Samayeli2 11 - LAWA A BOO SONBORE

Davida laanka Bati-Seebaa

¹ Lɛ̀ bɛ́ á bɔ, kiin wo zia baa biikoo li, Davida Zoabu dia kun ka a dí-nyalin ni, ka Izirayeli minin lɛn zia-baalin tumaa nɛ. Ǹ nə́ Amɔn tɔrɔn lɛn dɛ, ǹ nə́ ǹ kiwi gole Rabaa kɛ kũ. Sɛnɛ, Davida din giã Zeruzalɛmu.

² Ǹ kɔn pinaa wasamiɛ̃nɛ, Davida yoo á n bɔ tán a waa ǹ piì la, á woo n gòã bɔ kɔn a kiibaa ǹ kion kɛa kala-n. Á n toa kala lɛ la walan, á lɔ goon yɛ n zoe. Lɔ lɛ goã siĩni yɔrɔ-a á la yii ni.

³ Davida nɔmaa á minin dia, mà ǹ wo nɔ̀n da ka a sii ni. Ǹ nə́ tɔ́n pɛ Davida nɛ mà Bati-Seebaa nɛ. Mà Eliamu a nɛlɔ nɛ, mà Ɛti tɔrɔ Urii kɛa lɔ nɛ.

⁴ Davida minin dia mà ǹ wo kũ ǹ da nɛ. Bɛ́ daa yaa bɛ̀ a na á lɔn lɛawaa kɛa *gɔ̀ bɔ a din ganaa, a tɔn belebɔ wa. A bɛ́ á daa, Davida giã kun ni. Bɛ kio, á yoo, á woo piɛ.

⁵ Lɔ lɛ nɔ̀ si. Á minin dia mà ǹ wo pɛ Davida nɛ mà asɛ á nɔ̀ nɛ.

⁶ Davida tɔ́n min dia á woo pɛ Zoabu ni: «Ɛti tɔrɔ Urii dia ma la.» Zoabu Urii dia Davida la.

⁷ Urii bɛ́ á dɔ Davida li, Davida nɔ̀n da la ka Zoabu a sii ni, ka zaman lɛ a sii ni, ka zia lɛ a sii ni.

⁸ Bɛ kio, Davida pɛ Urii ni: «Wo piɛ, n nə n susu boɛɛnɛ.» Urii soo kii a kion. Kii min dia a kio ka màn nɛ, mà ǹ wo kɔ la.

⁹ Sɛnɛ, Urii wo a din a piɛ wa. A na á waa tán kii a kiɛnlɛ-a, kun ka a dɛnaagiĩ a dí-nyalin lɛn tumaa nɛ.

¹⁰ Ǹ nə́ daa pɛ Davida nɛ mà Urii wo piɛ wa dɛ! Davida tɔ́n pɛ Urii ni: «N bie boe zii ni ń daa wa ya? Wàa na á baa n wo piɛ wa?»

¹¹ Urii mà Davida ganaa: «Lawa a *lɛ kɔ kɔn la ǹ goo kɛ nɛ, Izirayeli minin laanka Zudaa minin ni, bɛn giã ǹ bǎã kɔsɔ banban á kiɛ̃ mɔnaa kion kɛ la wa. Maa dɛnaagiĩ Zoabu laanka a kiodɛnan man diə gole kɛ nɛ. Masɛ n yui ma wo piɛ kəni ma màn bii, ma maǹ mi, ma giã kun ka maa lɔ nɛ? A n din yii toa koo, n nə́ tɔn fɔfoã sii, masɛ a bɛa sii kɛ miã zɛnɛɛ wa.»

¹² Davida tɔ́n pɛ Urii ni: «Golee kànaa pelo doo, biɛ̃, ma á re n diɛ n woo.» Urii golee Zeruzalɛmu bɛa pinaa kɛ lɛ nɛ, yǎa a lɛawaa.

¹³ Davida lɛ dia la, ǹ nə́ màn bii kun, ǹ nə́ yɔ mi kun. Davida yɔ gɛgɛ a ganaa yǎa á ná a yii kũ. Urii soo wasamiɛ̃nɛ, á waa tán a piì la kun ka a dɛnaagiĩ lɛ a dí-nyalin ni. A lɛ kɔ á woo piɛ wa.

¹⁴ A lɛawaa baayɛlɛ, Davida sɛ́wɔ kiɛ̃ á wɔ Urii gɔn, mà a wo kɔ Zoabu la.

¹⁵ A boo mɛn kiɛ̃ sɛ́wɔ lɛ nɛ, á ke: «Zia lɛ bɛ́ wɛɛ̃-n bǎã mɛn nɛ, ka Urii da nyɛɛn walan, ka wusoo ka n bɔ a kio, màn mɛn bɛ́ toɛ ǹ dɛ a gã.»

¹⁶ Zoabu din na á goã giɛ kiwi lɛ ganaa. Ziabaa ǹ foo bɛ́ ǹ zɔ̀ɔn lɛn min mɛnɛn lon, a bɛ́ á dɔ̃ mà bɛn tá bǎã mɛn nɛ, á Urii dia walan.

¹⁷ Kiwi minin lɛn nə́ soo, ǹ nə́ woo zia baa Zoabu ganaa. Geren nə́ bɔ zaman lɛ bii, Davida a zia-baalin lɛn bii. Ɛti tɔrɔ Urii lɛ dɔ din nyin goã a nɛ.

¹⁸ Sii mɛn nə n zɛnaa zia lɛ la, Zoabu min dia, mà a wo bɛ tumaa yɔrɔ pɛ Davida nɛ.

¹⁹ A dí mɛn pɛ dia dí-a wole lɛ nɛ, bɛ n ka kɛ nɛ: – Bɛ̀ ń zia lɛ a sii tumaa yɔrɔ pɛ kii ni ń nya,

²⁰ bɛ̀ kii lɛ foo yoo á pɛ: «Wàa na á baa ka n mɔrɔ kiwi lɛ ganaa zia-baa lɛ a biikoo li, ka a doɛ̃ mà ǹ tá n toɛ kungɔn la bɛ̀ ǹ màn zũ wa?

²¹ Die na á Zerubesɛti a nɛgiĩ Abimelɛki dɛ? Lɔ bie á n toa kungɔn la á gii nɛ zũ li wa? A na á gã bɛa yɔrɔ kɛ lɛ la Tebɛsi kiwi. Wàa na á baa ka n mɔrɔ kungɔn lɛ ganaa?» N die n pɛ kii lɛ-n kɛnɛn: «N dí-nyali Urii Ɛti tɔrɔ lɛ dɔ́ gã.»

²² Dia dí-a wole lɛ woo. Zoabu dia ka boo mɛn tumaa nɛ, á daa bɛ tumaa pɛ Davida nɛ.

²³ Dia dí-a wole lɛ pɛ Davida nɛ: «Minin kɛn lɛn pàã na á la wɔ nɛ. Maǹ nə́ soo ǹ nə́ daa zia baa wɔ ganaa don. Sɛnɛ, wɔ́ ǹ loo yǎa kiwi lɛ a kiɛnlɛ-a.

²⁴ Kiɛ-zũlin man nə́ n toa kungɔn la, ǹ nə́ kiɛ kaã bɔ n dí-nyalin lɛn ganaa. Gere gigiã bɔ kii a dí-nyalin lɛn bii. N dí-nyali Urii, Ɛti tɔrɔ kɛ dɔ din gã.»

²⁵ Davida tɔ́n pɛ dia dí-a wole lɛ nɛ: «Wo Zoabu foo taã n pɛ nɛ mà a nyan toa bɛ na a yiri lɔlɔ kɔn wa. Min nə giɛ̃ zia la lɛlɛndun. A wusoo a nə n wen waa a zia baa kiwi lɛ ganaa, a yu.»

²⁶ Urii a lɔ bɛ́ á ma, mà ǹ zuũ Urii lɛ gã, á ná a gɛ̀ wuu pɛ.

²⁷ A bɛ́ á ǹ zuũ lɛ a gɛ̀ koa á nya, Davida min dia á woo kũ á daa nɛ a din a piɛ. A ná a lɔ baa, á nɛgiĩ yɛ a wɔ lɛa. Sɛnɛ, Davida sii mɛn zɛnaa, a kɔɔ̃n kɔ Dɛnaa Lawa ganaa wa.