Sii-nyaan 2 - LAWA A BOO SONBORE

Efɛɛzin Lawa a sɔmɔ minin boo gii

¹ Yezu pɛ ma nɛ: «Sɛ́wɔ kɛ kiɛ̃ n dia Efɛɛzin Lawa a sɔmɔ a lon a dia dí-a wole la: «Masɛ mɛn bɛ́ leere sɔbaa n ma gusin ni, má n tɔ we sana bolon koa ǹ bǎã sɔbaa bii, man pii ka nɛ:

² N sii mɛn tumaa zɛnaa, má dɔ̃, n nə n doa ka yɔrɔ mɛn nɛ, má dɔ̃, n nə n foo kũ ka yɔrɔ mɛn nɛ, má bɛ dɔ dɔ̃. Ma á doɛ̃ máa n ba min baraan sii sii n ganaa doɛ̃ wa. Min mɛnɛn bɛ́ n dinin biɛ maa dia dí-a wolen lɛa, n nə́ n da ǹ gɔ́ɔ̃ li, n dɔ̃ mà soɛ-bɔlen manɛ.

³ N tá n foo kuĩ, n fuu yɛ masɛ tɔ a lɛa, a n gù basã wa".

⁴ Sɛnɛ, ma lɛ bɛ́ n li ka sii mɛn nɛ, bɛ á ke: "N ba ma narɛ doo ka lɛlɛ wɔ bɛ́ lɔn wa.

⁵ N yiri koa n bɔ a mɛnaa ǹ bǎã kɛ li! N wusoo n sii baraan kio, ka n sii zɛnaa nɛ, ka n bɛ́ ń goã zɛnɛɛ lɔn lɛlɛ. Bɛ̀ bɛ bie wa, ma á re die n gialaa, ma n bolon koa ǹ bǎã kɛ saa ma bɔ a bǎã nɛ.

⁶ Ka bɛ tumaa nɛ, ma á sii kɛ doɛ̃ n wɔ paǹ li: Nikolayitin bɛ́ siin mɛnɛn zɛnɛɛ, bɛn sii tìĩ n boe-n n nyin ni, ka a bɛ́ boe-n masɛ dɔ nyin ni lɔn.

⁷ «Too bɛ́ min mɛn lon, Lawa a Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! «Min mɛn bɛ́ re gɔ̀lɔ̀ biɛ, ma á re lɛ koe la, yiikoonaabaa ǹ da mɛn bɛ́ Lawa a piɛ, a bɛa nɛ bii.»

Simirnin Lawa a sɔmɔ minin boo gii

⁸ Sɛ́wɔ kɛ kiɛ̃ n dia Simirnin Lawa a sɔmɔ a lon a dia dí-a wole la: «Masɛ mɛn bɛ́ bibinaa lɛa, má n giala-nyɔmɔɔ dɔ lɛa, má goã má gã, sɛnɛ, má wusoo má yiikoonaabaa yɛ, man pii ka nɛ:

⁹ Ma á n fuun doɛ̃, ma á n doobaabaa dɔ doɛ̃, sɛnɛ, ka boo taãn nɛ, n tá pàãma lɛa! Min mɛnɛn bɛ́ n dinin biɛ Zuifun lɛa, ǹ nə́ ǹ ba a lɛa dɔn wa, bɛn bɛ́ boo baraa mɛn diɛ n wɔ paǹ li, ma á doɛ̃. Maǹ *Sɛtaan a lɛ-kaakun minin lɛa!

¹⁰ Boɛɛnɛ, Sɛtaan lɛ á re n diɛ ka gɔ́ɔ̃ li. A n die kaa min tɛnɛn kuĩ a ǹ zũ kòso-n. Ka á re fuu yii lɛawaa fù gɔ́ɔ̃ nɛ. Bɛa fuu kɛ lɛ nyan nyɛ́ɛ da n ganaa wa. Goã bɔlɔgoondɛnaa lɛa haalɛ ta a n doe n gɛ̀ ganaa. Ma á re nyin nyabaã koe n la, ka a gɔ̀lɔ̀baa ǹ kii bafolo lɛa.

¹¹ «Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! «Min mɛn bɛ́ re gɔ̀lɔ̀ biɛ, gɛ̀ paabaa ǹ wɔ a re doe bɛ ganaa wa.»

Pɛrgamun Lawa a sɔmɔ minin boo gii n ke

¹² Sɛ́wɔ kɛ kiɛ̃ n dia Pɛrgamun Lawa a sɔmɔ a lon a dia dí-a wole la: «Masɛ mɛn bɛ́ gɔya sa lɛn paanan lɛbɔle n maa wɔ lɛa, man pii ka nɛ:

¹³ Ma á doɛ̃, n bɛ́ giã-n bǎã mɛn nɛ, Sɛtaan dɔ a kii dankan nə doa-n walan. Sɛnɛ, n tá doa-n kɔn ka masɛ tɔ nɛ, n golee masɛ li daa wa, haalɛ ǹ bɛ́ ǹ nə́ maa siére bɔlɔgoondɛnaa Antipaasi dɛ á gã biikoo mɛn li ka li, Sɛtaan a giã ǹ bǎã kɛ lɛ nɛ.

¹⁴ «Ka bɛ tumaa nɛ, ma lɛ tá n li ka sii tɛn nɛ: Minin tá n li, ǹ gɔn nə́ tɔn paraa-n Balaamu a lɛlɛ a minin daraa ǹ yiri baraa kɛ ganaa. Balaamu na á goã kii Balaaki darɛɛ, mà a Izirayeli minin bebere, a ǹ kaa dì wúlu bɔ ǹ siĩ sɔ̃ ganaa, ǹ nə n dinin kɔ kɔrɔbaa la.

¹⁵ A din goon ne, minin tá n li, ǹ gɔn nə́ paraa-n Nikolayitin minin daraa ǹ yiri baraa kɛ ganaa.

¹⁶ Wusoo n sii baraan kio. Bɛ̀ bɛ bie wa, ma á re die n tɔwɛɛ sisia, ma zia baa bɛa minin kɛn lɛn ganaa ka gɔya sa kɛ-n soe ma lɛ-n.

¹⁷ «Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! «Min mɛn bɛ́ re gɔ̀lɔ̀ biɛ, *maánə mɛn bɛ́ durii-n pelo, ma á re bɛ koe bɛ la. Ma á re kɔlɔ fu koe la, a tɔ soree n kiɛ̃ nɛ a ganaa, min kɔ́n ná a doɛ̃ wa, yǎa a din.»

Tiatiirin Lawa a sɔmɔ minin boo gii

¹⁸ Sɛ́wɔ kɛ kiɛ̃ n dia Tiatiirin Lawa a sɔmɔ a lon a dia dí-a wole la: «Masɛ Lawa a Nɛgiĩ a boo n ke, masɛ mɛn bɛ́ ma yii nànan nə́ ka tɛ buə̃ bɛ́ lɔn, ma gòãn nə́ tɛ pii ka zan nɛ ǹ nə́ zɔnɔ, man pii n ni:

¹⁹ Ma á n sii-zɛnaan doɛ̃, n kɔn-narɛɛ nɛ, n foo-doa Lawa ganaa nɛ, n dí-nyɛɛ nɛ, n tá boe n foo la sii gigiã gɔ́ɔ̃ nɛ. Ma á doɛ̃ máa n nya ǹ dí gole kɔ kanna á la n lɛlɛ wɔ nɛ.

²⁰ «Sɛnɛ, ma lɛ bɛ́ n li ka sii mɛn nɛ, bɛ á ke: Lɔ kɔrɔ Zezabɛli a sii á kúu biɛ n nɛ, asɛ lɔ mɛn bɛ́ n din biɛ Lawa a boo gii-dali lɛa. A din nə maa dí-nyalin siɛ̃, mà ǹ nə n dinin kɔ kɔrɔbaa la, ǹ dì wúlu bɔ ǹ siĩn dɔn sɔ̃.

²¹ Má biikoo kɔ la máa a wusoo a sii baraan kio, sɛnɛ, a lɛ koe a tá a kɔrɔbaa ǹ siin lɛn kiɛ wa.

²² Bɛ lɛ n toɛ, ma á re busu diɛ a ganaa a piì ni. Min mɛnɛn dɔn bɛ́ ǹ nə́ naarɛbaa zɛnaa kun ka asɛ lɔ kɛ nɛ, ǹ sii bɔnɛɛn mɛnɛn zɛnaa kun ni, bɛ̀ ǹ wusoo ǹ kio-n wa, ma á re fuu gole nyɛɛ ǹ dɔn nɛ.

²³ Ma á re a nɛnyaanan tumaa dii. Ka bɛ nɛ, Lawa a sɔmɔ minin tumaa á re doɛ̃, mà min mɛn bɛ́ minbuiin tumaa a taasiɛn doɛ̃, ka ǹ foo sii duriin ni, mà bɛ n ka masɛ nɛ. Ma á re ka gogoonmaa sarɛɛ, a kɔnpɛ ka a din a sii-zɛnaan nɛ.

²⁴ «Sɛnɛ, kasɛn Tiatiirin Lawa a sɔmɔ min gialakunun nə́ goã doa-n kɔn ka minin daraa ǹ yiri baraa kɛ-n wa. Minin kɛn bɛ́ mànan mɛnɛn bíi Sɛtaan a sii-durii zuzulun, kasɛn nə n daraa bɛn ganaa wa. Man pii ka nɛ, máa ma a re sii kɔsɔ diɛ kasɛn mìi-n doo wa.

²⁵ Sɛnɛ, sii mɛn bɛ́ ka gɔn, ka kũ kaka parsiini, yǎa maa daa doe.

^26-27 «Min mɛn bɛ́ re gɔ̀lɔ̀ biɛ, a ma foo sii zɛnaa a dɔ a giala-nyɔmɔɔ ganaa, maa Díi Lawa bɛ́ á pàã mɛn kɔ ma la, ma á re bɛ koe ǹ dɛnaa la: ma á re gánan tumaa a lɛduə̃ ǹ pàã koe la, a á re ǹ lɛduĩ ka kiibaa ǹ fɔlɔ bàlà nɛ, a nə ǹ yɔyɔrɛ, ka ǹ bɛ́ tii dɔn yɔyɔrɛ lɔn.

²⁸ A gɔ̀lɔ̀baa a lɛa, ma á re baayɛlɛ a leere dɔ koe la.

²⁹ «Too bɛ́ min mɛn lɔn, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma!»