Suusun 2 - LAWA A BOO SONBORE

Sii-doɛ̃ n min kanbiɛ

¹ Maa nɛ, ma bɔlɔ si, n maa dí-pɛn tamaa.

² N too kɔ sii-doɛ̃ boon kɛn ganaa, n toa n nə ǹ giala ma.

³ Yiridɛnaabaa nyankɔ a n dɔ n lɛ, n sonbore bíi wɔ n gu ganaa.

⁴ Baa si sii-doɛ̃ kio, ka ǹ bɛ́ baa sii wɔrɔ kio lɔn. Ga li n parsiini, ka ǹ bɛ́ giɛ naforo li lɔn.

⁵ Bɛ̀ n bɛ tumaa zɛnaa, n tá re nyɛɛbaa Lawa-n giala miɛ, n tá re Lawa doɛ̃.

⁶ Hiĩ, Dɛnaa Lawa din nə sii-doɛ̃ koe. Sii-doɛ̃ laanka yiri n boe a din li.

⁷ A nə n doe min peperen lɛ. Min mɛnɛn giã ǹ gɔn bɛ́ pepere, a nə n koe ǹ siã, a ǹ tamaa ka goóro bɛ́ lɔn.

⁸ Min mɛnɛn bɛ́ koe a dí-pɛn lɛ, a n bɛn tamɛɛ. Min mɛnɛn bɛ́ bɔlɔgoondɛnan lɛa, a n bɛn zii lɛduĩ.

⁹ Bɛ̀ n ma bɔlɔ si, n tá re sonborebaa doɛ̃, bɔlɔgoondɛnaabaa nɛ, ka peperebaa nɛ: Là nyantoro zii ni.

¹⁰ Sii-doɛ̃ á re we n foo ne, n doɛ̃ a kɔɔ̃baa yɛ.

¹¹ Sii bɔkɔnlɛ á re n tamaɛ̃, yirikɔɔ̃baa nə n lɛduə̃.

¹² Ǹ tá re n kanbiɛ giã ǹ gɔn baraa ganaa. Min mɛnɛn bɛ́ soɛ boon diɛ, ǹ tá re n wɔlɔ lui bɛn ganaa.

¹³ Ǹ mɛnɛn bɛ́ zii pepere toɛ walan ǹ nə́ tɔ we wɔlɔ tì li, ǹ tá re n kanbiɛ bɛn ganaa.

¹⁴ Sii baraa zɛnaa n kɔɔ̃n bɛa minin lɛn ganaa, gɛ̀ dɛ n nyɛnyɛɛ lɛa ǹ ganaa.

¹⁵ Ǹ ba pepere wa, ǹ giã ǹ gɔn nə kɔkɔrɔ.

¹⁶ Ka bɛ nɛ, n tá re n din sii min kɔsɔ a lɔ la, ka tɔrɔ kɔsɔ lɔ nɛ a boo n paparɛ.

¹⁷ A tenmaa waáraa san ke, á bɛ toa walan, a yiri bɔ a Lawa a lɛ kɔ kɔn la kɛ nɛ.

¹⁸ Hiĩ, a giã ǹ gɔn nə die ka a papaã nɛ, a zɛnaa ǹ sii woe-n geren piɛ.

¹⁹ Min mɛn tumaa bɛ́ woe a li, ǹ ba n bɔyɛɛ duduu wa, ǹ ba yiikoonaabaa ǹ zii yii doo wa.

²⁰ Min sonboren zii saa. Min mɛnɛn sii zɛnaa bɛ́ siĩni, n bɛn lɛn zɔɔ̃.

²¹ Taãn nɛ, min mɛnɛn bɛ́ pepere, bɛ́n tá re giɛ̃ gána kɛ nɛ. Min mɛnɛn giã ǹ gɔn bɛ́ siĩni, á re bɛ́n wɔ biɛ.

²² Sɛnɛ, min bɔnɛɛn kɛn bɛn tá re woe, min mɛnɛn bɛ́ ǹ ba pepere wa ǹ tá re bɛn lui, ǹ nə ǹ bɔ gána lɛ nɛ.