Suusun 10 - LAWA A BOO SONBORE

Suusu, din kũ doɛ̃ wɔ paǹ li

¹ Salomɔn a suusun Nɛnyaan sii-dɔ̃li nə ǹ di foo kɔɔ̃n koe. Sɛnɛ, nɛnyaan yiriwɛɛnaa nə ǹ dan foo busi.

² Koɛɛ̃n màn là a yii min-a wa. Sɛnɛ, giã ǹ gɔn pepere á min sii gɛ̀ la.

³ Dɛnaa Lawa n sii sonbore-zɛnaali kanbiɛ bòo ganaa. Sɛnɛ, sii baraa-zɛnaalin kɛn, a nə n piɛ̃ ka bɛn foo sii ni.

⁴ Gɔn yoo-baali n die ka doobaabaa nɛ. Gɔn dí-nyali n die ka naforo ne.

⁵ Min mɛn gù bɛ́ kaa nɛ kaa-piɛ waáraa, yiridɛnaa nɛ. Sɛnɛ, min mɛn bɛ́ nyuù we bɛa biikoo li, ǹ dɛnaa doamaa n ka pɔpɔsɛɛ nɛ.

⁶ Maǹ Lawa bǐɛ̃ bíi min sonbore li, sɛnɛ kakaarɛbaa n durii ni sii baraa-zɛnaalin da ǹ boon kio.

⁷ Min mɛnɛn bɛ́ sii sonbore zɛnɛɛ, yiri a boe ǹ ne wa. Sɛnɛ, sii baraa-zɛnaalin kɛn, yiri n boe bɛn nɛ lenlen.

⁸ Min mɛn bɛ́ taasiɛ we, bɛ n doroo sii. Sɛnɛ, min mɛn bɛ́ boo kooron diɛ bɛ n bɔ̀n diɛ a din-a.

⁹ Min pepere n yiri n giã-n bǎã goon ne. Sɛnɛ min kɔkɔrɔ wɔ n ka dɔlɔ nɛ.

¹⁰ Min mɛn bɛ́ sonbore duri ǹ miãn la, a n fuu nyɛɛ ǹ nɛ. Sɛnɛ min mɛn bɛ́ ǹ doree foaã nɛ bɛ n là nyantoro koe ǹ la.

¹¹ Sii sonbore-zɛnaali lɛ n yiikoonaabaa ǹ mu yala lɛa. Sɛnɛ, boo basaã n durii-n sii baraa-zɛnaalin da ǹ boo kio.

¹² Min mɛn bɛ́ ǹ miã tìĩ n boe n ne, bɛ n yui ka zia nɛ. Sɛnɛ kɔn-narɛɛ n toɛ n nə n miã sãn toa nɛ.

¹³ Yiridɛnaa n sii-doɛ̃ boo diɛ. Sɛnɛ min mɛn bɛ́ yiriwɛɛnaa lɛa dɔ̀rɔ̀ wuu n die boe bɛ ganaa.

¹⁴ Sii-dɔ̃lin manə ǹ doɛ̃ tamɛɛ ka màn giɔ̀mɔ kakaa bɛ́ lɔn. Sɛnɛ, gàãnaan mɛnaa wɔlɔ á sɔsɔɔ wa.

¹⁵ Gɔn màndɛnaa a naforo n tamɛɛ. Sɛnɛ doobaa a doobaabaa n dii.

¹⁶ Min pepere gɔn màn nə yiikoonaabaa koe. Sɛnɛ, min kɔkɔrɔ n sii baraa zɛnɛɛ ka a gɔn màn nɛ.

¹⁷ Min mɛn bɛ́ lɛ koe gɔn waa ma-n ganaa, bɛ n yiikoonaabaa ǹ zii la. Sɛnɛ min mɛn bɛ́ a lɛ koe doroo ganaa wa, bɛ n papaã ǹ zii la.

¹⁸ Min mɛn bɛ́ zɔ́ɔbaa duri, min naarɛ nɛ. Min mɛn bɛ́ soɛ diɛ ǹ miãn la, baãnaa nɛ.

¹⁹ Boo gigiã diɛ n die ka siɛ̃ nɛ. Min mɛn bɛ́ a boo gigiã diɛ wa, yiridɛnaa nɛ.

²⁰ Min pepere a da ǹ boon man ka wɔrɔ gɛlɛ taãn bɛ́ lɔn. Min baraa a taasiɛ a màn kɔn bǐɛ̃ koe wa.

²¹ Min gigiã n là yii sii sonbore-zɛnaali a boon ganaa. Sɛnɛ baãnaan man giɛ̃ yiriwɛɛnaabaa taman yii.

²² Dɛnaa Lawa a barka da ma-a n min biɛ pàãma lɛa. Gɔ́ɔ̃ bii a màn kɔn diɛ li wa.

²³ Sii baraa zɛnaa n sàn lɛa baãnaa yii li. Sɛnɛ, din kũ ka sii-doɛ̃ nɛ a kaka yiridɛnaa ganaa wa.

²⁴ Sii baraa-zɛnaali bɛ́ nyɛ́ɛ biɛ sii mɛn nɛ, bɛ lɛ n die yii. Sɛnɛ, sii sonbore-zɛnaali bɛ́ zoɛ̃ màn mɛn li, Dɛnaa Lawa n bɛ koe la.

²⁵ Koe n sii baraa-zɛnaali bii. Sɛnɛ min mɛn bɛ́ sii bǐɛ̃ zɛnɛɛ, bɛ goã n we tán miɛ̃ duduu.

²⁶ Tɛmaa n we yii ni, màn pipiã n sɔ piɛ̃. A din yii goon ne, yoo baali na a goledɛnaa foo diɛ yoo ganaa.

²⁷ Nyɛ́ɛbaa Dɛnaa Lawa yii ni n màn diɛ nyin sasabaa li. Sɛnɛ, màn nə n boe min baraan lɛ̀ lɛ.

²⁸ Min mɛn bɛ́ sii sonbore zɛnɛɛ, á re foo kɔɔ̃nbaa yii. Sɛnɛ, min baraan baran n yiri koa màn kɔn ganaa wa.

²⁹ Dɛnaa Lawa a zii n sii sonbore-zɛnaalin tamɛɛ. Sɛnɛ a n sii baraa-zɛnaalin ziziɛ̃.

³⁰ Sii sonbore-zɛnaali a mɛnɛɛ duduu wa. Sɛnɛ, min mɛn bɛ́ sii baraa zɛnɛɛ, bɛ ba re giɛ̃ gána lɛ-n wa.

³¹ Min mɛn bɛ́ sii sonbore zɛnɛɛ, sii-doɛ̃ boo n soe a lɛ-n. Sɛnɛ, maǹ die soɛ-bɔle lɛwɔn kuri.

³² Min pepere n boo diɛ ka fubaa nɛ. Sɛnɛ, sii baraa-zɛnaali n minin sã ǹ boo diɛ.