Samayeli2 24 - LAWA A BOO SONBORE

Minin nimii laanka dɔlɔ boo

¹ Ǹ kɔn pinaa doo, Dɛnaa Lawa foo wusoo á yoo Izirayeli minin lɛn li. Á Davida nyɛnaa á da ǹ ganaa, á pɛ nɛ: «woo, n Izirayeli minin lɛn laanka Zudaa minin lɛn nimi.»

² Zia baalin goledɛnaa Zoabu mɛn goã kun ka kii ni, kii pɛ bɛ nɛ: «Bǐɛ̃ kɔ n bɔ Izirayeli tɔrɔn lɛn tumaa li, a saa Dan ganaa gɔsɛ a lɛ̀gɔn la a wo Bɛɛr-Sebaa yaa, gusin a lɛ̀gɔn la n zia-baali zaman lɛ tumaa nimi, màn mɛn bɛ́ toɛ ma ǹ lɛ dɔ̃.»

³ Zoabu tɔ́n pɛ kii lɛ nɛ: «Zaman mɛn bɛ́ a tan, Dɛnaa Lawa mɛn bɛ́ n Lawa lɛa, bɛ die a wusoo a bɛ miã paabiɛ kaa bɛa zaman lɛ li, maa dɛnaagiĩ kii din yii yɛ. Sɛnɛ, maa dɛnaagiĩ kii ganaa, wàa na á baa, n tá li n bɛ miã sii kɛ zɛnaa.»

⁴ Sɛnɛ, kii lɛ laa Zoabu laanka zia-baalin goledɛnan lɛn manɛ. Ǹ nə́ soo ǹ nə́ n bɔ kii yɔrɔ-a, ǹ nə́ woo Izirayeli zaman lɛ nimi.

⁵ Ǹ nə́ Zurdɛ̃ tà kuru, ǹ nə́ golee Aroɛɛrɛ bɔrɔ, kiwi mɛn bɛ́ Gaadi a nyankɔrɔ basa kɛ bii, bɛa gusin a lɛ̀gɔn la. Bɛ kio, ǹ nə́ woo Yazɛɛrɛ.

⁶ Ǹ nə́ soo walan ǹ nə́ woo Galaati gána nɛ. Ǹ nə́ n toa walan, ǹ nə́ woo Taatimu-Odosii gána nɛ. Bɛ kio, ǹ nə́ woo Dan-Yaani. Ǹ nə́ n toa Dan-Yaani, ǹ nə́ woo Sidɔn li.

⁷ Ǹ nə́ wɔ Tiiri kiwi a lɛduə̃ ǹ bǎã kaka kɛ nɛ, ǹ nə́ bɔ Ivii tɔrɔn kɛn kiwi tumaa nɛ ka Kanaan minin kɛn kiwi tumaa nɛ, ǹ nə́ daa soo Zudaa gána a gusin a lɛ̀gɔn la Bɛɛr-Sebaa kiwi.

⁸ Ǹ nə́ gána lɛ gɔ́ɔ̃ tumaa kaa kɔn la mui manangɔrɔ ka lɛawaa fuə gɔ́ɔ̃ nɛ, ǹ nə́ tɔn nə n bɔyaa ǹ nə́ daa Zeruzalɛmu.

⁹ Zoabu zaman lɛ nimi. A minbuiin lɛ mɛn yɛ, á bɛ pɛ kii ni: Izirayeli gána nɛ, min mɛnɛn bɛ́ boe zia-baa la bɛn man min duu biɛkiwisi (800 000). Zudaa wɔn man min duu biɛsooro (500 000).

¹⁰ Davida bɛ́ á zaman lɛ nimi miɛ̃, bɛ kio, a foo ná a din zɛ̀rɛ baa. Á tɔ́n pɛ Dɛnaa Lawa nɛ: «Ma sii mɛn zɛnaa, sii baraa gole gole ne. Kanna kəni, Dɛnaa Lawa, masɛ nə n nyankoe, bǐɛ̃ kɔ n kiɛ̃ maa sii baraa kɛ la, a giala, gàãnaabaa ǹ sii din taãn nə ka kɛ nɛ má zɛnaa.»

¹¹ A lɛawaa baayɛlɛ, Davida yoo á n bɔ tán nyuù ni. Bɛ á zɛnɛɛ, bɛ̀ Dɛnaa Lawa boo da Davida a doroo kɔmala wole, Lawa a boo gii-dali Gaadi ni. Á pɛ nɛ: –

¹² Wo boo da Davida nɛ, n pɛ nɛ: «Masɛ Dɛnaa Lawa n kɛ pii: Man die dɔlɔ sɔɔ boo diɛ n nɛ. Bɛn goon bɔ, ma die ma bɛ da n mìi ni.»

¹³ Gaadi woo dɔ Davida li, a ná a yɔrɔ pɛ nɛ. Man giɛ li n gána minin lɛn nə lɛ̀ sɔbaa bòo kɔ hinlaa ǹ baa si ǹ zɔ́ɔn nyɛɛnɛ mui sɔɔ bɛ̀ ǹ nə́ ǹ kio lui, hinlaa piɛ̃ busu kaka nə ǹ kũ yǎa lɛawaa sɔɔ. Kanna kəni, n taasɛ. Min mɛn masɛ dia, ma doamaa bɛ́ nɛ ma boo binyəə mɛn kɔ bɛ la, ga n bɛ pɛ ma nɛ.

¹⁴ Davida tɔ́n pɛ Gaadi ni: «Ma foo ziziɛ̃ á la yii ni. Dɛnaa Lawa dɔlɔ bɔ ma ganaa, bɛ á soɛ minbuiinin nə dɔlɔ bɔ ma ganaa nɛ, a giala Dɛnaa Lawa a makara-doɛ̃ á gole.»

¹⁵ A kũ bɛa pinaa lɛ a baayɛlɛ ganaa, Dɛnaa Lawa piɛ̃ busu babaraa dia Izirayeli gána nɛ. Dɛnaa Lawa lɛawaa lɛ mɛn pɛ, busu lɛ na á minin dɛ miɛ̃ yǎa á woo kaa bɛ lɛ. A saa Dan ganaa a wo Bɛɛr-Sebaa kiwi yaa, minbuiin duu pɔsɔbaa (70 000) na á gã.

¹⁶ Lon a dia dí-a wole nə́ n gɔn saa á dia Zeruzalɛmu la, mà a n die basaã koe ne. Dɛnaa Lawa bɛ́ a ba li doo a bɛa basaã lɛ kɔ a wo-n nyɛɛn wa, á tɔ́n pɛ lon a dia dí-a wole lɛ nɛ basaã koe zaman lɛ bii: «Kɛ á boe! Kanna kəni, wusoo ka n gɔn nɛ.» Bɛa biikoo li bɛ̀ Dɛnaa Lawa a dia dí-a wole lɛ n golee ne kunu Zebuzun giĩ Arabunaa kɛa *belee duwəə ǹ bǎã kɛ li.

¹⁷ Davida bɛ́ á lon a dia dí-a wole lɛ yɛ minin dii zaman lɛ bii, á boo da ka Dɛnaa Lawa nɛ, á pɛ: «Á ke, masɛ din ni má sii baraa zɛnaa, ma din zɛ̀rɛ nɛ. Yii ti-an kɛn dɔn man nə́ wàa zɛnaa kəni? Ma nə n nyankoe, dɔlɔ lɛ bɔ ma din laanka ma di kion minin ganaa.»

¹⁸ A din pinaa kɛ lɛ nɛ, Gaadi daa dɔ Davida li á pɛ nɛ: «Zebuzu tɔrɔ Arabunaa bɛ́ a belee duwii bǎã mɛn nɛ, wo walan, n *wúlu bɔ ǹ bǎã dɔ Dɛnaa Lawa wɔ lɛa.»

¹⁹ Davida woo, ka Dɛnaa Lawa bɛ́ á Gaadi dia mà a da pɛ-n lɔn.

²⁰ Arabunaa nə́ n yii saa á ga, á kii laanka a dí-nyalin yɛ die a li. Arabunaa soo á kaa tán kii giulun, á n mìi zuməə tán.

²¹ Arabunaa tɔ́n pɛ: «Wàa na á baa maa dɛnaagiĩ kii á die masɛ li?» Davida ná a lɛ si: «Man giɛ li ma n belee duwəə ǹ bǎã kɛ lɛ pii, ma wúlu bɔ ǹ bǎã dɔ a nɛ Dɛnaa Lawa wɔ lɛa, màn mɛn bɛ́ toɛ, sii kaka kɛ lɛ yoo a n bɔ zaman lɛ mìi ni.»

²² Arabunaa tɔ́n pɛ Davida nɛ: «Maa dɛnaagiĩ kii, màn mɛn bɛ́ kɔɔ̃nɛ n ganaa, bɛ kũ n Lawa gɔ nɛ. Maa diin nə́ ke; ń tá boe la n bɛn baa *wúlu màn tiɛ̃ lɛa. Ń tá boe la n maa wotoron kɛn laanka ǹ mànan tumaa baa a tã ǹ gɔn lɛa.

²³ Masɛ Arabunaa n má bɛ lɛ din tumaa kɔ kii Davida la. Arabunaa tɔ́n pɛ kii ni. Dɛnaa Lawa mɛn bɛ́ n Lawa lɛa, bɛ die a n wúlu lɛ lɛ si.»

²⁴ Sɛnɛ, kii nə́ n piã á pɛ Arabunaa nɛ: «A giɔ̀mɔ bɛ́ ka màn mɛn nɛ, man giɛ li ma pii bɛ ganaa. Dɛnaa Lawa mɛn bɛ́ maa Lawa lɛa, wúlu màn mɛn a bɔ bɛ́ a ba kaka ma ganaa wa, maa bɛ koe la wa.» Davida belee duwəə ǹ bǎã lɛ laanka diin lɛn pii a lon ǹ dinin wɔrɔ posooro.

²⁵ Davida wúlu bɔ ǹ bǎã dɔ Dɛnaa Lawa wɔ lɛa walan. Á wúlu màn tiɛ̃n laanka barka da ǹ wúlu mànan kɔ Dɛnaa Lawa la. Dɛnaa Lawa tɔ́n dɔlɔ lɛ saa á bɔ gána lɛ mìi ni. Á piɛ̃ busu lɛ nya á bɔ Izirayeli minin lɛn ganaa.