Samayeli2 20 - LAWA A BOO SONBORE

Sebaa a gòãn dii Davida ganaa

¹ Giĩ gɛsɛ kɔn na á goã walan, a tɔ n Sebaa. Bikrii mɛn bɛ́ Bɛnzamɛn tɔrɔ lɛa, bɛa nɛgiĩ ni. Asɛ lɛ na á bɛn doa a lɛ-a á pɛ kɛnɛn: Wɔa màn kɔn ba kun ka Davida-n wa. Wɔa sii kɔn ba kun ka Izayii a nɛgiĩ kɛ-n wa. Izirayeli minin lɛn, didie wo piɛ!

² Izirayeli minin lɛn tumaa sawaa ǹ nə́ n bɔ Davida kio, ǹ nə́ kaa Bikrii a nɛgiĩ Sebaa kio. Sɛnɛ, Zudaa minin lɛn sɛn nə lɛ kɔ ǹ nə́ n na ǹ kii lɛ ganaa wa. A kũ Zurdɛ̃ tà lɛ-a ganaa, ǹ nə́ da zii miɛ̃, yǎa Zeruzalɛmu kiwi.

³ Davida nə́ n bɔyaa á daa piɛ Zeruzalɛmu. A goã á lɔ fù mɛn toa piɛ, mà ǹ ga kion walan, á bɛn waa á ǹ kaa kion kɔn nɛ, á min koa ǹ li, bɛ ń giɛ ǹ walan taãn-taãnɛ. Davida din na á goã ǹ laadoo mànan koe ǹ la. Sɛnɛ, a giã kunun ǹ ni doo wa. Ǹ dɔn man nə́ goã kion miɛ̃ ka lɔ giɔɔrɔn manɛ, yǎa á woo kaa ǹ gɛ̀ pinaa lɛ.

⁴ Bɛ kio, kii pɛ Amasaa nɛ: «Lɛ dia Zudaa minin lɛn tumaa la lɛawaa sɔɔ kɛ gɔ́ɔ̃ nɛ. N dinmaa dɔ die n yɛ a bǎã nɛ.»

⁵ Amasaa woo Zudaa minin lɛn tumaa bii. Sɛnɛ, kii Davida biikoo mɛn pɛ nɛ, á kiɛ̃ bɛ la.

⁶ Davida tɔ́n pɛ Abisayii ni: «Kanna kəni, Bikrii a nɛgiĩ Sebaa bɛ́ re màn mɛn zɛnɛɛ wɔsɛn manɛ, bɛ á re baraa koe, a la Abusalɔn wɔ kɛ nɛ. N dinmaa yoo, n maa dí-nyalin kɛn kũ, n Sebaa kio loo, màn mɛn bɛ́ toɛ, a baran duru ǹ bǎã kaka yɛ kiwi kɔn nɛ, n yaa kiɛ̃ papaɛ̃ wɔ la wa.»

⁷ Zoabu a minin lɛn nə́ soo Abisayii kio, ka Krɛti minin laanka Pelɛti tɔrɔn nɛ, ka min mɛn tumaa bɛ́ giĩ lɛa. Ǹ nə́ soo Zeruzalɛmu ǹ nə́ Bikrii a nɛgiĩ Sebaa loo.

⁸ Ǹ bɛ́ kɔlɔ gole kɛ li Gabawɔ̃, Amasaa daa n da ǹ lɛ walan. Mɔnaan mɛnɛn nə goã Zoabu ganaa, a na á maabɛlɛ da bɛn lɛn la, á n bonbon kũ ni. Gɔya sa na á goã a kii ni loɛ-n bɛa maabɛlɛ lɛ ganaa a din bɔsɔ̃-n. Zoabu bɛ́ tɔ we woe, gɔya sa lɛ sɔlɔ a kii ni, á mɛnaa tán.

⁹ Zoabu pɛ Amasaa nɛ: «Dɔɔ̃ngiĩ ganaa, là nyantoro tá n li?» Bɛ kio, á n gusin a gɔn dia, a ná a lɛtoro ka kũ, ka a n die kɔn narɛ ǹ fòo diɛ nɛ.

¹⁰ Zoabu nə n zuməə a ná a gɔya sa mɛn saa ka a gɔsɛ a gɔn nɛ, Amasaa nə n yiri kɔ bɛ li wa. Zoabu gɔya sa lɛ dere a nɔ̀ nɛ, á ná a nàn waa á kaa tán. Zoabu din fɔ̃ gɔya lɛ yii paa wa, Amasaa gã. Zoabu laanka ǹ dɔɔ̃ngiĩ Abisayii wusoo ǹ nə́ Bikrii a nɛgiĩ Sebaa kio loo.

¹¹ Zoabu a minin lɛn goon na á golee Amasaa li á goã pii: «Zoabu sii bɛ́ kɔɔ̃n min mɛn tumaa ganaa, min mɛnɛn tumaa bɛ́ Davida wɔn lɛa, bɛn nə kɔ Zoabu lɛ dɛ!»

¹² Amasaa na á goã n birikəĩ a din mà li zii baãbii. Min mɛnɛn tumaa bɛ́ doe walan, bɛn man nə́ goã golee. Giĩ lɛ bɛ́ á yɛ miɛ̃, a ná a gere lɛ giɛraa á bɔ zii la, á da wuru kɔn nɛ, á mɔnaa kɔ lɛ.

¹³ A bɛ́ á giɛraa á da para li á bɔ zii la, minbuiin lɛ tumaa kɔ Zoabu lɛ ǹ nə́ kiɛ̃, ǹ nə́ Bikrii a nɛgiĩ Sebaa kio loo.

¹⁴ Zoabu Izirayeli minin lɛn bǎã tumaa kaa kɔn la, á woo yǎa Abeli-Bɛti-Maakaa kiwi. Bɛa bǎãn lɛn minin dɔn nə́ n sɔkɔn, ǹ nə́ kɔ lɛ.

¹⁵ Zoabu laanka a minin lɛn tumaa daa Sebaa lɛnpɛnɛ Abeli-Bɛti-Maakaa kiwi. Ǹ nə́ tii kaa kɔn la yǎa a mìi la yoo á dɔ kiwi lɛ a kungɔn li. Zaman mɛn tumaa goã kun ka Zoabu ni, bɛn man nə́ goã kiwi lɛ a kungɔn lɛ giala gɔsiɛ, màn mɛn bɛ́ toɛ, a bɔ a kaa.

¹⁶ Bɛa biikoo li, lɔ sii-dɔ̃li goon nə́ n toa kiwi gɔ́ɔ̃ nɛ, á n lɛ dɛ á pɛ: – Ka n too kɔ, ka n too kɔ! Ka pɛ Zoabu ni mà a n zɔ̃ a dɔ yǎa kànaa. «Ma tá li ma boo da nɛ.»

¹⁷ Zoabu nə́ n zɔ̃ á dɔ a li. Lɔ lɛ nɔ̀n da la: «N din lɛ n Zoabu lɛa ya?» Zoabu ná a lɛ si: «Ma din ni.» Lɔ lɛ tɔ́n pɛ nɛ: «Bǐɛ̃ kɔ n nə n too kɔ maa boo li.» Zoabu ná a lɛ si: «Ma too tá n lon.»

¹⁸ Lɔ lɛ tɔ́n màn da a boo li á pɛ: – Ta á n baa lɔn, lɛlɛ boo kɛ n nə pii: «Ka wo nɔ̀n da Abeli-Bɛti-Maakaa minin la, sii lɛ á re yɔrɔ boe», bɛa sàabiɛ wa.

¹⁹ Là nyantoro bɛ́ kiwi mɛn nɛ, foo bɛ́ doa-n kiwi mɛn ganaa Izirayeli gána nɛ, wɔsɛn dinin kiwi lɛ nɛ. Sɛnɛ, n dɔ n giɛ li mà n bɛa kiwi lɛ yu, bɛ mɛn bɛ́ Izirayeli gána a kiwi dadaran lɛn goon lɛa. Wàa na á baa n tá li n Dɛnaa Lawa gɔn màn ziziɛ̃?

²⁰ Zoabu ná a lɛ si á pɛ nɛ: «Kiwi kɛa yui boo ne, ka a basaã kɔ ma-n nɛ, bɛa taasiɛ ba ma gɔ́ɔ̃-n duduu wa!

²¹ Sii lɛ bie bɛ lɛa wa. Sɛnɛ, Efrayimu kele yii bǎã kɛa min goon na á n gòãn dii kii Davida ganaa. Giĩ lɛ tɔ n Sebaa, Bikrii a nɛgiĩ ni. Ka a dinsɔɔ̃ kũ ka kɔ ma la, ma á re woe man bɔ kiwi lɛ yɔrɔ-a.» Lɔ lɛ tɔ́n pɛ Zoabu ni: «A bɛ́ miɛ̃, ma á re a mìi zuĩ n la ka kungɔn nɛ.»

²² Lɔ lɛ woo dɔ zaman lɛ tumaa li ka a sii-doɛ̃ boo lɛ nɛ, a ná a yɔrɔ nyaa ǹ nɛ. Ǹ nə́ Bikrii a nɛgiĩ Sebaa mìi kuru, ǹ nə́ zũ Zoabu la. Bɛ kio, Zoabu bɛn pɛ. Zia-baalin lɛn nə́ n zɔ̃ ǹ nə́ n bɔ kiwi lɛ ganaa, ǹ nə́ sasawaa, didie woo piɛ. Zoabu sɛ nə́ n bɔyaa á woo kii li Zeruzalɛmu.

Min mɛnɛn nə goã dí nyɛɛ kun ka Davida nɛ

²³ Zoabu na á goã Izirayeli minin lɛn zia-baalin tumaa mìi la. Zoozadaa a nɛgiĩ Benaazaa na á goã Kerɛti minin laanka Pelɛti minin mìi la.

²⁴ Adoramu na á goã pàã dí mìi la. Ayiluudu a nɛgiĩ Zozafati na á goã sɛ́wɔn-tamaali lɛa.

²⁵ Sezaa na á goã sɛ́wɔ-kiɛ̃li lɛa. Sadɔki laanka Abiataara nɛ, bɛn man nə́ goã wúlu-bɔlen lɛa.

²⁶ Zayirii tɔrɔ Iraa dɔ na á goã Davida a minin lɛn mìilandɛnaa goon lɛa.