Siin Giala 49 - LAWA A BOO SONBORE

Zakɔba barka mɛn da a nɛgiĩ fulupaa ganaa

¹ Zakɔba ná a nɛgiĩn lɛn bíi, á pɛ ǹ nɛ: «Ka n lɛ sɔkɔn, màn mɛn bɛ́ toɛ, sii mɛn bɛ́ re ka yii biɛ̃, ma bɛ pɛ ka nɛ:

² Zakɔba a nɛnyaanan lɛn, ka n lɛ sɔkɔn ka n too kɔ, ka n too kɔ ka di Izirayeli lon.

³ Urubɛn, nsɛ lɛ n maa nɛ bibinaa lɛa. Nsɛ lɛ n maa giĩbaa ǹ nɛ bibinaa lɛa, bɛ̀ pàã bɛ́ ma lon ǹ mɛn waáraa. Barka tá n lon, pàã tá n lon, á la ǹ dɔɔ̃nɔn kɛn wɔ nɛ.

⁴ Tà mu bɛ́ n lɔlɛkɔn lɔn, n dɔ n sii lɔlɛkɔn miɛ̃. Bɛ lɛ n ke, n ba re nyɛɛnaandɛnaabaa yii wa. A giala, ń ma yii puusə kɔ, ń giã kun ka maa lɔ nɛ, ma din a waa ǹ pìi la.

⁵ Simiɔn laanka Levii n dan nɛn lɛa, manə n lɛ kiɛ kun, bɛ̀ ǹ kakaarɛbaa ǹ siin zɛnaa.

⁶ Ǹ bɛ́ n duri, bɛ̀ ǹ kɔn yɛ boo mɛn ganaa, ma ba li ma wo a bǎã-n wa, ma ba li ma wo ǹ kɔn yɛ ǹ bǎã-n wa. A giala, ǹ foo bɛ́ á yoo, ǹ nə́ minin dɛ, ǹ bɛ́ mà maǹ là kiɛ sii ganaa, ǹ nə́ diin dɛdɛ kooro.

⁷ Ǹ foo golebaa lɛ, ǹ tá re a koen goɛ. A giala, ǹ tá kakaarɛ á la yii ni. Ǹ sii zɛnaa a là diɛ kɛ lɛ, ǹ tá re a koen goɛ, a giala, mà makara ba ǹ lon wa. Ma á re ǹ tɔrɔn niniɛ, ma ǹ bɔ kɔn Izirayeli gána nɛ. Ma á re ǹ sasawɛɛ, ma ǹ bɔ kɔn gána lɛ gɔ́ɔ̃ nɛ.

⁸ Nsɛ Zudaa, n dɔɔ̃nɔn man die loe loe, ǹ nə n tɔ bɔ nɛ. N tá re n zɔ́ɔn nyɛnɛɛ, n nə ǹ kaa ǹ dungiala la. N dinɛn tá re n musin koɛ tán n giulun.

⁹ Zudaa n kaka ka yàra ten bɛ́ lɔn. Maa nɛgiĩ n boe a siĩ kũ ǹ bǎã nɛ, die a waa ǹ bǎã ganaa. Á n musi yiɛ, á waa tán ka yàra sà bɛ́ lɔn. Kakaarɛ ka yàra nɛ ǹ dan bɛ́ lɔn, die n boe la a pɛ, mà a yoo?

¹⁰ Kiibaa n die goɛ̃ Zudaa a kion biikoo tumaa li. Kiibaa ǹ bàbàla n die goɛ̃ a tɔrɔn gɔn biikoo tumaa li, yǎa kiibaa ǹ bàbàla lɛ a dɛnaa die, tɔrɔ tumaa doamaa bɛ́ ǹ min mɛn bɔlɔ si.

¹¹ Á die a dundun doɛ *rezɛ̃ da ganaa. Á die a dundun nɛ doɛ rezɛ̃ da sonbore ganaa. Á die a mɔnaa pii yɔ li. Á die a dɔnkɛ gole pii rezɛ̃ mu tã li.

¹² A yii nànan nə́ tataã, á la yɔ yii ni. A sɔn nə́ fufu kɔ, ǹ nə́ la bɔ̀nyaa nɛ.

¹³ Zabulɔn tá re giɛ̃ kɔ̀ mu lɛ-a. Mu la ǹ goo dadaran bɛ́ re golee kɔ̀ mɛn lɛ-a. A giã ǹ bǎã á die golee koe, a dɔ Sidɔn kiwi ganaa.

¹⁴ Isakaara n ka dundun kaka bɛ́ lɔn, waa-n tán tɔɔn kion.

¹⁵ Á yɛ mà asɛ a susu ǹ bǎã lɛ á siĩni. Á yɛ mà gána lɛ á kɔɔ̃nɛ. Á n nyàan gisĩ, guĩ saa taman yii, á n din kɔ bɛ̀rɛbaa ǹ dí la.

¹⁶ Dan tá re kiri kuri a minin la. Izirayeli gána nɛ, á re kiri kuri a minin la.

¹⁷ Dan nə die goɛ̃ ka miɛ̃ bɛ́ lɔn zii la, ka kɔrɔkan bɛ́ lɔn zii boɛɛn la. Á die sùi yawɛɛ a toro ganaa, sùidɛnaa lɛ á die boe a n làfu kɔ tán.

¹⁸ E Dɛnaa, ma nə n yii diɛ, máa n din ma kirisibaa!

¹⁹ Nsɛ Gaadi, zia nɛn tá re die koe n lɛ. Sɛnɛ, n tá re n tiɛ̃ n kɔ ǹ lɛ, n nə ǹ loo.

²⁰ Màn-bii gigiã á re yii Asɛɛrɛ a gána nɛ, kiin màn-bii á re yii Asɛɛrɛ a gána nɛ.

²¹ Nɛfutalii n ka tiã bɛ́ lɔn, baa sii a din gɔn wìi a lɛa, a n ka tiã bɛ́ lɔn, nɛ sonboren yii.

²² Zozɛfu a sii n kɔnboe ka da gùrù mɛn bɛ́ nɛ koe, ka da mɛn bɛ́ mu yala lɛ-a, a gùrù n nɛ koe. A gùrùn nə́ yoo, ǹ nə́ kaa kisilɛ lalan lon.

²³ Ǹ nə́ ga a lɛ li, ǹ nə́ zia baa a ganaa, kiɛ-bɔlen nə́ zia baa a ganaa.

²⁴ Sɛnɛ, a dɔ ná a sa kũ kaka. Á n gɔn wìi kaka kɔ a ganaa, ka Zakɔba a Lawa Kaka kɛ pàã nɛ. A din lɛ n Izirayeli tamaɛ ka tɔɔn-lɛduə̃li bɛ́ a tɔɔn tamaɛ lɔn. A foo n doa-n a din lɛ ganaa, a giala, a n kaka ka kɔlɔ nɛ.

²⁵ N di a Lawa á re n doe n lɛ, Pàãyiidɛnaa Lawa á re barka diɛ n ganaa. Á die a la mu gisĩ n la, a die a tán giulun mu kɔ n la, a die a nɛnyaanan laanka tɔɔn kɔ n la.

²⁶ Là mɛn bɛ́ boe lɛlɛ a kelen kɛn nɛ, màn mɛn bɛ́ yii tenten zizin kɛn la, masɛ bɛ́ barka mɛn diɛ n ganaa, á la bɛ nɛ. Nsɛ Zozɛfu mɛn bɛ́ maa nɛgiĩ lɛa, nsɛ mɛn bɛ́ ǹ dɔɔ̃nɔn mìi la, bɛa barka lɛ n koe n kio lɛ miɛ̃.

²⁷ Bɛnzamɛn n die kakaarɛ koe ka don gin bɛ́ lɔn. Baayɛlɛ, a n siĩ soɛ̃, wasamiɛ̃nɛ, a n bɔ zia la ǹ mànan gii.»

²⁸ Izirayeli tɔrɔn lɛn man fulupaa. Ǹ di bɛ́ á boo mɛn da, á barka da ǹ ganaa, bɛ lɛ n ka kɛ nɛ, didie laanka a wɔ nɛ.

Zakɔba a gɛ̀

²⁹ Bɛ kio, Zakɔba nə́ n gɔn waa a nɛnyaanan lɛn nɛ, á pɛ ǹ nɛ: «Bɛ̀ ma gã, ka ma gere bĩ ma digolon gere bĩ ǹ bǎã nɛ, kele kolo yala-n, Ɛti tɔrɔ Efrɔn a wuru-n.

³⁰ Kele kolo yala mɛn bɛ́ Makpelaa, dia-n kɔn la ka Manbre ne, Kanaan gána nɛ. Abrahamu na á bɛa wuru lɛ pii Ɛti tɔrɔ Efrɔn lon, á baa a geren bĩ ǹ bǎã lɛa.

³¹ Maǹ nə́ Abrahamu laanka a lɔ Saaraa gere bĩ walan, ka Izaaki laanka a lɔ Rebeka nɛ. Ma dinmaa dɔ-n má Leyaa gere bĩ walan.

³² Wuru lɛ laanka kele kolo yala mɛn bɛ́ bǎã lɛ nɛ, bɛn man nə́ n pii Ɛti tɔrɔn lon.»

³³ Zakɔba bɛ́ á n gɔn waa a nɛnyaanan lɛn nɛ, á nya, á n gòãn zɛnaa, á waa tán a piì la, a fɔfoã kuru, á n ti ǹ digolon ganaa.