Loe kɔɔ̃n kɔɔ̃n 8 - LAWA A BOO SONBORE

¹ Aa! Toa bɛ̀ n nə ma miãgiĩ lɛa dɛ! Toa bɛ̀ ma n wɔa kion min lɛa dɛ! Bɛ̀ má kaa n lɛ bǎã nɛ, bɛ̀ ma bɛ́ re n soɛ n nɛ minin yii ni, min ná a boe la a ma tɔ pɛ wa.

² Bɛ̀ ma nə n kuĩ, ma wo wɔ n nɛ maa náa a kion, n ma daraa. Bɛ̀ man duvɛ̃ gìĩ kɔɔ̃n koe n la, n na a nɛ̀n da, ka maa grenadie mu kɛ nɛ.

³ Ma mìi na a gɔsɛ a gɔn la, a nə́ n gusin talɛɛ ma-a.

⁴ Zeruzalɛmu nɛlɔn lɛn, ma gɛlɛɛ ka nɛ! Ka baran bũ wa, ka baran ma din foo dùũ wɔ lɛ yii kaa, bɛ̀ a ná a tɔn dɔ a din wɔ lɛ-a wa.

LOE sɔrɔbaa ǹ wɔ ( 8.5-14 ) Nɛlɔn man boo diɛ

⁵ Lɔ mɛn nə ke n toɛ diə gole li die, paraa-n denden a din foo dùũ wɔ gùrù ganaa? Man má n yii kaa pɔmu da kɛ giulun, n dan bɛ́ á n nɔ̀ si bǎã mɛn lɛ nɛ, a bɛ́ á n yɛ á n da kanaa bǎã mɛn lɛ nɛ.

Pàã mɛn bɛ́ kɔn-narɛɛ lon Nɛniɛ lɛ n boo diɛ

⁶ Ma tɔ kiɛ̃ n foo ganaa, toa n goã ma dinsɔɔ̃ nɛ, a giala, kɔn-narɛɛ lɛ pàã n kaka. N bɛ́ min mɛn narɛ, a toɛ n nə ǹ dɛnaa toa walan wa. Kɔn-narɛɛ n ka tɛ gigiri bɛ́ lɔn, a ná a nimi wa.

⁷ Mu dadaran ba boe kɔn-narɛɛ a tɛ kɛ la, ǹ nimi wa. Tà mun ba boe la ǹ bii wa. Ta min mɛn nə n gɔn màn tumaa siɛ, mà a na a lonkoe ka kɔn-narɛɛ nɛ, a min kɔn din yii wa.

Sunɛmun nɛ lɛ miãgiĩn man boo diɛ

⁸ Wɔ diɛ̃ nɛlɔ boɛɛn goon tan, a nyɔn nə tɔn bɔ bɔrɔ wa. Bɛ̀ tɔntɔraa daa bɔ a kio ǹ mɛn waáraa, wɔ n die wàa sii zɛnɛɛ wɔ diɛ̃lɔ lɛ wɔ paǹ li?

⁹ Bɛ̀ a na á daa yaa, wɔ diɛ̃lɔ lɛ n kungɔn lɛa, bɛ̀ wɔ n kanpiɛnɛn zɛnɛɛ ka wɔrɔ nɛ a lalan. Bɛ̀ a n kiɛnlɛ lɛa, bɛ̀ wɔ n da kaka gɔn diɛ a kii la.

Nɛniɛ lɛ n boo diɛ

¹⁰ Masɛ, man kungɔn lɛa. Ma nyɔn kɛn man sanabolon lɛa. Bɛ lɛ n ke á giɛ ma-a, mà ma din na asɛ wɔ bǐɛ̃ koe.

Tɔntɔraa lɛ n boo diɛ

¹¹ Salomɔn a *rezɛ̃ da wuru goon tá Baali-Hamɔn. Á bɛa rezɛ̃ da wuru lɛ a gama walan sii toa minin gɔn. Bɛ̀ ǹ nə́ wuru lɛ a da nɛ sã, ǹ gogoonmaa doamaa nɛ, á n die ka wɔrɔ duu goon ne.

¹² Ma din gɔn tɔ rezɛ̃ da wuru lɛ n bii-a maa lɛa. Haya! Salomɔn! Duu goon lɛ nə n din wɔ lɛa, min mɛnɛn bɛ́ giɛ da nɛ lɛ walan, bɛn wɔ n biɛpaa.

¹³ E! Nsɛ mɛn bɛ́ giã-n tán dù gɔrɔ bii, ma miãn tá n too diɛ n lɛn li, toa ma n lɛ ma.

Nɛniɛ lɛ n boo diɛ

¹⁴ Ma din foo dùũ wɔ, n baa fufuu! N baa fufuu ka woree hinlaa ka yuùn ten bɛ́ lɔn, da yon gìĩ kɔɔ̃n kelen kɛn la.