Siin Giala 39 - LAWA A BOO SONBORE

Zozɛfu a tá Potifaara li

¹ Isimayeli tɔrɔn mɛnɛn nə wo ka Zozɛfu lɛ-n Ezipti, bɛn nə́ sã Eziptin giĩ goon la, a tɔ n Potifaara. A n Eziptin kii *Faarahɔn a sɔmɔ-lɛduə̃li gole lɛa, pàãdɛnaa gole kɔ́n nɛ.

² Dɛnaa Lawa goã kun ka Zozɛfu ni, a nya ǹ dí tumaa siĩn kɔ. Zozɛfu giã a dɛnaagiĩ lɛ a kion.

³ Bɛ́ yɛ mà Dɛnaa tá kun ni, a bɛ́ dí mɛn tumaa nyɛɛ, a nà a tumaa bǐɛ̃ koe a gɔn.

⁴ Zozɛfu sii kɔɔ̃n kɔ Potifaara ganaa parsiini, a din nɔmaa á saa a dí-nyali lɛa. Á saa á da a kion, á koa a gɔn mànan tumaa mìi la.

⁵ A bɛ́ á Zozɛfu saa á da a kion, á koa a mànan tumaa mìi la lɔn, Dɛnaa barka da Eziptin giĩ lɛ a kion ganaa, Zozɛfu taman yii. Bɛa barka damaa lɛ a zín dɔ a gɔn mànan tumaa ganaa, a kion gɔ́ɔ̃ wɔn nɛ, ka a wuru gɔ́ɔ̃ wɔn nɛ.

⁶ Bɛ lɛ na á toa, Potifaara ná a gɔn màn tumaa toa Zozɛfu gɔn, mà a ga ǹ walan, a dinmaa nə́ n goɛ̃ bɔ sii din tumaa nɛ, bɛ̀ á n bɔ a màn-bii sii dinsɔɔ̃ nɛ. Zozɛfu na á goã tɔntɔraa lɛa, siĩn sɔnbɔraanɛ.

Zozɛfu laanka a dɛnaagiĩ a lɔ

⁷ Biikoo kɔ́n dɔ, a dɛnaagiĩ a lɔ nə́ n yiin doa la, á pɛ nɛ mà a giã kun ka asɛ nɛ.

⁸ Sɛnɛ, Zozɛfu nə́ n piã, á pɛ a dɛnaagiĩ a lɔ lɛ-n kɛnɛn: «Ma bɛ́ maa dɛnaagiĩ kɛ li ke, a na á waa ma la, á n goɛ̃ bɔ a kion sii din tumaa nɛ, a na á ma koa a gɔn mànan tumaa mìi la.

⁹ N ba gole masɛ-n kion kɛ lɛ din gɔ́ɔ̃-n wa. A ma kurəə sii kɔ́n ganaa wa, bɛ̀ á n bɔ n din kɛ lɛ nɛ, a lɔ lɛa. Ma n boe la, ma bɛa sii bɔnɛɛ kɛ zɛnaa lɔn, ma wɔ Lawa lon?»

¹⁰ Á goã Zozɛfu gialaa miɛ̃ baraabaraa, mà a waa kun ka asɛ nɛ, a ga asɛ li, sɛnɛ, Zozɛfu goã n too koe a lon wa.

¹¹ Ǹ kɔn pinaa, Zozɛfu wɔ kion, mà a na a dí nyɛɛ, bɛ á zɛnɛɛ, bɛ̀ min kɔ́n ba kion wa.

¹² Potifaara a lɔ lɛ kũ a dɔnkɛ ganaa, á pɛ nɛ: «Giã kun ka ma-n dɛ!» Zozɛfu ná a dɔnkɛ sɔlɔ á toa a gɔn, á baa si á soo kanaa.

¹³ Lɔ lɛ bɛ́ á yɛ, mà á baa si á soo kanaa, a ná a dɔnkɛ toa asɛ gɔn,

¹⁴ a ná a kion dí-nyalin bíi, á pɛ ǹ nɛ: «Ka ga dɛ! Ma zuũ da ka *Ebrəən giĩ mɛn nɛ, a n giɛ li, mà a sàn kɔ ka wɔsɛn nɛ! A na á daa, mà a n die giɛ̃ kun ka masɛ-n ke, sɛnɛ, má n lɛ dɛ kɔsɛkɔsɛ.

¹⁵ Bɛ lɛ nɛ, a bɛ́ á maa lɛ dɛ ma lɔn gɔrɔ, a ná a dɔnkɛ toa tán ma li, á baa si á soo kanaa.»

¹⁶ Á Zozɛfu a dɔnkɛ lɛ koa a din li miɛ̃, yǎa ǹ zuũ Potifaara nə́ n bɔyaa, á daa piɛ.

¹⁷ A din boo goon lɛ nɛ á pɛ ǹ zuũ dɔ nɛ: «N da bɛ̀rɛgiĩ mɛn kɔ wɔsɛn la á n Ebrəə min lɛa, bɛ lɛ na á daa masɛ li, mà a n die sàn koe ka ma nɛ.

¹⁸ Ma bɛ́ má n lɛ dɛ, má minin bíi lɔn gɔrɔ, a ná a dɔnkɛ toa tán ma li, á baa si á soo kanaa.»

¹⁹ A dɛnaagiĩ lɛ bɛ́, a ná a lɔ lɛ a da ǹ boo ma, mà Zozɛfu na á bɛ miã zɛnaa nɛ, a foo yoo parsiini.

²⁰ Á Zozɛfu kũ á da kòso-n, kii a kòso nɛn kaa ǹ bǎã nɛ. Zozɛfu bɛ́ kòso-n, Dɛnaa goã kun ni.

Zozɛfu a tá kòso-n boo

²¹ Lawa bǐɛ̃ zɛnaa nɛ, a ná a sii kɔɔ̃n kɔ kòso kion-lɛduə̃li ganaa.

²² Bɛa kòso kion-lɛduə̃li lɛ kòso nɛ gialakunun kɛn tumaa sii toa Zozɛfu gɔn. Kòso nɛn lɛn bɛ́ dí mɛn tumaa nyɛɛ walan, Zozɛfu din nə ǹ kiɛ a ganaa.

²³ Kòso kion-lɛduə̃li lɛ dí mɛn toa Zozɛfu gɔn, a din goã giɛ ǹ kɔn walan doo wa, a giala, mà Dɛnaa goã kun Zozɛfu ni. A bɛ́ á goã dí woo dí nyɛɛ, Dɛnaa goã a tumaa bǐɛ̃ koe a gɔn.