Suusun 15 - LAWA A BOO SONBORE

¹ Lɛ si ka bɔlɔ kɔɔ̃n nɛ n foo wɛɛ. Sɛnɛ, boo baraa n foo diɛ yoo ganaa.

² Bɛ̀ sii-dɔ̃li á boo diɛ, daraa sii nə n kuĩ. Sɛnɛ, bɛ̀ yiriwɛɛnaa nə n lɛ bũ, boo kooron manɛ á diɛ.

³ Dɛnaa Lawa yii n bǎã tumaa nɛ, a yii n min baraan ganaa ka min sonboren ne.

⁴ Foo taã ǹ boo n ka yiikoonaabaa da bɛ́ lɔn. Sɛnɛ, boo baraa n foo ziziɛ̃.

⁵ Nɛnyaan yiriwɛɛnaa laadoo bie ka ǹ di a doroo-n wa. Sɛnɛ ǹ mɛn bɛ́ n too koe a gɔn waa ǹ boo li, bɛ n sii-dɔ̃li lɛa.

⁶ Sii sonbore-zɛnaali a kion nə piɛ̃ ka naforo ne, sɛnɛ, min baraa a naforo n die ka koe ne.

⁷ Sii-dɔ̃li lɛ n doɛ̃ pɛsɛ̃ sɛnɛ, yiriwɛɛnaa foo n màn tɔrɔ kɔsɔ lɛa.

⁸ Min baraan *wúlu màn ba kɔɔ̃n Dɛnaa Lawa ganaa wa. Sɛnɛ, min peperen Lawa nyankɔ n kiɛ foo la.

⁹ Min baraan giã ǹ gɔn ba Lawa foo sii wa, sɛnɛ, min mɛn bɛ́ zoɛ̃ bǐɛ̃ zɛnaa li, bɛ n kɔɔ̃n Dɛnaa Lawa ganaa.

¹⁰ Min mɛn bɛ́ zii sonbore toɛ walan, bɛ wɔ n ka dɔlɔ baraa nɛ. Min mɛn bɛ n piɛ̃ ka gɔn waa ma-n nɛ, bɛ á re giɛ̃.

¹¹ Dɛnaa Lawa n geren piɛ a zuzulubaa doɛ̃. Á muibuiin nɛ foo doɛ̃ á la bɛ nɛ.

¹² Din koa wole a lɛ koe gɔn waa ma-n ganaa wa. A ba n mɔrɛ sii-dɔ̃li ganaa wa.

¹³ Foo kɔɔ̃n nə yɔrɔ kiɛ, sɛnɛ, foo ziziɛ̃ n yiri lɔlɛkɔn.

¹⁴ Min mɛn bɛ́ taasiɛ we, a n giɛ doɛ̃ li. Sɛnɛ, baãnaa nə n din toe ka sii kooron ne.

¹⁵ Doobaa a lɛawaa tumaa n baraa. Sɛnɛ, Lawa barka da min mɛn ganaa, lɛawaa tumaa n zɔ́n lɛa bɛ gɔn.

¹⁶ Màn boɛɛn yɛ n nə́ Lawa guguru kɔ gɔ́ɔ̃ nɛ, bɛ á soɛ pàãmabaa nɛ taasiɛ gɔ́ɔ̃ nɛ.

¹⁷ Liɛ sɔ̃ kɔn-narɛɛ gɔ́ɔ̃ nɛ á soɛ siĩ nyɔɔnaa soɛ̃ nɛ zɔ́ɔbaa gɔ́ɔ̃ nɛ.

¹⁸ Foodɛnaa n zia yui. Sɛnɛ, sabara-baali n zia nyɛɛ.

¹⁹ Yoo-baali a zii n ka nyan da tewon bɛ́ lɔn. Min pepere a zii n pəmə.

²⁰ Nɛnyaan yiridɛnaa nə ǹ di foo kɔɔ̃n koe. Sɛnɛ, yiriwɛɛnaa nə ǹ dan puusə koe.

²¹ Baãnaa foo n kɔɔ̃nɛ ka gaãnaabaa ǹ sii zɛnaa nɛ. Sɛnɛ, min mɛn bɛ́ yiridɛnaa lɛa, a n tɔ we zii pepere la.

²² Min mɛn bɛ́ a nɔ̀n diɛ ka doroo-n duduu wa, a dín mɛnɛn lɛ bɔ, bɛn man sàabiɛ. Sɛnɛ, bɛ̀ a dorooli wolen nə mɔnaa, maǹ yɔrɔ yii.

²³ Lɛ si ǹ boo sonbore n foo kɔɔ̃n koe. Bɛ̀ boo nə n da á kɔnpɛ a biikoo ne, bɛ n sii bǐɛ̃ lɛa.

²⁴ Zii mɛn bɛ́ woe yiikoonaabaa ganaa, sii-dɔ̃li n koe bɛ lɛ. Ǹ mɛn bɛ́ woe gɛ̀ ganaa, a nə n nyɛnɛɛ bɛ nɛ.

²⁵ Dɛnaa Lawa n din gole-kɔlen kion yui. Sɛnɛ, a n lɔ giɔɔrɔ a wuru tamɛɛ.

²⁶ Taasiɛ baraa tìĩ n boe ne Dɛnaa Lawa nɛ. Sɛnɛ, boo sonboren man kiɛ a foo la.

²⁷ Min mɛn bɛ́ baa sii wɔrɔ kio, a n koe lɛa a kion ganaa. Sɛnɛ, min mɛn bɛ́ a lɛ koe lɛ pii ǹ màn ganaa wa, á re nyin sasa yii.

²⁸ Min mɛn a zɛnaa ǹ sii bɛ́ siĩni, a n taasiɛ we a tɔn boo da. Sɛnɛ, min mɛn a zɛnaa ǹ sii bɛ́ bɔnɛɛ, a n boo basaã diɛ.

²⁹ Dɛnaa Lawa wɔlɔ n sɔsɔɔ min baraan ganaa. Sɛnɛ, a nə n too koe sii sonbore-zɛnaalin nyankɔ li.

³⁰ Ga ǹ gɔn sonbore n foo kɔɔ̃n koe. Boo kɔɔ̃n nə kakabaa koe gɔ̀nɔn la.

³¹ Min mɛn bɛ́ n too koe doroon li, n doe min lɛ, bɛa dɛnaa á re goɛ̃ kun sii-dɔ̃lin ni.

³² Min mɛn bɛ́ n piɛ̃ ka gɔn waa ma-n nɛ, a nə n din puusə koe. Sɛnɛ, min mɛn bɛ́ lɛ koe doroon ganaa, bɛa dɛnaa n sii-dɔ̃li biɛ.

³³ Nyɛ́ɛbaa Dɛnaa Lawa yii ni n min darɛɛ sii-doɛ̃ ganaa. Bɛ̀ n tá zoɛ̃ yii gugurubaa li, yǎa n nə n din boɛɛn koe.