Samayeli2 22 - LAWA A BOO SONBORE

Davida gɔ̀lɔ̀baa ǹ loe mɛn lɔ á barka da Lawa nɛ

¹ Dɛnaa Lawa Davida si a zɔ́ɔn tumaa la ǹ mɛn pinaa, a si Sayulu din la ǹ mɛn pinaa, Davida na á bɛ lɛ a loe lɔ á pɛ:

² Dɛnaa Lawa n ma tamaali lɛa, a din nə maa duru ǹ bǎã lɛa, a din nə maa si sii la wole lɛa.

³ Lawa n ma tamaali lɛa, man kiɛ a din yele. A din nə maa goóro lɛa, a din pàã kɛ n ma kirisibiɛ. A din nə maa baa si a duru ǹ bǎã lɛa. E, ma kirisibaali, ń ma kanbaa min kakaarɛn kɛn ganaa.

⁴ Masɛ n Dɛnaa Lawa para pii. Ma bɛ́ má bíi, má gɔ̀lɔ̀baa si maa zɔ́ɔn lɛn la.

⁵ Gɛ̀ na á goã á n gɔn lɔɔ ma nɛ, a na á n baa mu gole a min kũ lɛa, mà a ma papaã.

⁶ Bǎã babaraa kɛ gɔn na á goã ma ganaa, gɛ̀ na á goã á kan koa ma nyɛɛnɛ.

⁷ Maa fuu gɔ́ɔ̃ nɛ, má lɛ dia Dɛnaa Lawa la, má lɛ dia maa Lawa la. Á n toa a bǎã sonbore kɛ nɛ, á ma lɛ ma, maa lɛ-dɛ kaa a too ne.

⁸ Bɛa biikoo li, tán bìn da, a giala bɔyaa. Lon a bìbìn nə́ bìn da. Maǹ nə́ bìn da, a giala Dɛnaa foo na á yoo.

⁹ A nyin gɔ́ɔ̃ yii n tɛmaa boe, tɛ babaraa n soe a lɛ-n, kun ka tɛ nàn nɛ boe a paǹ yii-a.

¹⁰ Dɛnaa Lawa lon toɛ̃, á gisĩ. Á gisĩ ka labara kaara nɛ a gòãn giulun.

¹¹ A n giã-n lon màn yiikoonaa la, a n piɛ̃ ka nyàa ka na-a, a n yui ka piɛ̃ bɛ́ lɔn.

¹² A na á goã durii-n wɔlɔ tì li. Á bɛ baa a giã ǹ bǎã lɛa. Á labara tìtìn pɛnɛ a din-a, mu bɛ́ labaran mɛnɛn nɛ.

¹³ A bɛ́ tɛ pii die, labaran kɛn man baa sii, la gii kɛ n boe lon kiɛ, a n tɛ pii yɛlɛlɛ yɛlɛlɛ.

¹⁴ Dɛnaa Lawa paraa lon papapã, lon a Lawa gole boo da. La gii kɛ n boe lon kiɛ, a n tɛ pii yɛlɛlɛ yɛlɛlɛ.

¹⁵ Á kiɛ kaã bɔ, á zɔ́ɔn kɛn pɛsɛ̃, á paparaa, á ǹ sasawaa.

¹⁶ Dɛnaa Lawa bɛ́ á gini, a foo bɛ́ á busu á la yii ni, á tàn mu piɛ̃, á kanaa giala da kanaa.

¹⁷ Dɛnaa Lawa nə́ n toa lon, á n gɔn dia. Á ma saa, á ma bɔ mu gole kɛ bii.

¹⁸ Á ma si maa zɔ́ɔ kakan kɛn la, maa zɔ́ɔn mɛnɛn lɛn pàã á ke á la ma nɛ.

¹⁹ Ma pàã tumaa bɛ́ á nya ǹ mɛn pinaa, ǹ nə́ yoo ma gialaa, sɛnɛ, Dɛnaa Lawa daa n dɔ ma lɛ.

²⁰ Á ma si á ma da, a na á ma si á ma da, a giala a tá ma narɛ.

²¹ Dɛnaa Lawa na á ma kũ maa peperebaa li. A na á ma saraa, á kɔnpɛ ka maa sii la baã nɛ.

²² A giala, má kɔ Dɛnaa Lawa a zii lɛ, má kɔ lɛ ka bɔlɔgoondɛnaabaa nɛ, man piã ka maa Lawa lɛ-n wa.

²³ Má n yiri koa a dí-pɛn lɛn li, man piã ka a dùũ siin kɛn nɛ wa.

²⁴ Má n nyɛnaa sii baraa nɛ, a zɛ̀rɛ ba ma ganaa wa.

²⁵ Dɛnaa Lawa na á ma saraa, á kɔnpɛ ka maa peperebaa nɛ, a na á ma saraa, á kɔnpɛ ka maa sii la baã nɛ.

²⁶ Bɛ̀ min mɛn tá bɔlɔgoondɛnaa lɛa, n dɔ n bɔlɔgoondɛnaabaa sii zɛnɛɛ bɛ nɛ. Bɛ̀ min mɛn a sii á pepere, n dɔ n peperebaa sii zɛnɛɛ bɛ nɛ.

²⁷ Bɛ̀ min mɛn nə́ n gɔ́ɔ̃ kaa n nɛ, n dɔ nə n gɔ́ɔ̃ kiɛ bɛa dɛnaa nɛ. Sɛnɛ, bɛ̀ min mɛn nə́ n gɔ́ɔ̃ tii n-a, n dɔ nə ǹ dɛnaa kuĩ a gɔ́ɔ̃ tìbaa li.

²⁸ Min mɛnɛn bɛ́ n dinin gisĩ, n nə n bɛa dɛnan kirisibiɛ. Min mɛnɛn bɛ́ n dinin gole koe, n nə n bɛa dɛnan gisĩ.

²⁹ Taãn nɛ, n din nə toɛ ma yii á koo. Dɛnaa Lawa, maa Lawa, n din nə wɔlɔ fúlu boe ma nɛ.

³⁰ Man die woe zia-baalin gialaa ka n din pàã nɛ. Man die boe ǹ la ka maa Lawa pàã nɛ.

³¹ Lawa din a zii lɛ n pepere, bɛ̀ Dɛnaa Lawa boo mɛn da a n goɛ̃ bɛ-a. A n ka goóro bɛ́ lɔn, min mɛn tumaa bɛ́ kiɛ a yele, a n bɛn tamaɛ.

³² A giala, die kɔsɔ n Lawa lɛa kəni, bɛ̀ n din bie wa, Dɛnaa Lawa? Die kɔsɔ n wɔ tamaɛ, bɛ̀ wɔa Lawa kɛ bie wa?

³³ Bɛa Lawa lɛ n maa duru ǹ bǎã sonbore lɛa. A din nə zii lɛ wɛɛ ma nyɛɛnɛ.

³⁴ A din nə toɛ ma gòã á siɛ ka yuùnun wɔ bɛ́ lɔn. A din nə ma tamaɛ kele la.

³⁵ A din nə ma darɛɛ zia-baa ganaa. A din nə ma darɛɛ sa kaka zuĩ ganaa.

³⁶ N din nə́ n kirisibaa kɔ ma la goóro lɛa. N din gɔn na á n dɔ ma lɛ. N din a bǐɛ̃baa kɛ na á màn da ma li.

³⁷ N din nə toɛ ma gòã á siɛ fufuu, n din pàã nɛ, ma gòã din ba talɛɛ wa.

³⁸ Má maa zɔ́ɔn lɛn loo má dɔ ǹ-a. Bɛ̀ ma ǹ nya wa, ma ba n bɔyɛɛ wa.

³⁹ Man die kɛn pɔpɔsɛ, ǹ nə́ ǹ ba boe la ǹ yoo doo wa. Maǹ die kiɛ tán ma gòãn giulun.

⁴⁰ N din nə́ n ziabaa ǹ pàã kɔ ma la, ń maa zɔ́ɔn lɛn pusu n nə́ ǹ kɔ ma la.

⁴¹ N din nə toɛ maa zɔ́ɔn lɛn tá baa sii ma nyɛɛnɛ. Min mɛnɛn bɛ́ ma biɛ zɔ́ɔ, ma á re bɔ̀n diɛ bɛn-a.

⁴² Ǹ tá re n lɛ dii, min ba re yii a ǹ kirisibaa wa. Ǹ tá re n lɛ dii Dɛnaa Lawa ganaa, a re ǹ lɛ sii wa.

⁴³ Má ǹ suu ka gusuũ bɛ́ lɔn piɛ̃ li, má tɔtɔrɔ ǹ la ka bɛrɛɛ bɛ́ lɔn zii giala-a.

⁴⁴ Ń ma kanbaa maa zaman kɛa gòãn-dii ganaa. Ń ma koa tɔrɔn mìi la, tɔrɔn mɛnɛn dinin bɛ́ ma a ǹ doɛ̃ wa, bɛn nə́ ke dí nyɛɛ ma nɛ.

⁴⁵ Tiin man kiɛ tán ma giulun. Bɛ̀ má dí pɛ ǹ nɛ lɔn, maǹ ma lɛ sii.

⁴⁶ Gána kɔsɔ minin nə́ ma lɛ wɔ, tiin nə́ ma bebele ǹ nə́ fɔ̃ ma li. Ǹ dinin nə́ soo ǹ duru ǹ bǎãn nɛ, ǹ gɔ̀nɔn nə́ bìn diɛ.

⁴⁷ Dɛnaa Lawa á boe sii la. Ma tamaali ni, ma á barka diɛ nɛ. Lawa n ma kirisibaali lɛa, ma na a din tɔ boe.

⁴⁸ Bɛa Lawa lɛ n maa gɛ̀ dòo boe, a din na á ma koa tɔrɔ kɔsɔn mìi la.

⁴⁹ Dɛnaa Lawa, n din nə ma kanbiɛ maa zɔ́ɔn ganaa, n din nə ma biɛ gɔ̀lɔ̀ lɛa maa zɔ́ɔn kɛn mìi la, n din nə ma kanbiɛ min kakaarɛn kɛn ganaa.

⁵⁰ Bɛ lɛ n ke, Dɛnaa Lawa, ma á re n tɔ boe tɔrɔn bii. Ma á re loe loe, ma n tɔ guguru kɔ nɛ.

⁵¹ Dɛnaa Lawa din kii mɛn bɔ, a din na á sii dadaran zɛnaa, á gɔ̀lɔ̀baa kɔ la. A din kii mɛn koa, a din na á kɔn-narɛɛ gole nyaa bɛ nɛ, Davida laanka a tɔrɔn manɛ yǎa duduu.