Samayeli2 8 - LAWA A BOO SONBORE

Davida zian mɛnɛn baa

¹ Bɛa sii lɛ kio, Davida zia baa Filisiti minin ganaa, á ǹ gùrùn da ǹ dɔ̀ɔ̃ nɛ. Davida nə́ ǹ gána lɛ a dɛnaabaa kũ á si ǹ la.

² Davida boo Moabu minin kɛn dɔn la. A na á goã ǹ kuĩ, bɛ̀ a ǹ naa tán ka pàã nɛ. Bɛ̀ á ǹ nimi min sɔɔ, a n màn paa dii a goon toa walan. Moabu minin lɛn nə́ nɔmaa ǹ nə́ Davida a dí-nyalin baa, ǹ nə́ goã nyin giɔ̀mɔ din sarɛɛ la.

³ Davida boo Rehɔbu a nɛgiĩ Adadezɛɛrɛ la. A din lɛ n Sobaa kiwi a kii lɛa. Bɛa biikoo li, a na á goã zii la wusii woe Efrati tà lɛ-a minin kɛn kuĩ ǹ kiɛ a pàã giulun.

⁴ Davida na á sùi-dabaalin lɛn duu goon ka biɛsɔbaa (1 700) kũ. A zia-baalin mɛnɛn dɔn bɛ́ tɔ we ka ǹ gòã nɛ, á bɛa duu fuə kũ (20 000). Á ziabaa ǹ sùin lɛn paabiɛ bɔ á koa, á gialakun kɛ tumaa pere biɛn kukuru.

⁵ Siiriii minin mɛnɛn bɛ́ Damaasi kiwi, bɛn nə́ daa n dɔ Sobaan kii Adadezɛɛrɛ lɛ. Sɛnɛ Davida Siiriii minin lɛn min duu fuəwenpaa (22 000) dɛ.

⁶ Davida minin bɔ á ǹ koa Siirii minin lɛn mìi la Damaasi kiwi. Siirii minin lɛn nə́ nɔmaa ǹ nə́ Davida a dí-nyalin baa, ǹ nə́ goã nyin giɔ̀mɔ sarɛɛ Davida la. Davida goã woe bǎã mɛn tumaa nɛ, Dɛnaa Lawa na á goã gɔ̀lɔ̀baa koe la miɛ̃.

⁷ Goóro sanadɛnan mɛnɛn nə goã Adadezɛɛrɛ a dí-nyalin gɔn, Davida bɛn si ǹ la, á woo ǹ ne Zeruzalɛmu.

⁸ Kii Davida zan màn gigiã dɔ si Betaa laanka Berotayii kiwi. Bɛn man kii Adadezɛɛrɛ a kiwin lɛa.

⁹ Amaatin kii Toyii ma, mà Davida boo Adadezɛɛrɛ a zia-baalin lɛn tumaa la.

¹⁰ Toyii tɔ́n a nɛgiĩ Zoramu dia kii Davida li, mà a wo fòo da nɛ. A zia mɛn baa Adadezɛɛrɛ ganaa á boo la, má a bɛa fòo da nɛ. A giala, Adadezɛɛrɛ lɛ na á goã Toyii a ziadɛnaa lɛa. Zoramu woo ka wɔrɔ mànan nɛ, sana wɔn nɛ, ka zan wɔn nɛ.

¹¹ Davida bɛn lɛn dɔn kɔ Dɛnaa Lawa la, kun ka wɔrɔ kɛ laanka sana kɛ nɛ, á ǹ kɔ Dɛnaa Lawa la lɛlɛ. A boo tɔrɔ kɔsɔn mɛnɛn tumaa la, a na a ǹ si bɛn la.

¹² Á ǹ kɔn si Siirii minin la, Moabu minin ni, Amɔn tɔrɔn nɛ, Filisiti minin ni, Amalɛki tɔrɔn nɛ. A mànan mɛnɛn dɔn si Rehɔbu a nɛgiĩ Sobaan kii Adadezɛɛrɛ la, á bɛn dɔn kɔ Dɛnaa Lawa la.

¹³ Davida bɛ́ á boo Siirii minin lɛn la, á n bɔyɛɛ die piɛ, á Edɔmu minin kɛn min duu fulukiwisi dɛ yìsi nyankɔrɔ basa kɛ nɛ. Davida wusoo á tɔ yɛ bɛ gɔ́ɔ̃ nɛ.

¹⁴ Á minin bɔ á ǹ koa Edɔmu. A na á ǹ koa Edɔmu minin lɛn tumaa mìi la, ǹ tumaa nə́ n bɔyaa ǹ nə́ Davida a dí-nyalin baa. Davida goã woe bǎã mɛn tumaa nɛ, Dɛnaa Lawa na á goã gɔ̀lɔ̀baa koe la miɛ̃.

Davida a pàã lɛ a dí-nyalin

¹⁵ Davida giã Izirayeli minin lɛn tumaa mìi la. A na á goã zaman lɛ tumaa a sii yɔrɔ boe ka peperebaa nɛ, a bɔkɔnlɛ we wa.

¹⁶ Seruzaa a nɛgiĩ Zoabu na á goã a zia-baalin mìi la. Ayiluudu a nɛgiĩ Zozafati na á goã sɛ́wɔn-tamaali lɛa.

¹⁷ Ayitubu a nɛgiĩ Sadɔki laanka Abiataara a nɛgiĩ Akiimelɛki ni, bɛn man nə́ goã Lawa a wúlu-bɔlen lɛa. Serazaa na á goã sɛ́wɔ-kiɛ̃li lɛa.

¹⁸ Zozadaa a nɛgiĩ Benaazaa na á goã Kerɛti minin kɛn laanka Pelɛti minin kɛn mìi la. Davida din a nɛnyaanan kɛn man nə́ goã mìilandɛnan lɛa.