Samayeli1 7 - LAWA A BOO SONBORE

Izirayeli minin boo Filisiti minin la

¹ Kiriyati-Yarimu kiwi minin nə́ daa Dɛnaa Lawa a goo lɛ saa, ǹ nə́ woo ne. Ǹ nə́ woo ne Abinaadaabu a kion, tenten la, bɛ kio, ǹ ná a nɛgiĩ Eleyazaara bɔ ǹ nə́ koa, mà a ga Dɛnaa Lawa a goo lɛ walan.

² Dɛnaa Lawa a goo lɛ goã Kiriyati-Yarimu á belebɔ, á dɔ lɛ̀ fuə. Bɛ lɛ kio ne, Dɛnaa Lawa sii goã Izirayeli minin tumaa ganaa parsiini.

³ Samayeli tɔ́n pɛ Izirayeli minin lɛn tumaa nɛ: «Bɛ̀ á daa yaa ka n wusii die Lawa-a ka ka foo din tumaa ne, ka lawa soreen lɛn kaa, ka Asitartee nyínin ni. Ka n yɔrɔ dia Dɛnaa Lawa la, ka dí nya a dinsɔɔ̃ nɛ, bɛ kio, ka á re n sii Filisiti minin lɛn la.»

⁴ Izirayeli minin lɛn nə́ Baalin lɛn laanka Asitarteen lɛn kaa, ǹ nə́ dí nya Dɛnaa Lawa dinsɔɔ̃ nɛ.

⁵ Samayeli pɛ: «Ka Izirayeli kuturu lɛ sɔkɔn Misipaa, masɛ n die Dɛnaa Lawa nyankoe kaa lɛa.»

⁶ Ǹ nə́ n lɛ sɔkɔn Misipaa. Ǹ nə́ mu si ǹ nə́ tɔ tán Dɛnaa Lawa yɔrɔ-a, gɔ́ɔ̃ dɔn bii a sii a kɔnboe lɛa. Ǹ nə́ n lɛ sɔɔ bɛa pinaa kɛ lɛ nɛ, ǹ nə́ pɛ bɛa bǎã lɛ nɛ mà ǹsɛn nə́ sã, ǹ nə́ wɔ Dɛnaa Lawa lon! Samayeli na á goã Izirayeli minin lɛn nyɛɛnaan boe Misipaa.

⁷ Filisiti minin lɛn nə́ ma mà Izirayeli minin nə́ goã ǹ nə́ n lɛ sɔkɔn Misipaa. Filisiti minin kiin lɛn nə́ woo Izirayeli minin lɛn gialaa. Izirayeli minin lɛn bɛ́ ǹ nə́ bɛ ma, ǹ nə́ nyɛ́ɛ baa Filisiti minin lɛn manɛ.

⁸ Izirayeli minin lɛn nə́ pɛ Samayeli ni: «N baran n lɛ tã wa! N doa n nə lɛ dɛ Dɛnaa Lawa, wɔa Lawa lɛ ganaa wɔsɛn lɛa, màn mɛn bɛ́ toɛ, a wɔ si Filisiti minin la.»

⁹ Samayeli sère nɛ nyɔ-mili kũ á ná a tumu tã á kɔ Dɛnaa Lawa la *wúlu màn lɛa. Samayeli nə́ n lɛ dɛ Dɛnaa Lawa ganaa, Izirayeli minin lɛa, Dɛnaa Lawa ná a lɛ si.

¹⁰ A Samayeli toa wúlu màn lɛ tiɛ̃, Filisiti minin lɛn nə́ n wɔlɔ kunu kɔ Izirayeli minin ganaa ka zia nɛ. Sɛnɛ bɛa pinaa kɛ lɛ nɛ, Dɛnaa Lawa yoo Filisiti minin lɛn gialaa ka la a paraa gole ne. Á nyɛ́ɛ da ǹ ganaa, Izirayeli minin lɛn nə́ boo ǹ la.

¹¹ Izirayeli minin lɛn nə́ soo Misipaa, ǹ nə́ Filisiti minin lɛn kio loo, ǹ nə́ ǹ dɛ miɛ̃ yǎa ǹ nə́ diri Bɛti-Kaara la.

¹² Samayeli kɔlɔ saa á da tán Misipaa laanka Sɛni kiwi bii ni á ná a tɔ kɔ mà Ebɛn-Ezɛrɛ bɛ̀ á n pii: «Lawa nə́ ǹ dɔ wɔsɛn lɛ yǎa kànaa.»

¹³ Filisiti minin lɛn nə́ yii puusəbaa yɛ. Ǹ wusoo doo ǹ nə́ n gòã da Izirayeli a tán la wa. Samayeli a yiikoonaabaa tumaa gɔ́ɔ̃ nɛ, Lawa a dɔlɔ bɔ Filisiti minin ganaa sàabaa wa.

¹⁴ Filisiti minin nə goã ǹ nə́ kiwi mɛnɛn si Izirayeli minin la, bɛn nə́ wusoo ǹ nə́ dɔ ǹ ganaa. A kũ Ekrɔn ganaa a wo kaa Gaati lɛ, Izirayeli minin nə́ bɛa tánan lɛn si Filisiti minin la. Là nyantoro yɛ Izirayeli minin laanka Amɔɔrɔ tɔrɔn bii ni.

¹⁵ Samayeli Izirayeli minin sii yɔrɔ bɔ a yiikoonaabaa tumaa gɔ́ɔ̃ nɛ.

¹⁶ Lɛ̀ tunaa nɛ, a na á goã n biĩ, a wo Betɛli, a kiɛ̃ a wo Gilgaali kiwi laanka Misipaa kiwi. A na á goã Izirayeli minin sii yɔrɔ boe bɛa bǎãn kɛn lɛn tumaa nɛ.

¹⁷ Bɛ kio, a na á goã n bɔyɛɛ a wo Ramaa kiwi, a giala, a kion na á goã walan. A na á goã Izirayeli minin sii yɔrɔ boe walan lɛ nɛ, á *wúlu bɔ ǹ bǎã dɔ dɔ a nɛ, Dɛnaa Lawa wɔ lɛa.