Samayeli2 6 - LAWA A BOO SONBORE

Lɛ kɔ kɔn la ǹ goo a wo Zeruzalɛmu

¹ Izirayeli minin lɛn mɛnɛn tumaa tɔ bɛ́ á bɔ zia la, Davida wusoo á bɛn tumaa sɔkɔn. Maǹ nə́ goã giĩ duu pɔsɔɔ (30 000).

² Davida yoo á zii saa, a din laanka zaman mɛn tumaa goã kun ni. Ǹ nə́ woo Baalee, Zudaa gána nɛ, mà maǹ woe Lawa a *lɛ kɔ kɔn la ǹ goo lɛ siɛ ǹ nə́ die ne. Ǹ nə́ goã tɔ kɔn pii lɛ kɔ kɔn la ǹ goo lɛ ganaa, Dɛnaa Lawa Pàãyiidɛnaa kɛ tɔ nɛ. Lon màn yiikoonaan nyínin mɛnɛn bɛ́ goo lɛ lalan, a n giã-n bɛn bii.

³ Ǹ nə́ Lawa a lɛ kɔ kɔn la ǹ goo lɛ saa Abinaadaabu a kion, kele lalan, ǹ nə́ da wotoro dii la, ǹ nə́ woo ne. Abinaadaabu din a nɛgiĩn man nə́ goã wotoro dii lɛ diɛ baa-a. Uzaa laanka Ayio ne.

⁴ Ǹ nə́ saa ǹ nə́ bɔ Abinaadaabu a kion lɛ nɛ kele lalan. Ayio na á goã tɔ we goo lɛ nyɛɛnɛ.

⁵ Davida laanka Izirayeli minin lɛn tumaa na á goã bɛ̀ biɛ Dɛnaa Lawa yɔrɔ-a, bɛ̀ dɛ ǹ mànan tɔrɔ tumaa wuu li: gɔn sonbore wɔn nɛ, tùtu tɔrɔ tumaa laanka kɔnkoɛ̃nɛn nɛ, maàn nɛ, ka gɔn pere dɛ ǹ mànan nɛ.

⁶ Ǹ bɛ́ ǹ nə́ dɔ Nakɔn a diə fúlu kɛ nɛ, diin lɛn man nə́ baa re Lawa a lɛ kɔ kɔn la ǹ goo lɛ boe daɛ. Uzaa nə́ n gɔn dia mà a n kuĩ.

⁷ Sɛnɛ, Dɛnaa Lawa foo yoo Uzaa li parsiini. Lawa dɛ walan, bɛa sii kɛ lɛ a lɛ-a. A dɔ́ gã a din bǎã nɛ walan, kunu Lawa a lɛ kɔ kɔn la ǹ goo lɛ li.

⁸ Davida foo busu, a giala Dɛnaa Lawa na á yoo Uzaa gialaa. Haalɛ tɔn pelo, maǹ tɔn bɛa bǎã lɛ bíi mà "Yoo Uzaa gialaa ǹ bǎã".

⁹ Bɛa pinaa kɛ lɛ nɛ, Davida nyɛ́ɛ baa Dɛnaa Lawa a sii ni á tɔ́n pɛ: «Dɛnaa Lawa a lɛ kɔ kɔn la ǹ goo lɛ n die siɛ lɔn a tɔn da masɛ a kiwi!»

¹⁰ Davida nɔmaa á n piã, a Dɛnaa Lawa a lɛ kɔ kɔn la ǹ goo lɛ saa á woo ne a piɛ, a din a kiwi kɛ-n doo wa. Sɛnɛ, a na á kanaa nɛ, á woo da Gaatin giĩ Obɛdi-Edɔmu a kion.

¹¹ Dɛnaa Lawa a lɛ kɔ kɔn la ǹ goo lɛ goã Gaatin giĩ Obɛdi-Edɔmu a kion ka bɛa yɔrɔ lɛ nɛ, yǎa mui sɔɔ. Dɛnaa Lawa barka da Obɛdi-Edɔmu laanka a kion minin tumaa ganaa.

¹² Ǹ nə́ daa pɛ kii Davida nɛ mà Lawa barka da Obɛdi-Edɔmu laanka a gɔn màn tumaa ganaa, Lawa a lɛ kɔ kɔn la ǹ goo lɛ taman yii. Bɛ lɛ nɛ, Davida tɔ́n woo, á Lawa a lɛ kɔ kɔn la ǹ goo lɛ saa Obɛdi-Edɔmu a kion, á woo ne a din a kiwi kɛ nɛ, ka nyɛnyɛɛ nɛ.

¹³ A gũlin lɛn bɛ́ ǹ nə́ saa ke, ǹ bɛ́ ǹ nə́ gòã yii sɔrɔ zɛnaa lɔn gɔrɔ, Davida na á wúlu bɔ ka dii gɔ̀lɔ̀ goon laanka dii ten kasiɛ̃ wole goon ne.

¹⁴ Davida na á goã bɛ̀ biɛ ka a we tumaa nɛ Dɛnaa Lawa yɔrɔ-a ka wúlu-bɔlen mɔnaa yii nɔnɔɔ kɛ ná a ganaa.

¹⁵ Davida laanka Izirayeli minin lɛn tumaa woo ka Dɛnaa Lawa a lɛ kɔ kɔn la ǹ goo lɛ nɛ Zeruzalɛmu. Maǹ nə́ goã foo kɔɔ̃nbaa ǹ lɛ dii bɛ̀ ǹ nə́ bɛn pii.

¹⁶ Dɛnaa Lawa a goo lɛ bɛ́ we "Davida a kiwi" lɛ nɛ, Sayulu a nɛlɔ Miikali dɔ na á n yii kɔ fənɛtrə ne. Á kii Davida yɛ bɛ̀ biɛ, bɛ̀ á n paparɛ Dɛnaa Lawa yɔrɔ-a. Mikaali ná a puusə kɔ a din foo ne.

¹⁷ Davida mɔnaa kion mɛn doa, á bǎã zɛnaa a bii Dɛnaa Lawa a goo lɛ wɔ lɛa, ǹ nə́ goo lɛ da bɛa bǎã lɛ nɛ. Davida *wúlu màn tã á barka da ǹ wúlu dɔ bɔ Dɛnaa Lawa yɔrɔ-a.

¹⁸ Davida bɛ́ á wúlu màn lɛ tã, á barka da ǹ wúlu dɔ bɔ á nya, á barka da zaman lɛ ganaa, ka Dɛnaa Lawa Pàãyiidɛnaa kɛ tɔ nɛ.

¹⁹ Davida màn-bii gii Izirayeli zaman lɛ tumaa nɛ. Giĩn laanka lɔn nɛ, á buuru kɔ ǹ gogoonmaa la ka siĩ kɔn nɛ, ka rezɛ̃ laa nɛ. Bɛ kio, zaman lɛ tumaa woo piɛ.

²⁰ Davida kanaa á wɔ kion, mà a n barka diɛ a kion minin ganaa. Sayulu a nɛlɔ Mikaali soo á daa n da Davida lɛ, á n lɛ dɛ a ganaa á pɛ: «Izirayelin kii lɛ gugurubaa yɛ pelo koe! Á ke á n sɔlɔ a bɛ̀rɛgiĩn laanka a bɛ̀rɛlɔn yɔrɔ-a ka min kooro mɛn din bɛ́ ke a ná a sìi doɛ̃ wa.»

²¹ Davida tɔ́n pɛ Mikaali ni: «Dɛnaa Lawa mɛn ma soɛ kɔ n díi laanka ka kion minin tumaa nɛ, á masɛ bɔ á má koa a zaman Izirayeli minin kɛn mìilandɛnaa lɛa, man maa bɛ̀ lɛ biɛ Dɛnaa Lawa din yɔrɔ-a.

²² Á kɔɔ̃nɛ ma goã min kooro lɛa a la kɛ din ni, man kiɛɛrɛ ma din yii li. Sɛnɛ, n bɛ́ bɛ̀rɛlɔn mɛnɛn boo diɛ ke, bɛn yɔrɔ-a sɛn, ma á die goɛ̃ guguru.»

²³ Bɛ lɛ na á toa, Sayulu a nɛlɔ Mikaali nɛ yɛ wa, yǎa á woo kaa a gɛ̀ lɛ.