Siin Giala 8 - LAWA A BOO SONBORE

Nowee n soe n boe mu la ǹ goo ne

¹ Lawa nə́ n yiri koa Nowee li. Don mànan laanka piɛ mànan mɛnɛn dɔn nə goã kun ni goo lɛ nɛ, á n yiri koa ǹ dɔn li. Bɛ lɛ nɛ, á piɛ̃ bɔ, mu lɛ ná a giala kɔ á gisĩ.

² Tán giulun mu yalan nə́ n lɛ tã, lon a mu dɔǹɔn dɔn nə́ n lɛ tã. La nə́ n lɛ kũ a die wa.

³ Mu lɛ na á goã piɛ̃ boɛboɛ. Bɔ̀n da ǹ mu gole lɛ a daa lɛawaa paabiɛ ka posooro (150), mu lɛ gisĩ.

⁴ Mui sɔbaabaa ǹ wɔ a lɛawaa fulusɔbaabaa ǹ wɔ pinaa, goo lɛ golee Araraa kele goon la.

⁵ Mu lɛ goã piɛ̃ miɛ̃, yǎa mui fùbaa ǹ wɔ a lɛawaa fulugoonbaa ǹ wɔ pinaa, kelen mìi tɔ́n soo kanaa.

⁶ A bɛ́ á dɔ lɛawaa pusi, Nowee goã á sìã mɛn bɔ goo lɛ ganaa, á bɛ lɛ bũ,

⁷ á zankoo da. Bɛ yoo, á goã woe bɛ̀ a daa, yǎa mu lɛ piɛ̃ á tán kooro daa.

⁸ A bɛ́ n yii diɛ zankoo la foɛ̃, á tɔ́n zɛrɛkantoan goon da, á n giɛ a ganaa bɛ̀ mu lɛ piɛ̃ á n bɔ tán.

⁹ Sɛnɛ, zɛrɛkantoan lɛ bǎã yɛ á mɛ tán a-n wa, a giala, mu goã tán bǎã tumaa nɛ. Bɛ lɛ nɛ, á wusoo á n bɔyaa á daa Nowee li goo lɛ nɛ. Nowee dɔ nə́ n gɔn dia á kũ á da goo lɛ nɛ.

¹⁰ Á wusoo á n yii da lɛawaa sɔbaa bɛ kio doo, á zɛrɛkantoan lɛ bɔ goo lɛ nɛ á da.

¹¹ Wasamiɛ̃n lɛn li, á n bɔyaa á daa Nowee li, ka *olivie da luu bɔlɔn nɛ a lɛ-a. Nowee tɔ́n dɔ̃ ka bɛ nɛ, mà mu lɛ kiɛɛrɛ kɔ tán.

¹² Á wusoo á n yii da lɛawaa sɔbaa bɛ kio doo, á zɛrɛkantoan lɛ da. A wusoo á n bɔyaa á daa a li bɛ kio doo wa.

¹³ Nowee lɛ̀ biɛsɔrɔ ka goonbaa ǹ wɔ (601) a mui bibinaa a lɛawaa bibinaa pinaa, mu lɛ piɛ̃ á tán kooro daa. Nowee goo lɛ a lɛpii bɔ á bɔ lɛ, á yɛ bɛa biikoo li, mà tán gɔ́ɔ̃ kooro ne.

¹⁴ Mui paabaa ǹ wɔ a lɛawaa fuəwensɔbaabaa ǹ wɔ pinaa, tán laa duduu.

¹⁵ Lawa tɔ́n pɛ Nowee ne kɛnɛn:

¹⁶ «Soo n nə n bɔ goo lɛ nɛ, n din laanka n lɔ nɛ, ka n nɛnyaanan laanka n manaan nɛ.

¹⁷ Màn yiikoonaa mɛn tumaa bɛ́ kunun n ni, a dadaran nɛ ka a bɔnboɛɛnɛn nɛ, ka bàanan nɛ, ǹ waa, ǹ soo kunun n ni, ǹ nə n da wɔlɔ la, ǹ nɛn yɛ, ǹ mɔnaa tán la.»

¹⁸ Nowee soo á n bɔ goo lɛ nɛ, kun ka a nɛnyaanan nɛ, ka a lɔ laanka ǹ manaan nɛ.

¹⁹ Siĩ gòã siinaa tumaa soo á n bɔ goo lɛ nɛ, ka bàanan tumaa nɛ, ǹ tumaa soo tɔrɔ tɔrɔ.

²⁰ Bɛ kio, Nowee *wúlu bɔ ǹ bǎã dɔ Dɛnaa wɔ lɛa. Màn gòã siinaa mɛn tumaa laanka bàan mɛn tumaa siĩ bɛ́ n soɛ̃, á gogoon bɔ bɛn tɔrɔn tumaa bii, á ǹ kɔ Lawa la *wúlu màn lɛa, á ǹ siĩ tumaa tã wúlu bɔ ǹ bǎã lɛ nɛ.

²¹ Dɛnaa bɛa wúlu màn gìĩ kɔ́ɔ̃n lɛ ma, á tɔ́n pɛ a din gɔ́ɔ̃ nɛ kɛnɛn: «Ma a re lɛn pipiã bíi tán li doo duduu, minbuiin nɛ a zɛnaa ǹ sii taman yii wa. Minbuiin nɛ n yui tán ka sii baraa zɛnaa nɛ a foo-n sɛn, sɛnɛ, ma a re dɔlɔ boe màn yiikoonaa tumaa ganaa doo duduu, ka ma bɛ́ má zɛnaa lɔn wa.

²² Bɛ̀ kanaa kɛ tan biikoo woo biikoo, màn tɔrɔ diɛ laanka a kurii ba re sàabiɛ wa. Nɛn á bɔ laanka sɛ̀fuu á bɔ á re sàabiɛ wa. Taã á waa laanka bɔ̀nɔn á kɔ á re sàabiɛ wa. Lɛ̀ á waa laanka tèlò á kɔ á re sàabiɛ wa.»