Siin Giala 40 - LAWA A BOO SONBORE

¹ Bɛa siin lɛn kiɛ̃ kio, Eziptin kii lɛ a dí-nyali min paa ná a zɛ̀rɛ saa ǹ kɔn pinaa: A yɔ kɔmala wolen goledɛnaa laanka a buuru-dalin goledɛnaa nɛ.

² Kii *Faarahɔn lɛ foo yoo ǹ li parsiini.

³ A sɔmɔ-lɛduə̃li bɛ́ kòso kion mɛn mìi la, á ǹ kũ á ǹ kaa bɛ nɛ, Zozɛfu bɛ́ kòso-n bǎã mɛn lɛ din ni.

⁴ Kii a sɔmɔ-lɛduə̃li goledɛnaa lɛ Zozɛfu kɔ ǹ la, ǹ dí-nyali lɛa. Ǹ nə́ biikoo kɔ́n zɛnaa kòso-n walan.

Zozɛfu n kòso nɛn narɛɛ giala pii

⁵ Ǹ kɔn pinaa tèlò-n, kii a yɔ kɔmala wolen goledɛnaa laanka a buuru-dalin goledɛnaa nə́ n narɛ, kòso kion lɛ nɛ. Didie ná a narɛɛ wɔ, didie wɔ laanka a giala nɛ.

⁶ A lɛawaa baayɛlɛ, Zozɛfu woo bɔ ǹ li, á woo ǹ yaa tán, ǹ yɔrɔ kɔsiɛmaa nɛ.

⁷ Á tɔ́n nɔ̀n da ǹ la mà wàa na á baa, ǹ yɔrɔ á kɔsiɛ-n pelo kɛnɛn?

⁸ Ǹ nə́ tɔ́n pɛ-n kɛnɛn: «Wɔ ǹ wɔ́ n narɛ, min kɔ́n dɔ banban, a n boe la, a tá wɔa narɛɛn lɛn giala pii wɔ-n wa.» Zozɛfu tɔ́n pɛ ǹ nɛ: «Lawa á boe la, a na a giala pɛ ka nɛ. Ka n narɛ ka sii mɛn nɛ, ka pɛ ma nɛ.»

⁹ Yɔ kɔ kii la wolen goledɛnaa narɛɛ mɛn wɔ, bɛ ná a wɔ saa, á pɛ Zozɛfu ni: «Man má n narɛ ka *rezɛ̃ da-n ma yɔrɔ-a,

¹⁰ a gùrù n màn sɔɔ. Á luu pã á buũ kɔ, á nɛ kɔ a nɛ ma.

¹¹ Faarahɔn a mu mi ǹ paan na á goã masɛ gɔn. Má rezɛ̃ da lɛ a nɛ mərə lɛ na, má a mu bɔɔ̃ Faarahɔn a paan lɛ nɛ, má saa má kɔ la.»

¹² Zozɛfu mà a ganaa, mà a narɛɛ lɛ giala á ke: «Da gùrù màn sɔɔ lɛ n lɛawaa sɔɔ lɛa.

¹³ Lɛawaa sɔɔ kɛ kio, Faarahɔn á die wusii, a bǐɛ̃ kɔ n ganaa. Á die wusii a n saa a n da n dí ni, bɛ̀ n Faarahɔn lɛ a mu mi ǹ paan kɔ la, ka n bɛ́ ń goã zɛnɛɛ lɛlɛ lɔn.

¹⁴ Sɛnɛ, bɛ̀ n wɔ bǐɛ̃ kɔ ǹ mɛn waáraa, n yiri baran bɔ ka masɛ dɔ-n wa. Bǐɛ̃ kɔ n masɛ dɔ boo da Faarahɔn lɛ nɛ, a ma bɔ, kion kɛ nɛ.

¹⁵ Maǹ nə́ masɛ koã *Ebrəə gána nɛ, ǹ nə́ daa ka ma-n kànaa. Haalɛ kànaa lɛ dɔ din ni, ma sii kɔ́n zɛnaa, da kòso ne ǹ sii lɛa wa.»

¹⁶ Buuru-dalin goledɛnaa lɛ yɛ, mà Zozɛfu nə́ ǹ miã lɛ a narɛɛ lɛ giala pɛ doɛ̃ sɔnbɔraanɛ. A dɔ mà Zozɛfu ganaa: «Ma dɔ ǹ má n narɛ, ka tiɛrɛɛn màn sɔɔ n ma mìi ni, buuru nə́ ǹ gɔ́ɔ̃ nɛ.

¹⁷ Tiɛrɛɛn lɛ a mɛn bɛ́ lon, Faarahɔn lɛ foo dùũ buuru tɔrɔ tumaa na á goã bɛ gɔ́ɔ̃ nɛ, bàanan nə́ goã die mui ma mìi ni.»

¹⁸ Zozɛfu tɔ́n pɛ nɛ: «N narɛɛ lɛ giala n ka kɛ nɛ: Tiɛrɛɛn sɔɔ kɛ n lɛawaa sɔɔ lɛa.

¹⁹ Lɛawaa sɔɔ kɛ kio, Faarahɔn lɛ á die n mìi kuri, a bɔ a ganaa, a nə n dinmaa lɔɔ da ganaa, lon bàanan nə da n siĩ mui.»

²⁰ A lɛawaa sɔɔbaa ǹ wɔ na á n baa Faarahɔn lɛ a yɛ ǹ zɔ́n zɛnaa pinaa lɛa. Á màn-bii gigiã zɛnaa, á kɔ a pàãdɛnan tumaa la. Bɛ lɛ a pinaa, á yɔ kɔ kii la wolen goledɛnaa lɛ laanka buuru-dalin goledɛnaa lɛ waa, á soo ǹ ne ǹ tumaa yɔrɔ-a.

²¹ Á wusoo á yɔ kɔ kii la wolen goledɛnaa saa, á da a di lɛ la, bɛ goã a mi ǹ mànan paan we a gɔn.

²² Sɛnɛ, á buuru-dalin goledɛnaa lɛ sɛ lɔɔ lon da ganaa. Zozɛfu narɛɛn lɛn giala pɛ lɔn, a na á n zɛnaa miɛ̃.

²³ Sɛnɛ, yɔ kɔ kii la wolen goledɛnaa lɛ Zozɛfu boo da doo wa, a yiri bɔ nɛ.