Samayeli2 4 - LAWA A BOO SONBORE

Isbosɛti a gɛ̀

¹ Sayulu a nɛgiĩ Isbosɛti ma, mà Abnɛɛrɛ gã Ebrɔn kiwi. A gù yii gã a din-a, á sii kaka baa Izirayeli minin lɛn tumaa gɔn.

² Zia kuru nyɛɛnaandɛnaa paa goã Sayulu a nɛgiĩ lɛ lon. Goon tɔ n Baanaa, goon kɛ tɔ n Rekabu. Bɛnzamɛn tɔrɔ Rimɔn mɛn bɛ́ boe Beerɔti kiwi, bɛa nɛgiĩn manɛ. A giala, maǹ nə́ goã Beerɔti kiwi lɛ diɛ kun ka Bɛnzamɛn tɔrɔn kiwin ni.

³ Beerɔti kiwi minin lɛn man nə́ goã ǹ nə́ baa si ǹ nə́ woo giã Gitayimu kiwi. A da kaa pelo lɛ, a tɔrɔn man tɔn giã-n walan.

⁴ Sayulu a nɛgiĩ Zonaatan dɔ a nɛgiĩ goon goã, a gòãn paanan nə́ ziziɛ̃. A lɛ̀ sooro ne, bɛ̀ Sayulu laanka Zonaatan a gɛ̀ boo lɛ bɛ́ n toɛ Zizereyɛli doe ǹ li. Lɔ mɛn goã toe, bɛ na á saa mà a n baa sii ni. Nanaa a la yii-n gɔn, nɛ lɛ nə́ n si la á mɛnaa, á gɔ̀naa baa. Nɛ lɛ tɔ na á goã Mefibosɛti.

⁵ Ǹ kɔn pinaa kəni, Beerɔtin Rimɔn a nɛ Rekabu laanka Baanaa yoo ǹ nə́ woo Isbosɛti a piɛ penleen tiɛɛ̃n nɛ. Ǹ bɛ́ doe, bɛ̀ a n waa-n tán penleen susui we.

⁶ Ǹ nə́ kaa kion lɛ gɔ́ɔ̃ nɛ, ka n pɛ mà maǹ woe wùsu siɛ, ǹ nə́ Isbosɛti dɛ a nɔ̀ ganaa. Bɛ kio Rekabu laanka ǹ dɔɔ̃ngiĩ Baanaa baa si.

⁷ Ǹ bɛ́ ǹ nə́ wɔ kion lɛ-n ke, maǹ nə́ woo Isbosɛti lɛ yaa waa-n tán piì la a kion. Ǹ nə́ dɛ á gã, ǹ ná a mìi kuru. Bɛ kio, ǹ ná a mìi lɛ saa, ǹ nə́ kɔ Zurdɛ̃ a nyankɔrɔ basa kɛ lɛ miɛ̃ tèlò tumu lɛ gɔ́ɔ̃ nɛ, ǹ nə́ woo ne.

⁸ Ǹ nə́ woo Isbosɛti mìi lɛ kɔ kii Davida la Ebrɔn, ǹ nə́ pɛ nɛ: «N zɔ́ɔ Sayulu mɛn lɛ goã giɛ li a n dɛ, a nɛgiĩ Isbosɛti lɛ mìi á ke. Dɛnaa Lawa na á maa dɛnaagiĩ kii a gɛ̀ dòo lɛpiɛ̃ bɔ Sayulu laanka a tɔrɔn ganaa pelo lɛawaa kɛ nɛ.»

⁹ Davida tɔ́n pɛ Beerɔti min Rimɔn a nɛgiĩ Rekabu laanka ǹ dɔɔ̃n Baanaa lɛ nɛ: «Dɛnaa Lawa Yiikoonaa ke, á ma kirisibaa bɔ̀n tumaa ganaa, masɛ nə n liɛ ka bɛ tɔ nɛ.

¹⁰ Min mɛn da pɛ ma nɛ mà Sayulu gã, a dɔ na á goã n din biɛ boo taãn-pɛle lɛa. Sɛnɛ, má kũ má dɛ Siklagi kiwi, a boo taãn pɛ lɛ a saraa lɛa.

¹¹ Má bɛ din dɛ, sanparɛ, bɛ̀ min baraan nə́ woo kaa min pepere li a kion, ǹ nə́ dɛ a waa ǹ piì la! Ka gɛ̀ mɛn dɛ, man die bɛ lɛ dòo boe ka ganaa, ma ka dɔn dɛ, ma ka bɔ kanaa.»

¹² Davida tɔ́n pɛ a nɛginin tɔntɔraan lɛn manɛ, mà ǹ nə ǹ dɛ. Ǹ nə́ ǹ gɔnɔn laanka ǹ gòãn kuru, ǹ nə́ ǹ gere lɔɔ lon Ebrɔn kiwi a mu nyankɔrɔ kɛ lɛ-a. Ǹ nə́ Isbosɛti mìi lɛ saa, ǹ nə́ bĩ Abnɛɛrɛ a yala kɛ nɛ Ebrɔn.