Siin Giala 27 - LAWA A BOO SONBORE

Zakɔba a Ezawu kio koã boo

¹ Izaaki zizi kɔ, a yiin nə́ tutuu kɔ, ǹ ba wɔlɔ yii doo wa. A ná a nɛgiĩ goledɛnaa Ezawu bíi á pɛ nɛ: «Ezawu!» Ezawu ná a lɛ si: «Ma á ke.»

² Izaaki pɛ nɛ: «N yii bɛ́ a ganaa masɛ zizi kɔ, ma ba maa gɛ̀ pinaa doɛ̃ wa.

³ Biikoo dɔ, n kòã laanka n sa saa, n wo n bibiə̃ don, n siĩ dɛ n da kɔ ma la.

⁴ Màn-bii mɛn bɛ́ kɔɔ̃n ma ganaa, n bɛ zɛnaa n da kɔ ma la, ma bii. Ma dinmaa lɛn bǐɛ̃ bíi n li, ma tɔn gã.»

⁵ Izaaki bɛ́ boo diɛ Ezawu ni, Rebeka na á goã n too koe. Ezawu sɛ́ woo don, mà a n woe don biɛ, a siĩ dɛ a da nɛ.

⁶ A bɛ́ don, Rebeka pɛ a nɛgiĩ Zakɔba-n kɛnɛn: – Á ke, má n di lɛ lɛ ma, boo diɛ ka ǹ dɔɔ̃ngiĩ Ezawu ni. A na á goã pii ni kɛnɛn:

⁷ «Wo don, n siĩ dɛ n da kɔ masɛ la, n màn-bii kɔɔ̃n zɛnaa, n kɔ ma la ma bii. Man die lɛn bǐɛ̃ bíi n li Dɛnaa yɔrɔ-a, ma tɔn gã.»

⁸ Maa nɛgiĩ Zakɔba, sisia kəni, n too kɔ ma lon, ma bɛ́ re sii mɛn nyɛɛ n nɛ, bɛ zɛnaa.

⁹ Wo tɔɔn lɛn bii, n bòe babanɛɛ màn paa kũ, n da ǹ kɔ masɛ la, màn mɛn bɛ́ toɛ, ma màn-bii zɛnaa, n kɔ n di lɛ la, màn-bii mɛn bɛ́ kɔɔ̃n a ganaa.

¹⁰ N din tá re woe koe n di lɛ la, màn mɛn bɛ́ toɛ, a lɛn bǐɛ̃ bíi n li, a tɔn gã.

¹¹ Zakɔba nə́ ǹ dan Rebeka lɛ si kɛnɛn: «Táa Ezawu n min kadɛnaa lɛa, ka bɛ́ a ba masɛ ganaa ka Ezawu bɛ́ lɔn wa.

¹² Kɔntan, bɛ̀ ma di lɛ nə́ n gɔn talaa ma ganaa, á die doɛ̃, mà masɛ na a lɛn bebele. Bɛa biikoo li, a bie re lɛn bǐɛ̃ bíi masɛ li doo wa, a n die lɛn pipiã bíi ma li.»

¹³ Ǹ dan tɔ́n pɛ nɛ: «Maa nɛgiĩ, bɛa lɛn pipiã bíi lɛ kũ masɛ mìi ni. Yǎa n nə n too kɔ masɛ lon, n wo bòe babanɛɛ màn paa lɛ kũ n da nɛ.»

¹⁴ Á woo ǹ kũ, á daa ǹ kɔ ǹ dan la. Ǹ dan màn-bii zɛnaa, màn-bii mɛn bɛ́ kɔɔ̃n Zakɔba ǹ di Izaaki lɛ ganaa.

¹⁵ Bɛ kio, Rebeka ná a nɛ goledɛnaa Ezawu lɛ a wɔ ǹ mɔnaa sonboren goa, ǹ mɛnɛn bɛ́ a din li kion, á ǹ wɔ a nɛ kiɛɛrɛdɛnaa Zakɔba lɛ ganaa.

¹⁶ Á bòe ki lɛ kɔ a gɔnɔn lɛ, ka a wìi bǎã zɔzɔnɔ kɛ nɛ.

¹⁷ A màn-bii kɔɔ̃n mɛn zɛnaa, á bɛ lɛ wɔ a nɛgiĩ Zakɔba gɔn, ka buuru ni.

¹⁸ Zakɔba woo wɔ ǹ di li, á pɛ nɛ: «Díi!» Ǹ di ná a lɛ si: «Maa nɛ, ma á ke. Sɛnɛ, maa nɛ lɛ mɛn nɛ ka nsɛ nɛ?»

¹⁹ Zakɔba pɛ ǹ di ni: «N nɛ goledɛnaa Ezawu n ka ma nɛ. N boo mɛn pɛ ma nɛ, má zɛnaa. Ma nə n nyankoe n yoo n giã lon, n maa don siĩ lɛ sɔ̃, n dinmaa lɛn bǐɛ̃ bíi masɛ li.»

²⁰ Izaaki tɔ́n pɛ a nɛgiĩ lɛ nɛ: «Maa nɛgiĩ, n yii fuu kɔ dɛ!» Zakɔba ná a lɛ si: «N din a Dɛnaa Lawa na á ma gɛrɛsiɛ bɔ.»

²¹ Bɛ kio, Izaaki tɔ́n pɛ Zakɔba nɛ: «Maa nɛgiĩ, n zɔ̃ n nə n mɔrɔ ma ganaa foɛɛ̃nɛ, ma n gɔn talaa n ganaa, màn mɛn bɛ́ toɛ, ma dɔ̃ bɛ̀ maa nɛgiĩ Ezawu din ni sonbore.»

²² Zakɔba nə́ n zɔ̃ á dɔ ǹ di Izaaki li, Izaaki nə́ n gɔn talaa a ganaa, á pɛ: «Lɛn lɛ n Zakɔba lɛn lɛa, sɛnɛ, gɔnɔn lɛn sɛn man Ezawu gɔnɔn lɛa.»

²³ Izaaki Zakɔba dɔ̃ wa, a giala, a gɔnɔn lɛn man nə́ goã ka lɛa, ka ǹ dɔɔ̃ngiĩ Ezawu wɔn bɛ́ lɔn. Sɛnɛ, a laan bɛ̀ a lɛn bǐɛ̃ bíi li,

²⁴ á wusoo á nɔ̀n da la doo: «Maa nɛgiĩ Ezawu lɛ n ka n nɛ sonbore?» Zakɔba ná a lɛ si: «Hiĩ, ma din Ezawu ni.»

²⁵ Izaaki tɔ́n pɛ nɛ: «Maa nɛ, da màn-bii kɔ ma la, ma maa don siĩ sɔ̃, ma dinmaa lɛn bǐɛ̃ bíi n li.» Zakɔba màn-bii kɔ ǹ di lɛ la á bii, á yɔ dɔ kɔ la á mi.

²⁶ Bɛ kio, ǹ di Izaaki tɔ́n pɛ nɛ: «Maa nɛgiĩ, n zɔ̃ n nə n mɔrɔ ma ganaa foɛɛ̃nɛ kəni, n nə n sɔɔ ma nɛ.»

²⁷ Zakɔba nə́ n zɔ̃ á n mɔrɔ a ganaa, á n sɔɔ a nɛ. Izaaki ná a wɔ ǹ mɔnaan lɛn gìĩ ma, á lɛn biɛ̃ bíi li bɛ̀ á pii: «Dɛnaa bɛ́ á tán mɛn basã, maa nɛgiĩ lɛ gìĩ n ka bɛ bɛ́ lɔn.

²⁸ Pele mɛn bɛ́ boe lon, Lawa die a bɛ gisĩ n la, n màn mɛn da n wuru-n, a die a bɛ bǐɛ̃ kɔ, n *belee gigiã yɛ, ka duvɛ̃ dii ni.

²⁹ Lawa die a toa tɔrɔ kɔsɔn nə dí nya n nɛ, minin nə kaa tán n giulun, ǹ nə n guguru kɔ. Lawa die a n koa n dɔɔ̃nɔn mìi la, n dan a nɛnyaanan nə kaa tán n giulun, ǹ nə n guguru kɔ. Bɛ̀ min lɛn pɛpiã bíi n li, a kũ ǹ dɛnaa din mìi ni. Bɛ̀ min lɛn bǐɛ̃ bíi n li, lɛn bǐɛ̃ kɔ bɛa dɛnaa lɛ.»

Ezawu ga barka mɛn li Izaaki li

³⁰ Izaaki lɛn bǐɛ̃ bíi Zakɔba li á nya. Zakɔba bɛ́ kiɛ̃ n boe a li boɛɛn gɔrɔ, bɛ̀ ǹ dɔɔ̃ngiĩ Ezawu bɛ́ á bɔ donbaa ǹ bǎã nɛ, á daa.

³¹ A dɔ́ màn-bii kɔɔ̃n zɛnaa, á woo kɔ ǹ di lɛ la, á pɛ nɛ: «Díi, yoo n giã lon, n masɛ a don siĩ sɔ̃, bɛ kio, n tɔn lɛn bǐɛ̃ bíi ma li.»

³² Izaaki nɔ̀n da la: «Die n ka nsɛ nɛ?» A ná a lɛ si: «N nɛgiĩ goledɛnaa Ezawu n ka masɛ nɛ.»

³³ Bɛ́ gɔ̀nɔn bìn diɛ da Izaaki ganaa parsiini. Á tɔ́n pɛ: «Sɛnɛ, die na á woo don baa, á siĩ dɛ á daa kɔ masɛ la? Má màn tumaa bii, bɛ̀ n nə n tɔn daa wa. Má lɛn bǐɛ̃ bíi bɛa dɛnaa lɛ li, ma a n lɛ boe doɛ̃ doo wa.»

³⁴ Ezawu bɛ́ á ǹ di a boon lɛn ma lɔn, a foo yii ziziɛ̃, á n lɛ dɛ kɔsɛkɔsɛ, a ná a nyankɔ: «Maa díi, sabara baa, n lɛn bǐɛ̃ bíi masɛ dɔ li!»

³⁵ Izaaki ná a lɛ si: «Ma bɛ́ máa man die lɛn bǐɛ̃ mɛn bíi n li, n diɛ̃ lɛ nə́ n duru, á daa wɔ bɛ lɛ, á si.»

³⁶ Ezawu tɔ́n pɛ doo: «Zakɔba minin kio-koãli lɛ gunyin paa n ke masɛ kio koɛ̃. A Zakɔbabaa lɛ na a ganaa dɔn! Á maa kiãbaa si ma la lɛlɛ, ma di bɛ́ mà a n die lɛn bǐɛ̃ mɛn bíi ma li sisia, á ke á daa bɛ dɔ si ma la. Izaaki, n lɛn bǐɛ̃ lɛ a kɔsɔ koa, n nə́ die bɛ bíi masɛ dɔ li wa?»

³⁷ Izaaki tɔ́n boo lɛ saa, á pɛ Ezawu ni: «Má Zakɔba koa n mìi la, má n dɔɔ̃nɔn tumaa kɔ la bɛ̀rɛ lɛa. Má pɛ máa Lawa die a belee kɔ la, ka duvɛ̃ dii ni. Ma n boe la, ma wàa zɛnaa n nɛ doo, maa nɛ?»

³⁸ Ezawu wusoo á pɛ ǹ di ni: «Díi, lɛn bǐɛ̃ goon dinsɔɔ̃ nə n lɛ-n? Lɛn bǐɛ̃ bíi masɛ dɔ li koe!» Ezawu nə́ n lɛn saa lon, á wuu pɛ.

³⁹ Bɛa biikoo li, ǹ di tɔ́n pɛ nɛ kɛnɛn: N giã ǹ bǎã wɔlɔ á re lui tán basiɛ̃ ganaa. Pele mɛn bɛ́ gisĩ tán, n giã ǹ bǎã wɔlɔ á re lui bɛ dɔ ganaa.

⁴⁰ N tá re liɛ n gɔya sa ganaa. N tá re dí nyɛɛ n diɛ̃ lɛ nɛ, sɛnɛ, n tá re n gɔn sii la. A bɛ́ re guĩ mɛn diɛ n mìi ni, n tá re n mìi boe bɛ li, n tá re n bɔlɔ boe a biɛ nɛ.

⁴¹ Ezawu Zakɔba baa zɔ́ɔ, ǹ di a lɛn bǐɛ̃ bíi li lɛ taman yii. Á pɛ a din gɔ́ɔ̃-n kɛnɛn: «Maa díi lɛ a gɛ̀ dɔ á nya. Bɛa pinaa, man die ma diɛ̃ Zakɔba dii.»

⁴² Ezawu bɛ́ á sii mɛn koa a yiri ni, ǹ nə́ Rebeka too pɔrɔ ka bɛ nɛ. A ná a nɛ kiɛɛrɛdɛnaa Zakɔba lɛ bíi, á pɛ nɛ: «N mìi saa lon. N gologiĩ Ezawu lɛ n zoɛ̃ mà a na a gɛ̀ dòo bɔ n ganaa. A n zoɛ̃ mà a n nyin bɔ.

⁴³ Maa nɛgiĩ, sisia kəni, n too kɔ masɛ lon. Haya! Yoo n baa si, n wo ma miãgiĩ Laban li Kaaran kiwi.

⁴⁴ Giã a li boɛɛn bɔrɔ, yǎa n gologiĩ lɛ foo wɛɛ.

⁴⁵ Bɛ̀ Ezawu foo waa ǹ mɛn waáraa, n sii mɛn la la, bɛ̀ a yiri bɔ ka bɛ dɔ nɛ, ma á re minin diɛ n kio walan, ǹ nə n kũ ǹ da n nɛ. Ma bɔ̀n baa maa nɛgiĩ min paa lɛ tumaa-n pinin goon, wàa na á baa?»

Zakɔba n woe ǹ diãgiĩ Laban li

⁴⁶ Rebeka pɛ Izaaki ni: «N manaa Ɛti tɔrɔn kɛn tá kanaa tìĩ boe masɛ nyin ni. Bɛ̀ Zakɔba dɔ bɛ miã lɔn kɛn goon saa, gána kɛa nɛlɔn bii, masɛ a tá kanaa là n ka wàa-n doo?»