Loe kɔɔ̃n kɔɔ̃n 3 - LAWA A BOO SONBORE

Man giɛ ma din foo dùũ wɔ lɛ li Nɛlɔ lɛ n boo diɛ

¹ Min mɛn lɛ sii bɛ́ kɔɔ̃n ma ganaa, bɛ̀ ma á tán maa pii la tèlò-n, ma nə n gɔn talɛɛ bɛ li, ma nə n gɔn talɛɛ li, sɛnɛ a wɔlɔ banban.

² Man die yui kanna, ma kiwi lɛ kɔkɔn, ma kɔkɔ ziin lɛ, ma bɔbɔ bǎãn nɛ, min mɛn lɛ bɛ́ kɔɔ̃n ma ganaa, ma ga bɛ li. Má ga li, sɛnɛ man na a-n wa.

³ Kiwi a bǎã-lɛduə̃lin man ke, má kaa ǹ lɛ, má nɔ̀n da bɛn la kɛnɛn: «Min mɛn lɛ bɛ́ kɔɔ̃n ma-a, ka n na bɛ-n wa?»

⁴ Ma din bɛ́ má ǹ na boɛɛn lɔn gɔrɔ, min mɛn lɛ bɛ́ kɔɔ̃n ma-a, bɛ̀ bɛ á ke má kaa lɛ. Má kũ, ma a n gɔn boe-a doo wa, yǎa ma woo we ne ma dan a kion, maa yɛ ǹ dan a waa ǹ kion.

Tɔntɔraa lɛ n boo diɛ

⁵ Zeruzalɛmu nɛnɛn lɛn, ma gɛlɛɛ ka nɛ! Ma n ka nyankoe ka don woreen laanka don a yuùnun tɔ nɛ. Ka baran bũ wa, ka baran ma din foo dùũ wɔ lɛ yii kaa, bɛ̀ a ná a tɔn dɔ a din wɔ lɛ-a wa.

LOE sɔɔbaa ǹ wɔ ( 3.6—5.1 ) Nɛniɛ lɛ n boo diɛ

⁶ Die n ke á soo diə gole li die, gusuũ yui ka tɛmaa bara bɛ́ lɔn? A gìĩ tumaa n *miíri nyɔɔ gìĩ kɔɔ̃n lɛa, da yon gìĩ kɔɔ̃n lɛa, ka pii-kɔlen bɛ́ die ka màn gìĩ kɔɔ̃n tɔrɔ mɛn tumaa nɛ.

⁷ Salomɔn gũ ǹ màn lɛ á ke. Giĩn mɛnɛn bɛ́ doa boe, Izirayeli a zia nɛ doa-bɔlen bii, bɛn min pɔsɔrɔ na á da bii.

⁸ Gɔya sa nə ǹ tumaa ganaa. Ǹ tá zia biɛ doɛ̃ a tɔ-a. Didie a gɔya sa na a gisi ganaa. Bɛ̀ sii kaka daa tèlò-n, ǹ yɔ bɔ a ganaa.

⁹ Kii Salomɔn lɛ min gũ ǹ yoroon zɛnaa, a dinsɔɔ̃ wɔ lɛa, Liban gɔn na a lɛa.

¹⁰ Á ná a gòãn zɛnaa ka wɔrɔ nɛ, á ná a tiləə ǹ bǎã zɛnaa ka sana nɛ, á ná a giã ǹ bǎã zɛnaa ka mɔnaa sonbore ne. A gɔ́ɔ̃ ke, Zeruzalɛmu nɛlɔn man nə́ bɛ zɛnaa ka kɔn-narɛɛ nɛ.

¹¹ *Siɔn nɛlɔn lɛn, ka da soo ka ga! Ka ga kii Salomɔn ganaa, a ná a kɔn wɔ ǹ bafolo wɔ. Ǹ dan nə bafolo mɛn lɛ kɔ la a kɔn-wɔ pinaa, a foo kɔɔ̃nbaa gole pinaa.