Siin Giala 2 - LAWA A BOO SONBORE

¹ Lon laanka tán nɛ, ka ǹ gɔ́ɔ̃gɔ́ɔ̃ ǹ mànan tumaa nə́ n zɛnaa, ǹ nə́ nya.

² Lawa bɛ́ a ná a dí nya á nya, a lɛawaa sɔbaabaa ǹ wɔ pinaa, á n susu.

³ Lawa barka wɔ bɛa lɛawaa sɔbaabaa ǹ wɔ pinaa lɛ nɛ, á bɔ á koa a gɔrɔn a din wɔ lɛa. A giala, a bɛ́ á màn tumaa zɛnaa á nya, a na á n susu bɛ lɛ a pinaa.

⁴ Lawa lon laanka tán da lɔn, bɛ lɛa boo n ka bɛ nɛ. Dɛnaa Lawa bɛ́ á tán laanka lon zɛnaa ǹ mɛn waáraa,

Edɛn dù gɔrɔ boo

⁵ bɛ̀ da kɔ́n ba tán la bɔrɔ wa, buu kɔ́n dɔ banban bɔrɔ wa. A giala, bɛa biikoo li, bɛ̀ Dɛnaa Lawa tɔn la kaa tán la bɔrɔ wa, bɛ̀ minbuiin nɛ dɔ din banban bɔrɔ, á n tán kɔsɛ wa.

⁶ Sɛnɛ, mu na á goã soe tán giulun, a n tán tumaa basɛ̃.

⁷ Dɛnaa Lawa tán tii saa, á zɛnaa minbuiin nɛ lɛa. Á yiikoonaabaa ǹ piɛ̃ dɔ a nyin ni, á n baa màn yiikoonaa lɛa.

⁸ Bɛ kio, Dɛnaa Lawa tɔ́n bǎã sonbore kɔ́n zɛnaa lɛ̀giala-n, ǹ nə́ bíi Edɛn dù gɔrɔ, a ná a min zɛnaa lɛ da walan.

⁹ Dɛnaa Lawa da tɔrɔ din tumaa bɔ tán la, siĩn yɔrɔ-a, ǹ nɛ dɔ n kɔɔ̃n lɛ-n. Á yiikoonaabaa ǹ da da dù gɔrɔ lɛ bii, ka sii bǐɛ̃ laanka sii baraa dɔ̃ ǹ da nɛ.

¹⁰ Tà goon a mu na á goã n toɛ Edɛn, die kiɛ dù gɔrɔ lɛ ganaa. A nə n toɛ walan doo, a n tala kɔn gùrù sii.

¹¹ Ǹ goon tɔ n Pisɔn. Bɛ n Avilaa gána tumaa lɛnpɛnɛ. Sana tá bɛa gána lɛ nɛ;

¹² a sana á siĩni. Da gon gìĩ kɔɔ̃n kɔ́n dɔ tá ǹ li, ka kɔlɔ tɛ-pɛle siĩn kɔ́n nɛ.

¹³ Ǹ tà lɛ goon dɔ tɔ n Giɔɔ̃. Bɛ n Kuusu gána tumaa lɛnpɛnɛ.

¹⁴ Ǹ goon kɔsɔ dɔ tɔ n Tiigrə. Bɛ n baa sii Assiirii gána a lɛ̀giala gɔn la. A siibaa ǹ wɔ ǹ ka Efrati tà nɛ.

¹⁵ Dɛnaa Lawa giĩ lɛ saa á koa dù gɔrɔ lɛ nɛ, mà a kɔsɔ, a ga a walan.

¹⁶ Á pɛ á laa a ganaa kɛnɛn: «Ń tá boe la n dù gɔrɔ dan lɛn tɔrɔ tumaa a nɛ bii.

¹⁷ Sɛnɛ, sii bǐɛ̃ laanka sii baraa dɔ̃ ǹ da ke, n nyan toa bɛa nɛ wɔ n lɛ-n wa dɛ! A giala, bɛ̀ n ná a nɛ bii ǹ mɛn pinaa, n tá re giɛ̃, sàabaa ba bɛ la wa.»

¹⁸ Dɛnaa Lawa tɔ́n pɛ kɛnɛn: «A siĩni giĩ goã a dinsɔɔ̃ wa. Ma á re dɔmalɛ wole zɛnɛɛ, a din miã lɛa, ma kɔ la.»

¹⁹ Dɛnaa Lawa don màn tɔrɔ tumaa laanka bàanan tumaa zɛnaa ka tán tii ni, á ǹ kũ á daa ǹ nɛ giĩ lɛ li, a bɛ́ re ǹ tɔ bíi lɔn, asɛ ga bɛ ganaa. A bɛ́ re tɔ mɛn koe bɛa màn yiikoonaan lɛn ganaa, mà ǹ die ǹ nə ǹ bíi ka bɛa tɔ lɛ nɛ.

²⁰ Giĩ lɛ piɛ mànan laanka don mànan tumaa tɔ kɔ, ka bàanan tumaa nɛ. Sɛnɛ, a dinmaa na a din miã yɛ, a dɔmalɛ wole lɛa wa.

²¹ Dɛnaa Lawa tɔ́n nyuù gole da giĩ lɛ ganaa, á nyuù wɔ. A bɛ́ nyuù ni, Dɛnaa Lawa ná a garsawe goon bɔ, á bɛa bǎã tã ka siĩ ni.

²² Dɛnaa Lawa garsawe mɛn lɛ bɔ giĩ ni, á bɛ lɛ zɛnaa lɔ lɛa, á daa kɔ la.

²³ Giĩ bɛ́ á yɛ, á kaa a foo la, yǎa á n toa kɛnɛn: «Taarɛ! Sisia kəni, masɛ din miã goon ne ka kɛ nɛ, ma din gɔ̀nɔn kɔ́n nɛ ka kɛ nɛ. Mà ǹ die bíi giĩ a paabaa ǹ wɔ, a giala, a na á bɔ giĩ ni.»

²⁴ Bɛ lɛ na á toa, giĩ á re n niɛ a n bɔ ǹ di laanka ǹ dan ganaa, a n doa kɔn ka a lɔ nɛ, ǹ nə n baa goon.

²⁵ Giĩ laanka lɔ nɛ, ǹ dinin min paa tumaa gɔ̀nɔn tontoro na á goã, min kɔ́n a sìi ba ǹ miã ganaa wa.