Siin Giala 14 - LAWA A BOO SONBORE

Abramu laanka kiin kɔnɔn boo, ka Mɛlkizedɛki ni

¹ Bɛa wasa lɛ nɛ, Baabiloniin kii Amurafeli ni, ka Elaazaaran kii Ariɔki ni, Elamun kii Kedɔrlomɛɛrɛ nɛ ka Guimun kii Tidiali ni,

² bɛn nə́ yoo ka zia nɛ Sodɔmun kii Beraa ganaa, Gomɔɔrɔn kii Birsaa nɛ, Admaa kii Sinaabu ni, Seboyimun kii Semebɛɛrɛ nɛ, ka Belaan kii ni. Belaa lɛ nɛ ǹ tá bíi Sowara.

³ Ma kiin mɛnɛn pɛ sisia, bɛn tumaa doamaa nɛ ǹ wo kɔn yǎa nyankɔrɔ basa kɛ nɛ Sidimu. Yìsi mu kɔ̀ kɛ lɛ a baa sii wa, bɛ lɛ n walan sisia.

⁴ Bɛa kiin lɛn wɔ na á goã Kedɔrlomɛɛrɛ wɔ gɔ́ɔ̃ nɛ yǎa lɛ̀ fulupaa. Sɛnɛ, a lɛ̀ fulusɔɔbaa ǹ wɔ, ǹ nə́ n piã.

⁵ A lɛ̀ fulusiibaa ǹ wɔ, Kedɔrlomɛɛrɛ laanka ǹ miã kiin mɛnɛn bɛ́ kun ni, ǹ nə́ daa kɔ Astaarɔti-Karnayimu kiwi lɛ, ǹ nə́ Refaa tɔrɔn dɛ walan. Bɛ kio, ǹ nə́ Zuzu tɔrɔn dɛ Hamu kiwi. Ǹ nə́ Emu tɔrɔn dɛ Kiriata a diə fúlu ni.

⁶ Ǹ nə́ Hori tɔrɔn dɛ ǹ dinin kiwi a kelen la Seyiri kiwi, yǎa Ɛlpaaran kunu diə gole ganaa.

⁷ Bɛ kio, ǹ bɛ́ Ɛn-Mispaa bɛ giala mà Kadɛsi, ǹ nə́ n bɔyaa ǹ nə́ daa walan, ǹ nə́ Amalɛki tɔrɔn bǎã tumaa ziziɛ̃. Amɔɔrɔ tɔrɔn mɛnɛn dɔn dinin bɛ́ giã-n Hasasɔn-Tamaara, ǹ nə́ bɛn dɔn dɛ.

⁸ Bɛa biikoo li Sodɔmu kiwi a kii ni, Gomɔɔrɔ kiwi wɔ nɛ, Admaa kiwi wɔ nɛ, Seboyimu kiwi wɔ nɛ, Belaa mɛn bɛ́ ǹ nə́ bíi Sowara, ka bɛa kiwi a kii ni, ǹ tumaa soo ka ǹ zia nɛn nɛ nyankɔrɔ basa lɛ-n Sidimu.

⁹ Ǹ nə́ yoo ka zia nɛ Elamun kii Kedɔrlomɛɛrɛ laanka Guimun kii Tidiali ganaa, ka Baabiloniin kii Amurafeli laanka Elaazaaran kii Ariɔki ni. Kii màn sii n kɔn ka kii sooro ne.

¹⁰ Sidimu bǎã lɛ tumaa na á goã nyankɔrɔ lɛa, tii gondɛnaa ná a nɛ. Sodɔmun kii lɛ laanka Gomɔɔrɔn wɔ lɛ bɛ́ baa sii, ǹ nə́ bɔ ǹ nə́ kaa nyankɔrɔ nɛ, ǹ gialakunun nə́ baa si, ǹ nə́ woo n duru kelen la.

¹¹ Gɔ̀lɔ̀n lɛn nə́ Sodɔmu laanka Gomɔɔrɔ minin gɔn màn tumaa si ǹ la, ǹ nə́ woo ne kɔnlɛ ka ǹ màn mɛn tumaa koa ǹ bii ǹ wɔ lɛa.

¹² Ǹ nə́ Abramu ǹ dɔɔ̃ngiĩ a nɛ Lɔti dɔ kũ, ǹ ná a gɔn mànan tumaa goa, ǹ nə́ woo. A giala, a dɔ na á goã giã-n Sodɔmu.

¹³ Baa si a la wole goon daa, á bɛa boo lɛ pɛ Ebrəən giĩ Abramu ni. Abramu na á goã giã-n Amɔɔrɔn giĩ Manbre a dan kɛn bǎã nɛ. Manbre n Eskɔli laanka Anɛɛrɛ ǹ dɔɔ̃n lɛa. Bɛa min sɔɔ lɛ tumaa n kun ka Abramu ni.

¹⁴ Abramu bɛ́ á ǹ dɔɔ̃n lɛa kuĩ boo ma ǹ mɛn waáraa, a dí-nyalin mɛnɛn nə yɛ a kion, ǹ nə́ boe ziabaa la, á bɛn min biɛsɔɔ ka fulukiwisi (318) goa, á kiin lɛn loo yǎa Dan kiwi.

¹⁵ A ná a minin lɛn tala kɔn kuru gigiã, ǹ nə́ bɔ ǹ nə́ kɔ zɔ́ɔn lɛn lɛ tèlò basa li. Ǹ nə́ ǹ loo yǎa Hobaa, Damaasi a gɔsɛ a lɛ̀gɔn la, ǹ nə́ ǹ dɛ.

¹⁶ Á ǹ gɔn màn tumaa si á n bɔyaa nɛ. Á daa ka ǹ dɔɔ̃n Lɔti dɔ laanka a gɔn mànan nɛ. Á daa ka lɔn dɔn laanka kòso nɛ kɔsɔn nɛ.

¹⁷ Abramu bɛ́ á gɔ̀lɔ̀ baa Kedɔrlomɛɛrɛ laanka a tá kun wole kiin lɛn ganaa, a bɛ́ n bɔyɛɛ die ǹ mɛn waáraa, Sodɔmun kii lɛ woo n da lɛ, Sawe kiwi a nyankɔrɔ basa kɛ nɛ ǹ nə́ bíi "Kii a Yankɔrɔ Basa".

¹⁸ Mɛlkizedɛki mɛn bɛ́ á goã Salɛmu kiwi a kii lɛa, Lon a Lawa a wúlu-bɔle dɔ lɛa, bɛ́ daa màn-bii laanka yɔ nɛ.

¹⁹ Á lɛn bǐɛ̃ bíi Abramu li, bɛ̀ á n pii kɛnɛn: «Lon a Lawa mɛn bɛ́ á lon laanka tán zɛnaa, bɛ die a barka wɔ n nɛ, Abramu.

²⁰ Asɛ mɛn bɛ́ á n zɔ́ɔn wɔ n gɔn, a tɔ die a bɔ.» Abramu mànan lɛn tumaa a fùbaa ǹ wɔ bɔ, á kɔ la.

²¹ Sodɔmun kii lɛ tɔ́n pɛ Abramu ni: «Minin lɛn sɛn kɔ, n mànan kɛn toa n gɔn.»

²² Abramu ná a lɛ si á pɛ: «Ma gɔn nə́ ke dia-n lon a Dɛnaa Lawa la, asɛ mɛn bɛ́ á lon laanka tán zɛnaa.

²³ Ma nə n liɛ, ma ba re màn kɔ́n sii n la wa, haalɛ a gɛ̀sɛ, haalɛ a kɔsɔ biɛ! Bɛ n toɛ n ba re boe la n pɛ biɛ̃ mà nsɛ nə ń toa Abramu màndɛnaa baa wa.

²⁴ Màn kɔ́n ba masɛ bǎã-n wa, yǎa maa minin kɛn màn-bii dinsɔɔ̃. Sɛnɛ, min mɛnɛn nə ma da zii, Anɛɛrɛ laanka Eskɔli ni ka Manbre ne, bɛn dininmaan tá re ǹ wɔ gii sii.»