Suusun 14 - LAWA A BOO SONBORE

¹ Lɔ sii-dɔ̃li na a kion koɛ. Lɔ yiriwɛɛnaa na a kion yui.

² Min mɛn a yiikoonaabaa bɛ́ pepere, bɛ n nyɛ́ɛbiɛ Dɛnaa Lawa yii ni. Sɛnɛ, min mɛn a giã ǹ gɔn bɛ́ kɔkɔrɔ, bɛ n pɔpɔsɛ.

³ Din gole kɔ n buũ koe baãnaa lɛ-n. Sɛnɛ, sii-dɔ̃li lɛ gɔ́ɔ̃ ǹ boo n tamɛɛ.

⁴ Buu kɔsɔ ǹ diin bɛ́ ǹ ba min mɛn lɔn wa, kaa-piɛ waáraa, a màn kɔn yii wa. Sɛnɛ, tɔɔ sonboren bɛ́ min mɛn lon, a n màn gigiã yii.

⁵ Siére sonbore-pɛli a min siɛ̃ wa. Sɛnɛ, siére baraa-pɛli n soɛ dinsɔɔ̃ boe.

⁶ Min mɛn bɛ́ yaa woe ǹ miãn ganaa, tà a n giɛ sii-doɛ̃ li, a yii wa. Sɛnɛ, yiridɛnaa n sii-dɔ̃li gole biɛ.

⁷ N wɔlɔ lui baãnaa ganaa. A giala, n ba re sii-doɛ̃ boo kɔn miɛ̃ a lɛ-n wa.

⁸ Min mɛn bɛ́ boe a din la, a nə n yiri koɛ a din a zɛnaa ǹ sii li, sii-dɔ̃li ni. Min mɛn yiri bɛ́ á nyaabaa, a nə́ ǹ miãn siɛ̃. Baãnaa nɛ.

⁹ Yiriwɛɛnaan man taasɛ mà gòã kuĩ là banban. Sɛnɛ min peperen man kɔn miɛ ǹ dinin bii.

¹⁰ Bɛ̀ min foo ziziɛ̃, a dinsɔɔ̃ na a foo busii doɛ̃. Bɛ̀ a foo á kɔɔ̃nɛ, min kɔn ba bɛa foo kɔɔ̃n lɛ gii kɔn nɛ wa.

¹¹ Maǹ min bɔnɛɛ a kion yui. Sɛnɛ, màn nə miɛ min peperen wɔ li.

¹² Min tá boe la a taasɛ mà asɛ a giã ǹ gɔn tá siĩni a da yaa dɔn, a woe-n geren piɛ.

¹³ Ń tá boe la n yaa wɔ n foo n busi dɔn. Foo kɔɔ̃nbaa dɔ á boe la a n giala nyɔmɔɔ ka foo ziziɛ̃ nɛ.

¹⁴ Min mɛn bɛ́ a yiikoonaabaa zɛnɛɛ a din mìi gialaa, a bɛ́ kɔnboe ka màn mɛn nɛ, á re bɛ yii. Min mɛn a giã ǹ gɔn bɛ́ siĩni, bɛa sii á re bǐɛ̃ koe.

¹⁵ Ń bɛ́ boo mɛn tumaa diɛ yiriwɛɛnaa nɛ, a n gole li. Sɛnɛ, min mɛn bɛ́ boe a din la bɛ nə n taasɛ bɔrɔ.

¹⁶ Sii-dɔ̃li n nyɛ́ɛ biɛ sii baraa nɛ a nə́ n nyɛnɛɛ nɛ. Sɛnɛ, baãnaa n woe nyɛɛnɛ, a n waa nɛ a din la.

¹⁷ Min mɛn foo bɛ́ yui fufuu, a n sii kooron zɛnɛɛ. Min mɛn bɛ́ n din biɛ yiridɛnaa lɛa, a nə n din tìĩ boe.

¹⁸ Gàãn nə yiriwɛɛnaan wɔ gii lɛa. Sɛnɛ, min mɛnɛn bɛ́ taasiɛ we, bɛn tá re yiridɛnan biɛ.

¹⁹ Min baraan tá re n dinin boɛɛn koe min sonboren yɔrɔ-a. Min baraan tá re n naɛ min sonboren kiɛnlɛ-a.

²⁰ Doobaa tìĩ n boe ne, haalɛ a din miãn li. Pàãma a giaára n mɔnaa nɛ.

²¹ Min mɛn bɛ́ ǹ miãn pɔpɔsɛ, a n sii baraa zɛnɛɛ. Min mɛn bɛ́ din boɛɛn kɔ wolen tá kɔɔ̃n a ganaa, bɛ n min foo kɔɔ̃naa lɛa.

²² Min mɛnɛn bɛ́ taasiɛ bɔnɛɛ nə́ ǹ yiri ni, ǹ nə́ sã ǹ zii ganaa. Min mɛnɛn bɛ́ taasiɛ sonbore we, ǹ saraa n sonborebaa laanka bɔlɔgoondɛnaabaa nɛ.

²³ Min mɛn bɛ́ dí nyɛɛ parsiini, a na a là yii. Sɛnɛ, min mɛn bɛ́ ń parɛɛ boo kooro diɛ ganaa, a n die goɛ̃ doobaa lɛa duduu.

²⁴ Pàãmabaa n sii-dɔ̃lin saraa lɛa. Baãnaa wɔ n ka gàãn nɛ.

²⁵ Siére-pɛli mɛn bɛ́ sonbore pii, a n minin kirisibiɛ. Sɛnɛ soɛ-bɔli nə ǹ miãn siɛ̃.

²⁶ Min mɛn bɛ́ Dɛnaa Lawa guguru koe, a yiri n bǎã goon ne. A giala, Dɛnaa Lawa na a nɛnyaanan tamɛɛ.

²⁷ Dɛnaa Lawa guguru kɔ n yiikoonaabaa ǹ mu yala lɛa. A nə n kanbiɛ gɛ̀ dɛ ǹ kanan ganaa.

²⁸ Kii a zaman a gigiãbaa na a tɔ boe. Sɛnɛ, gána a zaman a kiɛɛrɛ kɔ na a mɛnaa giala pii.

²⁹ Min mɛn bɛ́ boe a din foo la, bɛ n yiridɛnaa lɛa taãn-taãnɛ. Sɛnɛ min mɛn foo bɛ́ a gole yoo-n wa, a siɛ̃ yii n fuu.

³⁰ Yiri mɛn bɛ́ waa nɛ, bɛ n là nyantoro koe. Sɛnɛ foo wuu pɛ n tɛ lɛa min kuĩ.

³¹ Min mɛn bɛ́ mɛnɛɛ doobaa la, a n sɔ koe a zɛnaali ganaa. Sɛnɛ, doobaa makara bɛ́ boe min mɛn ganaa, bɛ n gugurubaa koe la.

³² Min baraa a baraabaa nə n bɔyɛɛ a kirəə a din la. Sɛnɛ, ta gɛ̀ biikoo ne, min pepere foo n doa nɛ.

³³ Min mɛn bɛ́ taasiɛ sonbore we, sii-dɔ̃li ni. Sɛnɛ, baãnaan tá bɛ doɛ̃?

³⁴ Peperebaa n gána a zaman mìi siɛ lon. Sɛnɛ, sii baraa n tɔrɔn tumaa a sìi lɛa.

³⁵ Dí-nyali yiridɛnaa n kɔɔ̃n kii ganaa. Sɛnɛ min mɛn bɛ́ sìi diɛ a ganaa, a foo n yui bɛ li.