Loe kɔɔ̃n kɔɔ̃n 7 - LAWA A BOO SONBORE

Zeruzalɛmu nɛlɔn man boo diɛ

¹ Haa Sunɛmun nɛ wee! N bɔyaa n daa, n bɔyaa n daa, n bɔyaa n daa, n bɔyaa n daa, màn mɛn bɛ́ toɛ, wɔ ga n ganaa doɛ̃. Wàa na á baa, ka tá li ka ga ma-a, ka man bɛ̀ dù ni?

Nɛniɛ lɛ n boo diɛ Tɔntɔraa lɛ n boo diɛ

² Ee kii nɛ! N gòãn tá siĩni, n kɔsɔnɔn kɛn nɛ parɛ! N tanbɛn bǎãn nə́ luuri, luuri, ka dí-dɔ̃li sonbore a kaaran zɛnaa nɛ.

³ N boron giulun nə ka paãn buriin bɛ́ lɔn, lɛkara paa. Duvɛ̃ gìĩ kɔɔ̃n ba nyaabiɛ a-n wa. N nɔ̀ n ka *belee toa bɛ́ lɔn, da buũn nə́ da bii.

⁴ N nyɔ màn paa ke, bɛn maǹ ka yuùn nɛ màn paa bɛ́ lɔn, ǹ dan nə́ ǹ yɛ bɛlɛmanan lɛa.

⁵ N wìi n paraa nɛ, pepere, ka sanabolo siĩn bɛ́ lɔn. N yii nànan man ka Ɛsibɔn a pɛrɛn kɛn mu bɛ́ lɔn, kunu Bati-Rabimu a wɔ ǹ kiɛnlɛ ganaa. N nyin gòã n pɔrɔɔ nɛ, ka Liban a sanabolo kɛ bɛ́ lɔn, a yɔrɔ ń dia-n Damaasi kiwi la.

⁶ N mìi tá a giala la lon, ka Karmɛli kele bɛ́ lɔn. N mìi ka ke, bɛ n pɔsiaã nɛ, tì nɔnɔɔ. A siĩnbaa kii yiri si la.

⁷ Ma din foo dùũ wɔ, n tá siĩni á là da, yii á boe n li á là da. N tá ma foo nyɛɛ a tɔ-a.

⁸ Ń bɔ doɛ̃ pɔrɔɔnɛ, ka sèwo da bɛ́ lɔn. N nyɔn man ka a nɛ bɛ́ lɔn.

⁹ Má pɛ ma din gɔ́ɔ̃ nɛ: máa yǎa ma dii sèwo da kɛ la, man gɔn diɛ a nɛ ganaa. N nyɔn kɛn die n lùlùù kɔ ma gɔn, ka *rezɛ̃ da nɛ bɛ́ lɔn. Piɛ̃ mɛn bɛ́ soe n lɛ-n, bɛ gìĩn kɔɔ̃nɛ ka da nɛ kɔɔ̃n gìĩ bɛ́ lɔn.

¹⁰ N lɛ dɔ die a goã ka duvɛ̃ kɔɔ̃n kɔɔ̃n bɛ́ lɔn. Bɛa duvɛ̃ lɛ dɔ ma din foo dùũ wɔ lɛ ganaa gɔrɔ, á baa si nyuù-wɔlen kɛn lɛ ganaa.

Nɛniɛ lɛ n boo diɛ

¹¹ Man ma din foo dùũ wɔ lɛ wɔ lɛa, ma sii ná a ganaa.

¹² Ma din foo dùũ wɔ, daa! Daa wɔ soo, wɔ n ta lalaa, wɔ lɛ̀ waa gɛ̀bi daanan giulun.

¹³ Wɔ die wɔ yoo tán lɛlɛ, wɔ wo ga rezɛ̃ da wurun ni, wɔ ga, bɛ̀ rezɛ̃ da fɔ̃, bɛ̀ da buũn nə́ n lɛ yu, bɛ̀ grenadie da á buũ lɛa. Walan nɛ, ma tá re n goe ka maa kɔn-narɛɛ lɛ nɛ.

¹⁴ Lɔn gɛrɛsiɛ yɛ ǹ dan kɛn gìĩ n boe kɔɔ̃nɛ. Wɔa kiɛnlɛ-a, da nɛ sonbore tɔrɔ tumaa n wɔ duĩ. Da nɛ diin ni, a zizin ni, man má bɛn koa n din ni, ma din foo dùũ wɔ.