Samayeli2 17 - LAWA A BOO SONBORE

Usayii n Ayitofɛli a doree ziziɛ̃

¹ A belebɔ bɛ kio wa, Ayitofɛli pɛ Abusalɔn nɛ: «Toa masɛ giĩ duu fulupaa bɔ, ǹ wo Davida gialaa tèlò kɛ din ni.

² Bɛ̀ á nɔmaa ǹ mɛn waáraa a pàã nya, ma á re n zoɛ̃ ma dɔ a li, ma nyɛ́ɛ da a ganaa. A zaman lɛ tumaa á re n gòã diɛ baa nɛ, ǹ kii lɛ dinsɔɔ̃ toa walan, ma á re kii lɛ dinsɔɔ̃ dii.

³ Man die zɛnɛɛ miɛ̃, màn mɛn bɛ́ toɛ, zaman lɛ tumaa wusoo ǹ nə n bɔyaa ǹ da n din li. A giala, n bɛ́ giɛ min mɛn lɛ li, bɛ̀ gɔn dɔ bɛ lɛ ganaa, zaman lɛ tumaa á re n bɔyɛɛ ǹ daa, ǹ tumaa dɔ á re goɛ̃ là nyantoro la.»

⁴ Bɛa boo lɛ kɔɔ̃n kɔ Abusalɔn laanka Izirayeli min golen tumaa ganaa.

⁵ Sɛnɛ, Abusalɔn wusoo á pɛ: «Ka wusoo ka Arkaan giĩ Usayii bíi a daa, màn mɛn bɛ́ toɛ, wɔ a dɔ lɛ gɔ́ɔ̃ ǹ boo ma.»

⁶ Usayii bɛ́ á dɔ Abusalɔn li, Abusalɔn Ayitofɛli a da ǹ boo lɛ saa á pɛ nɛ. Bɛ kio, á tɔ́n nɔ̀n da la: «Wɔ doamaa nɛ wɔ sii lɛ zɛnaa a kɔnpɛ ka a da ǹ boo lɛ-n hinlaa, wɔ doamaa bie wɔ zɛnaa miɛ̃ wa? N dinmaa boo da bɛ gɔ́ɔ̃ nɛ.»

⁷ Usayii tɔ́n pɛ Abusalɔn nɛ: «Ayitofɛli a doree ke á kɔ kanna, bɛa siĩn wa.»

⁸ Bɛ kio, Usayii pɛ Abusalɔn nɛ: «N dinmaa bɛ́ n di lɛ laanka a minin lɛn doɛ̃: Giĩ foo taãnaan manɛ, kakaarɛ ka yàra nɛn dan mɛn bɛ́ ǹ ná a nɛnyaanan dɛ don. Ka bɛ dɔ nɛ, n di lɛ bɛ́ n zia-baali lɛa lɛlɛndun, a die lɛ koe a waa tán kun ka a zia-baalin lɛn nɛ wa.

⁹ Á ke, a sisiamaa kɛ tá durii-n kele yala kɔn nɛ hinlaa bǎã kɔsɔ nɛ. A giala kɔ li kɛnɛn gɔrɔ, bɛ̀ geren nə́ bɔ wɔsɛn minin kɛn bii, min nə die miɛ, a pɛ mà ǹ nə́ bɔ̀n gole da Abusalɔn kiodɛnan lɛn ganaa.

¹⁰ Bɛ̀ á n baa miɛ̃ dɔn, haalɛ ta zia-baali lɛ mɛn foo n tã ka yàra wɔ bɛ́ lɔn, nyɛ́ɛ á re a dɔ kuĩ. A giala, Izirayeli min tumaa á doɛ̃, mà n di lɛ n giĩ lɛa, a tá-kun wolen lɛn dɔn man zia-baalin lɛa, ǹ tɔ bɔ zia la.

¹¹ Sɛnɛ, ma bɛ́ yiri mɛn koe n la, bɛ n ka kɛ nɛ: Izirayeli minin lɛn, gigiã ka kɔ̀ mu lɛ-a ǹ nyɔɔsɔ̃ bɛ́ lɔn, a saa Dan kiwi ganaa gɔsɛ a lɛ̀gɔn la a wo Bɛɛr-Sebaa yaa, gusin a lɛ̀gɔn la, ǹ tumaa da n sɔkɔn n din li, n dinmaa tɔ wɔ ǹ nyɛɛnɛ, n wo zia lɛ la.

¹² Bɛ̀ á n baa miɛ̃, ta a n bǎã mɛn nɛ, wɔ gɔn tá re doe a ganaa. Bɛ̀ wɔ́ kɔ ǹ lɛ, Davida din ni, ka a tá-kun wolen lɛn nɛ, ǹ kɔn ba re liɛ wa.

¹³ Bɛ̀ ǹ nə́ woo n duru kiwi mɛn nɛ, Izirayeli minin lɛn tumaa biɛn goa ǹ wo kiwi lɛ gialaa ǹ yu. Ǹ biɛn yii a dɔǹ kɔlɔn ganaa, ǹ nə ǹ baã ǹ wo ǹ kaa tà mu li, ń giɛ kɔlɔ goon din ná a yii a nɛ doo, màn mɛn nə́ nyɛɛ, mà kiwi goã kànaa lɛlɛ wa.»

¹⁴ Abusalɔn laanka Izirayeli minin lɛn tumaa tɔ́n pɛ mà Arkaan giĩ Usayii a doree lɛ á soɛ Ayitofɛli wɔ lɛ nɛ. A giala, Dɛnaa Lawa na á goã giɛ li lɛlɛndun a Ayitofɛli a doree sonbore lɛ ziziɛ̃, màn mɛn bɛ́ toɛ, a bɔ̀n da Abusalɔn ganaa.

Davida a Zurdɛ̃ tà kurii boo

¹⁵ Bɛ kio, Usayii doree mɛn kɔ Abusalɔn laanka Izirayeli min golen lɛn la, á bɛ yɔrɔ pɛ wúlu-bɔlen manɛ, Sadɔki laanka Abiataara nɛ. Ayitofɛli dɔ doree mɛn kɔ ǹ la, á bɛ dɔ yɔrɔ pɛ Sadɔki laanka Abiataara nɛ.

¹⁶ Kanna kəni, ka minin dia fufuu, ǹ wo a boo da kii Davida nɛ, ǹ pɛ nɛ: «N nyan toa n lɛ̀ waa diə fúlu kɛ gɔ́ɔ̃-n don wa. Yǎa n woe nyɛɛnɛ. Bɛ bie wa, ǹ tá re n din laanka n minin kɛn tumaa lɛ naɛ bǎã goon.»

¹⁷ Zonaatan laanka Ayimaasi na á goã Ɛn-Rogeli kiwi. Lɔ dí-nyali goon doamaa nɛ a boo lɛ pɛ bɛn manɛ, bɛn dininmaan nə tɔn wo pɛ kii Davida nɛ. A giala, ǹ goã boe la ǹ tá we kiwi lɛ nɛ, min yii-n wa.

¹⁸ Sɛnɛ, tɔntɔraa goon nə́ ǹ yɛ, á woo a boo da Abusalɔn nɛ. Zonaatan laanka Ayimaasi ni, ǹ dinin min paa woo ka baa nɛ, ǹ nə́ dɔ giĩ goon a piɛ Bawurimu kiwi. Tù goon goã bɛa giĩ lɛ a sumu-n. Ǹ nə́ kaa bɛ nɛ.

¹⁹ Giĩ lɛ a lɔ mɔnaa saa á nyɔmaa tù lɛ lalan, á ná a màn nàn sɔɔ nyɔmaa la. Min goã doɛ̃, mà màn kɔn tá a giulun wa.

²⁰ Abusalɔn min mɛnɛn dia, bɛn nə́ kaa lɔ lɛ li kion, ǹ nə́ nɔ̀n da la mà Ayimaasi laanka Zonaatan nə maa? Lɔ lɛ nə́ ǹ lɛ si á pɛ ǹ nɛ mà ǹ nə́ mu kuru ǹ nə́ woo. Ǹ bɛ́ ǹ nə́ ga ǹ li ǹ nə́ fɔ̃, ǹ nə́ n bɔyaa ǹ nə́ woo Zeruzalɛmu.

²¹ Ǹ woo kio, kɛn lɛn nə́ soo tù lɛ nɛ, ǹ nə́ woo a yɔrɔ pɛ Davida nɛ. Ǹ nə́ pɛ Davida-n kɛnɛn: «Ayitofɛli doree mɛn lɛ kɔ Abusalɔn la n wɔ paǹ li, a din lɛ n ka kɛ nɛ. Yoo n zii saa, n tà kuru fufuu.»

²² Davida laanka a tá-kun wolen lɛn tumaa yoo ǹ nə́ zii saa, ǹ nə́ Zurdɛ̃ tà kuru. Wɔlɔ fulu á daa ǹ kɔn yaa, bɛ̀ a ná a tɔn Zurdɛ̃ tà lɛ kuru wa.

²³ Ayitofɛli bɛ́ á yɛ, mà ǹ ba asɛ a doree lɛ a sii zɛnɛɛ wa, á ná a mànan kaa a dundun la, á zii saa á woo piɛ, a din a kiwi. Bɛ kio, a ná a sii tumaa yɔrɔ bɔ a kion minin li, á soo á woo ǹ bɔlɔ da biɛ nɛ. A gɛ̀ kio, ǹ nə ǹ di bĩ yala mɛn nɛ, man ná a dɔ gere bĩ walan.

Davida a tá Mahanayimu

²⁴ Davida woo á dɔ Mahanayimu kiwi. Bɛa biikoo li, bɛ̀ Abusalɔn nə Zurdɛ̃ tà kuri, a din laanka Izirayeli a zia-baalin lɛn tumaa-n kun.

²⁵ Abusalɔn na á goã á Amasaa da zia-baalin lɛn mìi la, Zoabu bǎã nɛ. Amasaa na á goã Izirayeli tɔrɔ Yiitra a nɛgiĩ lɛa, Yiitra mɛn goã kun ka Naasi a nɛlɔ Abigaali ni. Abigaali lɛ dɔɔ̃nlɔ n ka Zoabu ǹ dan Seruzaa nɛ.

²⁶ Abusalɔn laanka Izirayeli minin lɛn nə́ golee Galaati gána-n bɔrɔ.

²⁷ Davida bɛ́ á dɔ Mahanayimu, Moabu tɔrɔ Naasi a nɛgiĩ Sobii mɛn bɛ́ boe Rabaa kiwi, ka Amiyeli a nɛgiĩ Makiiri ni boe Lodebaara kiwi, ka Barzilayii ni boe Regelimu kiwi, Galaati gána nɛ, bɛn nə́ daa mànan kɔ Davida la:

²⁸ Waa ǹ piìn ni, mɔnaan nɛ, donkolonən ne, *belee laanka *ɔrzi ni, wùsu ni ɔrzi tiɛ̃ laanka a paparɛɛ nɛ, dù luu laanka zii tɔrɔ kɔn nɛ

²⁹ ka zoo nyɔɔ nɛ, ka bɔ̀nyaa guguru ni, ka diin nàari ni ka sèren ne. Davida laanka zaman mɛn lɛ goã kun, maǹ nə́ woo bɛ tumaa kɔ ǹ la màn-bii lɛa, a giala, maǹ nə́ goã taasɛ mà zaman lɛ nɔmaa, mà bòo laanka mu boro dɔ́ bɔ ǹ yii ni.