Siin Giala 34 - LAWA A BOO SONBORE

Diinaa a gɛ̀ dòo bɔ

¹ Leyaa nɛlɔ mɛn yɛ Zakɔba la, a tɔ n Diinaa, bɛ soo ǹ kɔn pinaa, mà a n woe boe gána lɛ a nɛlɔn li.

² Bɛ á zɛnɛɛ, bɛ̀ Amɔɔrɔ a nɛgiĩ Sisɛmu n Ivii tɔrɔn kii lɛa. A bɛ́ á Diinaa yɛ, á kũ á ga li.

³ Diinaa sii kɔɔ̃n kɔ Sisɛmu ganaa parsiini. Á nɛnɛn lɛ narɛ, á bebele yǎa a gɔn dɔ a ganaa.

⁴ Sisɛmu tɔ́n pɛ ǹ di Amɔɔrɔ-n bɛ kio mà a ga nɛ lɛ li, a kɔ asɛ la lɔ lɛa.

⁵ Zakɔba ma, mà Sisɛmu ná a nɛlɔ Diinaa ziziɛ̃. Sɛnɛ, a nɛgiĩn lɛn bɛ́ don ka a tɔɔn lɛn nɛ, á n lɛ tã yǎa ǹ nə́ daa piɛ.

⁶ Sisɛmu ǹ di Amɔɔrɔ soo, mà a n woe boo diɛ ka Zakɔba nɛ.

⁷ Zakɔba a nɛgiĩn bɛ́ boe don die piɛ, ǹ nə́ boo lɛ ma. Ǹ bɛ́ ǹ nə́ boo lɛ ma lɔn, ǹ nə́ yɛ mà á n yii wɔ ǹsɛn la, ǹ foo yoo parsiini. A giala, Sisɛmu bɛ́ á Zakɔba a nɛlɔ lɛ kũ á ga li, bɛ n sìi sii lɛa, á zɛnaa Izirayeli gána nɛ. Min doamaa bie a bɛ miã zɛnaa wa.

⁸ Amɔɔrɔ pɛ ǹ nɛ: «Kaa nɛlɔ lɛ sii tá masɛ a nɛgiĩ Sisɛmu ganaa parsiini. Ka bǐɛ̃ kɔ, ka kɔ la lɔ lɛa.

⁹ Ka kaa kun ka wɔ nɛ. Ka kaa nɛlɔn kɔ wɔ la lɔn lɛa, ka dɔn nə wɔa wɔn wɔ lɔn lɛa.

¹⁰ Bɛ̀ ka n lɛ kɔ bɛ ganaa, ka á re boe la, ka giã kun ka wɔ nɛ, gána lɛ nɛ. Gána lɛ á die ka dɔn wɔ biɛ. Bɛ̀ bǎã mɛn kɔɔ̃n kɔ ka ganaa, ka giã walan, ka pii kɔ ka dinin foo yii li, ka màn yɛ.»

¹¹ Sisɛmu dinmaa woo pɛ nɛnɛn lɛ di laanka ǹ miãgiĩn manɛ: «Ka bǐɛ̃ kɔ ka Diinaa kɔ masɛ la. Ka bɛ́ giɛ màn mɛn li, ka bɛ pɛ, ma saraa.

¹² Màn woo màn ka pɛ a gɔn si ǹ màn laanka a din gɔ ǹ màn lɛa, ta a n gole lɔn, ka pɛ, ma á sarɛɛ. Yǎa ka nɛnɛn lɛ kɔ masɛ la lɔ lɛa.»

¹³ Zakɔba a nɛgiĩn lɛn nə́ Sisɛmu laanka ǹ di Amɔɔrɔ lɛ si ka yiri woorobaa nɛ. A giala, Sisɛmu na á ǹ miãnɛn Diinaa ziziɛ̃.

¹⁴ Ǹ miãgiĩn lɛn nə́ pɛ ǹ nɛ kɛnɛn: «N bɛ́ boo mɛn diɛ, wɔsɛn ba boe la, wɔ lɛ kɔ bɛ ganaa, wɔ wɔ miãnɛn saa wɔ kɔ giĩ *soroma la wa. Bɛ̀ wɔ bɛ zɛnaa, wɔa sìi sii n ka bɛ nɛ.

¹⁵ Bɛ̀ ka á li wɔ lɛ kɔ, yǎa ka dɔn nə n biɛ ka wɔsɛn bɛ́ lɔn, ka kaa giĩn tumaa kuru.

¹⁶ Bɛ̀ ka lɛ kɔ bɛ ganaa, wɔ á re wɔa nɛlɔn koe ka la, wɔ dɔn tá re kaa wɔn goɛ lɔn lɛa, wɔ á re giɛ̃ kun ka nɛ, wɔ tumaa á die n biɛ tɔrɔ goon.

¹⁷ Sɛnɛ, bɛ̀ ka lɛ kɔ kurii lɛ ganaa wa, wɔ n wɔ miãnɛn sii wɔ woo.»

¹⁸ Ǹ boo lɛ kɔɔ̃n kɔ Amɔɔrɔ laanka a nɛgiĩ Sisɛmu ganaa.

¹⁹ Ǹ kurii boo mɛn da nɛginin lɛ nɛ, á n nanaa á bɛ zɛnaa, a giala, Zakɔba a nɛlɔ lɛ sii na á goã a ganaa parsiini. Sisɛmu din yii na á goã dɔraa nɛ, ǹ di a nɛnyaanan bii.

²⁰ Amɔɔrɔ laanka a nɛgiĩ Sisɛmu woo giã kiwi lɛ a kiɛnlɛ-a, lɛsɔkɔn bǎã nɛ, ǹ nə́ pɛ ǹ miã kiwi minin manɛ:

²¹ «Sii ba wɔsɛn laanka minin kɛn bii ni wa, ǹ tá boe la, ǹ giã wɔa gána nɛ, ǹ pii kɔ, ǹ dɔn nə n foo sii zɛnaa gána lɛ nɛ. Wɔ á boe la, wɔ ǹ nɛlɔn goa lɔn lɛa, ǹ dɔn tá boe la, ǹ wɔ dɔn wɔn goa lɔn lɛa.

²² Sɛnɛ, yǎa wɔa giĩn tumaa nə n kuri, ka ǹ dɔn wɔn bɛ́ n kuri lɔn, minin lɛn nə tɔn lɛ kɔ, ǹ giã kun ka wɔsɛn nɛ, ǹ nə n baa goon ka wɔ nɛ.

²³ Ǹ tɔɔn laanka ǹ gɔn mànan tumaa á die wɔa wɔn biɛ. Yǎa wɔ lɛ kɔ, ǹ giã kun wɔ nɛ.»

²⁴ Min mɛn tumaa bɛ́ soe, bɛ̀ ǹ da kiwi lɛ a lɛsɔkɔn bǎã nɛ, bɛn tumaa lɛ kɔ, Amɔɔrɔ laanka a nɛgiĩ Sisɛmu a boo lɛ ganaa. Kiwi lɛ a giĩn tumaa nə́ n kuru.

²⁵ A lɛawaa sɔɔbaa ǹ wɔ pinaa, bɛ̀ giĩn lɛn bɛ́ tɔn nɔmaa-n bɔrɔ, Zakɔba a nɛnyaan min paa, Simiɔn laanka Levii ni, Diinaa miãgiĩn manɛ, bɛn nə́ ǹ gɔya san goa, ǹ nə́ kaa kiwi gɔ́ɔ̃ nɛ, min ná a ba sii kɔ́n doɛ̃ ǹ gɔ̀nɔn-a wa, ǹ nə́ giĩn lɛn tumaa dɛ.

²⁶ Ǹ nə́ Amɔɔrɔ dɔ laanka a nɛgiĩ Sisɛmu dɛ. Ǹ nə́ Diinaa bɔ Sisɛmu a kion, ǹ nə́ soo ne.

²⁷ Zakɔba a nɛnyaanan gialakunun kɛn nə́ geren lɛn mànan waa, ǹ nə́ kiwi lɛ a mànan goa, a giala, maǹ nə́ ǹ miãnɛn ziziɛ̃.

²⁸ Ǹ sèren ne, ǹ bòen ne, ǹ diin laanka ǹ dundunun ni, ǹ màn mɛn tumaa bɛ́ kiwi gɔ́ɔ̃ nɛ, ǹ mɛn tumaa dɔ bɛ́ don, ǹ ná a tumaa loo ǹ nə́ woo ǹ ne.

²⁹ Ǹ nə́ ǹ gɔn mànan tumaa goa, ǹ nɛnyaanan tumaa laanka ǹ lɔn nɛ, ka ǹ kion gɔ́ɔ̃gɔ́ɔ̃ ǹ mànan tumaa nɛ.

³⁰ Bɛ gɔ́ɔ̃ nɛ, Zakɔba pɛ Simiɔn laanka Levii ni: «Ka bɔ̀n da masɛ ganaa, ka n ka ma tìĩ bɔ Kanaan gána lɛ laanka Perɛzi gána lɛ a minin nyin ni. Wɔ bɛ́ wɔ ba tɛ wa, ǹ tá re piɛ̃ ma ganaa, ǹ ma dɛ. Ǹ tá re ma laanka maa kion minin bɔ̀n biɛ.»

³¹ Diinaa golon lɛn nə́ tɔ́n pɛ nɛ: «Wɔ toa, minin nə wɔ miãnɛn lɛ a lɔ kɔrɔn kuĩ wɔ?»