nɛnyaanan, ka n too kɔ díi a doroo li. Ka yiri bɔ ka dinin li, ka á re yiridɛnan biɛ.

² Sonbore, man doroo sonboren koe ka la. Ka nyan nə n piã ka maa daraan nɛ wa.

³ Masɛ dɔ nɛ sonbore baa maa díi gɔn. Maa náa ma narɛ parsiini nɛ goondɛnaabaa wɔ nɛ.

⁴ Maa díi na á goã ma doree á n pii ma nɛ: «N yiri koa maa boon kɛn li parsiini, n yii tá re goɛ̃ koo.

⁵ Toa n sii-dɔ̃li baa, n yiridɛnaa baa. Ń yiri nyan bɔ ka maa boon kɛn nɛ wa, n nyan nə n wɔlɔ lui ǹ ganaa wa.

⁶ N nyan nə n wɔlɔ lui sii-doɛ̃ ganaa wa, á re n lɛduĩ. A narɛ, á re n tamɛɛ.

⁷ Sii-doɛ̃ lɛ a giala kɔ n ka kɛ nɛ: Sii tumaa zɛnaa n sii-doɛ̃ yɛ. N gɔn màn tumaa wɔ yiridɛnaabaa nɛ.

⁸ Sii-doɛ̃ saa n kolo-n, á re n siɛ lon. Bɛ̀ ń nə́ n sɔɔ a nɛ, á re gugurubaa koe n la.

⁹ A n die goɛ̃ ka nyaǹ màn bɛ́ lɔn, ka kii bafolo siĩn bɛ́ lɔn.»

Sii-doɛ̃ n yiikoobaa lɛa

¹⁰ Maa nɛ, n too kɔ ma lon. Maa boo kɛn si, n tá re nyin sasa yii.

¹¹ Ma nə n diɛ sii-doɛ̃ zii la, n yiikoonaabaa goã peperabaa gɔ́ɔ̃ nɛ.

¹² Ka bɛ dɔ nɛ, n wo nyɛɛ-n tá re naanaa koe. Bɛ̀ n tá baasi, n ba re talɛɛ wa.

¹³ N doroo mɛn yɛ, kũ sɔnbɔraanɛ, n nyan nə n la a ganaa wa. A kũ doɛ̃, a nə yii toɛ koo.

¹⁴ N nyan min bɔnɛɛn giã ǹ gɔn lɛn zɔɔ̃ wa. N nyan kɔ sii baraa-zɛnaalin zii lɛ wa.

¹⁵ N nyɛnaa nɛ, n nyan bɔ a nɛ wa! Zii da nɛ, n wo sɔsɔɔ.

¹⁶ Bɛa minin kɛn lɛn ba nyuù we bɛ̀ ǹ nə́ ǹ sii baraa zɛnaa wa. Ǹ ba nyuù naɛ̃ ǹ yii-a bɛ̀ ǹ sii baraa zɛnaa min ni wa.

¹⁷ Hiĩ! Maǹ nə n dinin toe ka sii baraa kɛ nɛ ǹ tá zɛnɛɛ. Kakaarɛbaa la ǹ yii ni.

¹⁸ Sɛnɛ, min mɛnɛn bɛ́ sii bǐɛ̃ zɛnɛɛ, bɛn yiikoonaabaa n ka baayɛlɛ a wɔlɔ fúlu bɛ́ lɔn, màn nə miɛ a fulu li yǎa penleen-n koe.

¹⁹ Sɛnɛ, min mɛnɛn bɛ́ sii baraa zɛnɛɛ, bɛn wɔ n wɔlɔ tì lɛa ka tèlò bɛ́ lɔn. Màn mɛn bɛ́ re ǹ boe a ǹ daa, ǹ yii ba bɛ-a wa.

Giã ǹ gɔn sonbore

²⁰ Maa nɛ, n too kɔ maa boon li. N yiri kɔ maa doroon li.

²¹ N nyan toa n yiri bɔ ǹ nɛ duduu wa. Toa ǹ goã n foo ne.

²² Min mɛnɛn tumaa bɛ́ maa boon sii, a n yiikoonaabaa koe ǹ la ka kakabaa nɛ.

²³ Bɛ tumaa a kiɛ̃ kio, boo n foo la a giala yiikoonaabaa a bɔ ǹ bǎã nɛ.

²⁴ Ń lɛ kurəə soɛ bɔ ganaa, n nyan nə n miãn pɔpɔsɛ wa.

²⁵ Ń yiin doa n yɔrɔ-a sɔnsɔn, n ga n nyɛɛnɛ pepere.

²⁶ Ń bɛ́ re koe zii mɛn lɛ, ń taasɛ n tɔn saa. Foo bɛ́ doa-n ziin mɛnɛn ganaa, kɔ bɛn lɛ.

²⁷ N nyan wo n gusin hinlaa n gɔsɛ wa. N wɔlɔ lui sii baraa ganaa.