Suusun 22 - LAWA A BOO SONBORE

¹ Tɔ kɔɔ̃n tá soɛ naforo gole ne. N sii a kɔɔ̃n kɔ n miãn ganaa tá soɛ sana laanka wɔrɔ nɛ.

² Sii goon nə pàãma laanka doobaa biɛ goon: Dɛnaa Lawa na á ǹ dinin paãnan zɛnaa.

³ Bɛ̀ koe á die, yiridɛnaa nə n mìi duri. Yiriwɛɛnaa sɛ na a zii tɔ we yǎa sii yii.

⁴ Min mɛn bɛ́ n din boɛɛn koe, a n Dɛnaa Lawa guguru koe, á re naforo yii, a tɔ bɔ, a nyin sasa yɛ.

⁵ Nyan laanka kanan man min kɔkɔrɔ a zii sii ǹ nə n kɔ lɛ. Min mɛn bɛ́ zoɛ̃ nyin sasa li, a nə n wɔlɔ lui a ganaa.

⁶ Sɔ̀n sonbore wɔ nɛnyaan nɛ a yoo tán waáraa. Ta á zizi kɔ, a ba n niɛ̃ a ganaa wa.

⁷ Pàãma pàã la doobaa wɔ nɛ. Giɔ̀mɔdɛnaa n giɔ̀mɔ-dali lɛ a kòso nɛ lɛa.

⁸ Min mɛn bɛ́ mɛnɛɛ minin la, koe á re yii. A kakaarɛbaa á re nyɛɛ.

⁹ Min mɛnɛn bɛ́ bǐɛ̃ biɛ, barka nə ǹ ganaa, a giala maǹ doobaa toe.

¹⁰ Yaa-wɔli loo, zia á re nyɛɛ. Zia laanka sɔ-kɔ a re yii doo wa!

¹¹ Min mɛn bɛ́ min pepere narɛ, boo sonbore n soe a lɛ-n, bɛ n kii á giaára lɛa.

¹² Dɛnaa Lawa n doɛ̃ sonbore tamɛɛ. Sɛnɛ, a n soɛ-bɔlin boon ziziɛ̃.

¹³ Yoonaa n pii: «Yàra á kanaa zii mìi ni, a n die ma kuĩ.»

¹⁴ Lɔ naarɛbaali lɛ n nyankɔrɔ zuzulu lɛa. Dɛnaa Lawa bɛ́ re dɔlɔ boe min mɛnɛn ganaa, bɛn manə n doe a nɛ.

¹⁵ Gaãnaabaa ǹ sii zɛnaa n kɔɔ̃n nɛ tenən ganaa. Sɛnɛ, ǹ doroo ǹ bàlà n die toɛ ǹ nə n wɔlɔ lui a ganaa.

¹⁶ Bɛ̀ min mɛnaa doobaa la, a n biɛ pàãma lɛa. Min mɛn bɛ́ bǐɛ̃ biɛ pàãma la, a n biɛ doobaa lɛa.

Doroo totoro

¹⁷ Ń too da, n nə n too kɔ min golen boon li. Kɔ maa daraan kɛn lɛ ka n foo tumaa nɛ.

¹⁸ Bɛ̀ ń nə ǹ tamaa n foo ne, ń nə́ ǹ pii n lɛ-a baraa nɛ, ǹ tá re n foo kɔɔ̃n koe.

¹⁹ Man zoɛ̃ li máa n nə n foo doa Dɛnaa Lawa ganaa. Bɛ lɛ nɛ, pelo ma á n darɛɛ boon kɛn ganaa.

²⁰ Á ke, má doroo laanka doɛ̃ pɔsɔɔ kiɛ̃ sɛ́wɔ la n wɔ lɛa,

²¹ màn mɛn bɛ́ toɛ n boo pepere da ǹ gɔn yɛ, a n ka te. Min mɛn bɛ́ n diɛ dí ganaa, n tá re dia dí-a wole sonbore biɛ a gɔn.

²² N nyan doobaa koã a giala mà doobaa n wa. N nyan mɛnaa nɔmaa-wɔle la kiri wɔ ǹ bǎã-n wa.

²³ Taãn nɛ, Dɛnaa Lawa nə ǹ zia gii-dali lɛa, min mɛnɛn bɛ́ mɛnɛɛ ǹ la, Dɛnaa Lawan bɛn nyin boe.

²⁴ N nyan foo goledɛnaa baa n giaára lɛa wa, min mɛn foo bɛ́ a golee yoo-n wa, n nyan koa kun ni wa.

²⁵ Bɛ bie wa, n tá re n siɛ li n na a lɛn zɔɔ̃, kan tɔn nə n kũ.

²⁶ N nyan min gɔn dɛ, n nə n din baa n miãn giɔ̀mɔ á siére lɛa wa.

²⁷ Bɛ̀ a boo a saraa la wa, ń bɛ́ waa nɛ piì mɛn la, ǹ tá re boe n giulun.

²⁸ Ń digolon nə kɔlɔ mɛn da tán gèlè la wurun, ń nyan zɔ̃ wa.

²⁹ Min mɛn bɛ́ dí nyɛɛ sɔnbɔraanɛ, ga bɛa dɛnaa ganaa. Á boe la a wo n din nyaa kii ni, bɛ á soɛ a giã minin bii, ǹ nə́ ǹ ba ǹ mɛnɛn doɛ̃ wa.