Sofonii 1 - LAWA A BOO SONBORE

¹ Dɛnaa Lawa bɛ́ boo kɛ diɛ Sofonii ni, bɛ̀ Amɔn a nɛgiĩ Zoziasi n Zudaa gána a kii lɛa. Sofonii n Kuusi a nɛgiĩ lɛa, Kuusi n Gedalia a nɛgiĩ lɛa, Gedalia n Amariya a nɛgiĩ lɛa, Amariya dɔn Ezekiasi a nɛgiĩ lɛa.

Dɛnaa Lawa n kiri kuri tán la

² Dɛnaa Lawa a da ǹ boo á ke: Man die màn tumaa papaɛ̃ ma bɔ tán la.

³ Man die minbuiin nɛn laanka tɔɔn bɔ̀n biɛ. Man die lon a bàanan laanka mu li ǹ zɔ̀nɔn bɔ̀n biɛ, man die min baraan bɔ̀n biɛ, kɔnlɛ ka màn mɛn tumaa bɛ́ minin boe ǹ kiɛ. Man n die minbuiin nɛn papaɛ̃ ma ǹ bɔ tán la. Dɛnaa Lawa a da ǹ boo ne.

Dɛnaa Lawa n kiri kuri Zudaa laanka Zeruzalɛmu la

⁴ Dɛnaa Lawa a da ǹ boo á ke: Ma á re n gɔn siɛ Zudaa laanka Zeruzalɛmu kiwi minin kɛn li. Ma á re ǹ dì *Baali gialakun kɛ tumaa bɔ̀n biɛ, ma á re a wúlu-bɔlen dinin tɔ papaɛ̃.

⁵ Min mɛnɛn dɔn bɛ́, dii kalan ǹ tá lon mànan guguru koe ma á re bɛn bɔ̀n biɛ. Min mɛnɛn bɛ́ masɛ guguru koe ǹ wusoo doo ǹ nə n liɛ ka ǹ dì Molɛki ni ma á re bɛn dɔn bɔ̀n biɛ.

⁶ Min mɛnɛn bɛ́ n dɔ̀ɔ̃ we masɛ Dɛnaa Lawa nɛ, ǹ laadoo ná a ba ma-a wa ǹ ba maa doreen li wa, ma á re bɛn dɔn bɔ̀n biɛ.

⁷ Ka n lɛ tã Dɛnaa Lawa yɔrɔ-a! A giala, a lɛawaa lɛ diri. Dɛnaa Lawa n die wúlu boe, a tiin yɔrɔ bɔ maa nɛ.

⁸ Dɛnaa Lawa pɛ: Wúlu bɔ pinaa lɛ nɛ ma á re dɔlɔ boe nyɛɛnaandɛnaan ganaa, kii nɛn nɛ, ka min mɛnɛn bɛ́ gána kɔsɔ mɔnaan we.

⁹ Bɛa pinaa lɛ nɛ, min mɛnɛn bɛ́ kion kiɛnlɛ lɛ lanparɛ ma á re yui bɛn gialaa. Min mɛnɛn dɔn bɛ́ ǹ dɛnaa a kion piɛ̃ ka kakaarɛbaa laanka wurumubaa ǹ mànan nɛ ma á re dɔlɔ boe ǹ ganaa.

¹⁰ Dɛnaa Lawa a da ǹ boo á ke: Bɛa pinaa kɛ lɛ nɛ, Zeruzalɛmu kiwi, lɛ dɛ gole tá re boe zɔ̀nɔn kiɛnlɛ-a. Bubui á re boe dala dii kɛ nɛ, ka màn wuu gole ne tentenen mìi ni.

¹¹ Ka n lɛ dɛ, kasɛn mɛnɛn bɛ́ kiwi lɛa tán-a a lɛ̀gɔn la, a giala, pii-kɔle tumaa n die giɛ̃. Min mɛnɛn bɛ́ ǹ wɔrɔ zoɛ̃ bɛn man die giɛ̃.

¹² Bɛa biikoo li, man die bolon diɛ ma Zeruzalɛmu kiwi guusi. Min mɛnɛn bɛ́ n dinin narɛ, ma á re dɔlɔ boe bɛn ganaa. Maǹ taasɛ ǹ gɔ́ɔ̃ nɛ: «Dɛnaa Lawa a boe màn kɔn la a zɛnaa wa, sii bǐɛ̃ lɛa hinlaa sii baraa lɛa.»

¹³ Sɛnɛ, ǹ gɔn mànan tá re màn kokoo biɛ ǹ kionən tá re yui. Maǹ kionən doe, sɛnɛ ǹ ba re giɛ̃ ǹ nɛ wa. Maǹ *rezɛ̃ dan zumi, sɛnɛ ǹ ba re a duvɛ̃ mii wa.

Dɛnaa Lawa a lɛawaa lɛ diri

¹⁴ Dɛnaa a lɛawaa gole lɛ diri. Á diri ka foɛɛ̃. Bɛa pinaa kɛ lɛ nɛ, lɛ dɛ gole á re boe, footaãnaa din tá re gú diɛ.

¹⁵ Foo-yoo lɛawaa nɛ, bɔ̀n ka nyɛ́ɛ lɛawaa nɛ, ziziɛ̃ nɛ, ka gɛ̀ nɛ, tèlò ka wɔlɔ tì lɛawaa nɛ.

¹⁶ Bɛn wuu lɛawaa nɛ ka zia lɛ-dɛ nɛ, kiwi dadaraan kɛn ganaa, tamaa nɛ, kungɔn sɔsɔrɔn nə́ ǹ lɛnpɛnɛ.

¹⁷ Dɛnaa Lawa pɛ: Minbuiinin man nə́ sii baraa zɛnaa masɛ nɛ. Bɛ lɛ nɛ, man die koe boe ǹ ganaa. Maǹ die tɔ we ǹ nə́ tatalɛ ka yii tere-an bɛ́ lɔn. Maǹ die ǹ mà kiɛ tán bǎã tumaa nɛ ka tii bɛ́ lɔn. Ǹ gere á re boɛ̃ tán ka yisi bɛ́ lɔn.

¹⁸ Dɛnaa Lawa a foo-yoo lɛawaa kɛa pinaa, ǹ wɔrɔ hinlaa ǹ sana á re ǹ boe a-n wa. A giala, Dɛnaa Lawa a foo-yoo baraa a tɛ n die tán din tumaa kukuĩ. Taãn nɛ, minbuiin nɛ tumaa n die bɔ̀n biɛ lenlen.