Siin Giala 48 - LAWA A BOO SONBORE

Zakɔba barka mɛn da Zozɛfu a nɛnyaanan ganaa

¹ Bɛa siin lɛn kio, ǹ nə́ daa pɛ Zozɛfu ni, mà ǹ di lɛ a lon wa. Zozɛfu ná a nɛgiĩ min paa lɛ kũ, Manaasee laanka Efrayimu ni, ǹ nə́ woo kun.

² Ǹ bɛ́ ǹ nə́ pɛ Zakɔba nɛ, mà a nɛgiĩ Zozɛfu lɛ n die n yii koe a ganaa, á n doa á yoo, á giã a piì la.

³ Zakɔba tɔ́n pɛ Zozɛfu ni: – Lawa Pàãyiidɛnaa nə́ n din nyaa ma nɛ Luuzu kiwi, Kanaan gána nɛ, á barka da ma ganaa.

⁴ Á pɛ ma-n kɛnɛn: «Ma á re n buluboe, ma n nɛnyaanan mɔnaa, ma n baa tɔrɔ gigiã lɛa. Ma á re gána kɛ lɛ koe n tɔrɔn la, a ǹ wɔ baa duuduu.

⁵ Sisia, nɛgiĩ min paa ke, ǹ nə́ yɛ Ezipti gána nɛ, bɛ̀ masɛ bɛ́ ma tɔn da n li wa, ma din wɔn man ka bɛn nɛ. Efrayimu laanka Manaasee n die masɛ wɔn biɛ, ka Urubɛn laanka Simiɔn bɛ́ maa wɔn lɛa lɔn.

⁶ Sɛnɛ, n bɛ́ re nɛnyaanan mɛnɛn yii bɛn kio, n din wɔn man ka bɛn nɛ. Ǹ tá re bɛn bíi, ǹ nə ǹ kíɛ̃ gii kɔ ǹ la, kun ka ǹ golon ne.

⁷ Ma bɛ́ boe Mezopotamii gána-n die ǹ mɛn waáraa, n dan Raseli gã ma ganaa zii la, Kanaan gána nɛ, bɛ̀ ma bɛ́ má diri Efrataa kiwi la foɛɛ̃nɛ. Má a gere bĩ Efrataa zii la walan.» A din Efrataa lɛ nɛ, ǹ tá bíi Bɛtlehɛmu pelo.

⁸ Zakɔba bɛ́ á Zozɛfu a nɛnyaanan lɛn yɛ, á nɔ̀n da: «Dien man kɛn nɛ?»

⁹ Zozɛfu nə́ ǹ di lɛ lɛ si: «Lawa nɛnyaanan mɛnɛn kɔ ma la, Ezipti gána-n kànaa, bɛn lɛn manɛ.» Á tɔ́n pɛ Zozɛfu ni: «Ǹ kũ, n nə ǹ mɔrɔ ma ganaa, ma barka da ǹ ganaa.»

¹⁰ Zakɔba zizi kɔ, a yii din ba boe la, á wɔlɔ yii doo wa. Zozɛfu bɛ́ á woo ka nɛnyaanan lɛn nɛ a li, á ǹ kũ á n sɔɔ ǹ nɛ.

¹¹ Bɛ kio, á pɛ Zozɛfu ni: «A na á goã ma gɔ́ɔ̃ nɛ, máa maa die n yii doo wa. Sɛnɛ, Lawa bɛ́ á toa ma n yɛ, má n nɛnyaanan dinin yɛ ma yii ni!»

¹² Zozɛfu nə́ ǹ kũ, á ǹ bɔ ǹ di lɛ gòã la, a din kaa tán a giulun.

¹³ Bɛ kio, a ná a nɛgiĩ min paa lɛ kũ ǹ gɔn ganaa. Á Efrayimu kũ a gusin, bɛ goã Zakɔba gɔsɛ, á Manaasee kũ a gɔsɛ, bɛ goã Zakɔba gusin. Á ǹ kũ á ǹ mɔrɔ ǹ di gole lɛ ganaa.

¹⁴ Zakɔba ná a gusin a gɔn saa, á da Efrayimu mìi ni, a din lɛ dɔ n kiɛɛrɛ, á n gɔsɛ a gɔn da ǹ gologiĩ Manaasee mìi ni. A na á n gɔnɔn lonlankɔ á zɛnaa miɛ̃, bɛ bie wa, Manaasee lɛ n gole.

¹⁵ Á barka da Zozɛfu ganaa, á pɛ: Ma di gole Abrahamu laanka ma di Izaaki tɔ wɔ Lawa yɔrɔ-a, Lawa mɛn bɛ́ giɛ ma walan, yǎa á daa á dɔ pelo ganaa,

¹⁶ Lon a dia dí-a wole mɛn bɛ́, á ma kirisibaa sii baraa tumaa ganaa, a din die a barka da nɛgininin kɛn ganaa. Lawa toa ma tɔ nə n bíi ka ǹsɛn lɛn barka nɛ, ka ma di gole Abrahamu laanka ma di Izaaki wɔ bɛ́ n bíi lɔn. Lawa die a n tɔrɔ mɔnaa gána lɛ nɛ.

¹⁷ Zozɛfu bɛ́ á yɛ, mà ǹ di nə́ n gusin a gɔn da Efrayimu mìi ni, bɛ kɔɔ̃n kɔ a ganaa wa. Á n di lɛ gɔn kũ á bɔ Efrayimu mìi ni, mà a n diɛ Manaasee mìi ni.

¹⁸ Á pɛ ǹ di lɛ-n kɛnɛn: «Díi, a bie miɛ̃ wa, a giala, kɛ lɛ n gole, n gusin a gɔn da bɛ lɛ mìi ni.»

¹⁹ Sɛnɛ, ǹ di lɛ nə́ n piã, á pɛ nɛ: «Maa nɛgiĩ, ma á doɛ̃. Manaasee dɔ tɔrɔn tá re mɔnɛɛ, a tɔ á re gole koe. Sɛnɛ, ǹ diɛ̃ lɛ tɔ á re gole koe, a la a wɔ nɛ, a tɔrɔn dɔn tá re mɔnɛɛ, ǹ la a wɔn manɛ.»

²⁰ Bɛa pinaa lɛ nɛ, á barka da ǹ ganaa, bɛ̀ á pii: – Izirayeli nɛnyaanan tá re lɛn bǐɛ̃ bíi kɔn li, ka ǹ dinin lɛn tɔ nɛ, bɛ̀ ǹ pɛ kɛnɛn: «Lawa die a n dɔ n lɛ, ka a bɛ́ á n dɔ Efrayimu laanka Manaasee lɛ lɔn!» Zakɔba Efrayimu da Manaasee nyɛɛn ka bɛa yɔrɔ lɛ nɛ.

²¹ Bɛ kio, Zakɔba pɛ Zozɛfu ni: «Ma á re giɛ̃, sɛnɛ, Lawa á re goɛ̃ kun ka nɛ, á re toɛ, ka wusoo ka da ka digolon gána nɛ.

²² Man die Sisɛmu kiwi kɛ koe n la, n da n bǎã gii li, n wɔ la n dɔɔ̃nɔn lɛn wɔ nɛ. Man má zia baa Amɔɔrɔ tɔrɔn ganaa, ka gɔya sa laanka sa nɛ, má bɛa bǎã lɛ si ǹ la ka pàã nɛ.»