Suusun 18 - LAWA A BOO SONBORE

¹ Min mɛn bɛ́ giɛ̃ tìãlɛa ǹ miãn ganaa, a n giɛ a dinsɔɔ̃ a bǐɛ̃ kɔ li. A nə n piɛ̃ ka yiri kɔmala nɛ.

² Màn mɛn bɛ́ kɔɔ̃n baãnaa ganaa, sii giala ma bie wa, sɛnɛ a din a taasiɛ pɛsiɛ̃ nɛ.

³ Baraabaa n min tìĩ boe. Sɔ kɔ n die ka sìi ni.

⁴ Minbuiinin boo n zuzulu ka yìsi mu bɛ́ lɔn; Sii-doɛ̃ n ka mu yala bɛ́ lɔn á pã á pisi.

⁵ Sonbore kɔ min baraa la a siĩn wa. Mɛnaa min pepere la kiri wɔ ǹ bǎã nɛ, bɛ dɔ n sii bɔnɛɛ lɛa.

⁶ Baãnaa a boon man zia yiɛ. A bɛ́ boo mɛn diɛ, bɛ n die ka mandɛ nɛ.

⁷ Baãnaa a boon man a din papaɛ̃. A lɛ n kan lɛa a dinmaa ganaa.

⁸ Lɛ-fuubaali a boon lɛn man kɔɔ̃n ka màn paparɛ bɛ́ lɔn. Maǹ lɛ koe ǹ ganaa fufuu.

⁹ Min mɛn bɛ́ a ba n tele dí li wa, ka min mɛn bɛ́ ziziɛ̃, maǹ nə́ bɔ kɔn li ka dɔɔ̃nɔn bɛ́ lɔn.

¹⁰ Dɛnaa Lawa n duru ǹ bǎã kaka lɛa. Min peperen man woe a li, ǹ kirisibaa.

¹¹ Pàãma foo n doa nɛ a naforo ganaa. A n tamɛɛ ka kungɔn sasa bɛ́ lɔn a lɛnpɛnɛ

¹² Din gole kɔ n die ka papaã nɛ. Bɛ̀ n tá zoɛ̃ gugurubaa li, yǎa n nə n din boɛɛn koe bɔrɔ.

¹³ Min mɛn bɛ́ boo lɛ sii a tɔn nə n too kɔ, gàãnaa nɛ. A wɔ n ka sìi ni.

¹⁴ Foo tãbaa nə n doe busulə lɛ. Sɛnɛ, bɛ̀ a foo ziziɛ̃, die n siɛ a da lon?

¹⁵ Min yiridɛnaa n giɛ doɛ̃ li, sii-dɔ̃li too n zoɛ̃ li.

¹⁶ Min a bǐɛ̃baa n toɛ a sii yɔrɔ yɛ, a wo yǎa min dadaran li.

¹⁷ Min mɛn bɛ́ boo diɛ bibinaa nɛ kiri wɔ ǹ bǎã nɛ, a n ka sonbore n bɛ lon. Sɛnɛ, bɛ̀ ǹ miã kɔsɔ kɛ daa boo saa, bɛ n woɛ̃ a zumu.

¹⁸ Maǹ nə n piɛ̃ bɛ̀ ǹ zia nya pàãdɛnan bii ni.

¹⁹ Dɔɔ̃n mɛn bɛ́ ń sii la la, a dɔmali á kaka á la kiwi mɛn bɛ́ ǹ nə́ kungɔn pɛnɛ a ganaa. Zia dɔ n foo soɛ, ka goo nɛ á ke kiɛnlɛ soɛ lɔn.

²⁰ Didie á boe la a màn bii a boon paã ganaa. A bɛ́ boo mɛn diɛ, bɛ lɛ nə n doe lɛ a yii goã koo.

²¹ Gɛ̀ laanka yiikoonaabaa n boe da ǹ boo li. Min mɛn bɛ́ boo narɛ, a doamaa nɛ a lɛ kɔ a mìi gɔ́ɔ̃ nɛ ǹ siin ganaa.

²² Bɛ̀ min mɛn lɔ yɛ, a na á là nyantoro yɛ. Dɛnaa Lawa na á bǐɛ̃ baa nɛ.

²³ Doobaan man boo diɛ ka din boɛɛn kɔ nɛ, sɛnɛ, pàãman manə ǹ lɛ sii ka boo kaka nɛ.

²⁴ Giaára gigiã á boe la ǹ bɔ̀n da min ganaa. Sɛnɛ, giaára sonbore la dɔɔ̃n nɛ.