Suusun 26 - LAWA A BOO SONBORE

Baãnaan sii

¹ Nyan ba woe kun ka tɛ̀fuu n wa. Min kɔn ba giɛ la li kaa-piɛ waáraa wa. A din yii goon ne, baãnaa kɔnbɔ ka guguubaa-n wa.

² Leere bàan bɛ́ kiɛ̃ lon lɔn, bàan bɛ́ yui tán lɔn, liɛ mali mɛn bɛ́ mìi ba la wa, bɛa min kuĩ wa.

³ Sɛ̌n nə sùi wɔ lɛa, lɛ ganaa ǹ biɛ n dundun wɔ lɛa, bàlà n baãnaa wɔ lɛa.

⁴ N nyan nə n saa baãnaa a gaãnaabaa li n na a lɛ si wa. Bɛ bie wa, n dɔ n die a kɔnboe biɛ.

⁵ Baãnaa lɛ si a kɔnpɛ a baãnaabaa nɛ. Bɛ bie wa, a n taasɛ mà asɛ n sii-dɔ̃li lɛa.

⁶ Min mɛn bɛ́ baãnaa biɛ a dia dí-a wole lɛa, a goon ka min mɛn nə́ ke a din gòãn kuri. A n giɛ sii li koe a din la.

⁷ Baãnaa lɛ gɔ́ɔ̃ ǹ suusu puusə ka bɔlɔka gòãn bɛ́ lɔn.

⁸ Bɛ̀ n baãnaa kalaa, a n goon ka ma nə n gii yii baragii ganaa.

⁹ Baãnaa lɛ gɔ́ɔ̃ ǹ suusu n ka kiɛ bɛ́ lɔn yɔ a kuĩ wole gɔn.

¹⁰ Min mɛn bɛ́ baãnaa hinlaa kiɛ̃ wole siɛ dí ni, a n ka sa-zũli bɛ́ lɔn kiɛ zuĩ min tumaa nɛ.

¹¹ Gin bɛ́ wusii woe a pisii ganaa lɔn, baãnaa dɔ n wusii woe a sãn ganaa miɛ̃.

¹² Bɛ̀ min tá n din biɛ yiridɛnaa lɛa, a dɔ̃ mà baãnaa á soɛ bɛa dɛnaa nɛ.

Yoonaa a giã ǹ gɔn

¹³ Yoonaa n pii: «Gòon màn tá zii mìi ni! Yàra tá zii la!»

¹⁴ Kiɛnlɛ-a ǹ goo bɛ́ n bɔyɛɛ goaran la lɔn, yoonaa nə n bɔyɛɛ a piì la miɛ̃.

¹⁵ Yoonaa nə n gɔn we kunun n ni, sɛnɛ a wo ne a lɛ-a kɛ n nɔmaa lɛa a ganaa.

¹⁶ Yoonaa n taasɛ mà asɛ a sii-doɛ̃ la yiridɛnaa sɔbaa wɔ nɛ.

Suusu kɔsɔn

¹⁷ Kiɛ̃ wole mɛn bɛ́ ń lɛ we zia nɛ, a na á kɔnbɔ ka min mɛn bɛ́ zoɛ̃ li mà a gin kũ a toon ganaa.

^18-19 Min mɛn bɛ́ ǹ miãn siɛ̃, á n wusii pii mà asɛ n sàn koe, bɛ na á kɔnbɔ ka gaãnaa nɛ tɛngɔnlɛ zuĩ n lɛnpɛnɛ nɛ, ka kiɛn nɛ, ǹ mɛnɛn bɛ́ gɛ̀ dii.

²⁰ Bɛ̀ gɔn banban, tɛ n nimi. Bɛ̀ tenten banban, zia n nyɛɛ.

²¹ Nyɔɔ bɛ́ tɛ nàn biɛ lɔn, gɔn bɛ́ toɛ tɛ á kuĩ lɔn, zia-dali n tɛ zoɛ̃ zia ganaa miɛ̃.

²² Tenten a boo n ka màn-bii kɔɔ̃n bɛ́ lɔn. Bɛ̀ n tá n too koe a ganaa a n gisĩ yǎa n gɔ́ɔ̃ nɛ.

²³ Lɛ gɔ́ɔ̃ ǹ boo paparɛ laanka gɔ́ɔ̃ tì, bɛ n goon ka wɔrɔ gɔgɔrɛ nɛ, ǹ nə́ kaa tàan la.

²⁴ Min mɛn bɛ́ ǹ miãn tìĩ n boe n ne, a nə n duri a da ǹ boon kio, a n sii baraa taasɛ a gɔ́ɔ̃ nɛ.

²⁵ Ta á boo kɔɔ̃n da lɔn, n nyan nə n foo doa a ganaa wa. A giala, a gɔ́ɔ̃ piɛ̃maa-n ka taasiɛ baraan nɛ.

²⁶ Foo-yoo duru ǹ yiri tá a lon, sɛnɛ min tumaa á re a baraabaa kɛ doɛ̃.

²⁷ Min mɛn bɛ́ yala foɛ̃, a din nə die n doe a nɛ. Min mɛn bɛ́ kɔlɔ birikəĩ, kɔlɔ á re n birikəĩ la.

²⁸ Soɛ-bɔle bɛ́ soɛ diɛ min mɛn la, n dɛnaa lɔɔ n boe n ne. Min mɛn bɛ́ minin kalɛɛ, a nə ǹ boe ǹ kiɛ.