Samayeli1 6 - LAWA A BOO SONBORE

Lɛ kɔ kɔn la ǹ goo lɛ a bɔyaa

¹ Dɛnaa Lawa a goo lɛ goã Filisiti minin bǎã nɛ, á dɔ mui sɔbaa.

² Filisiti minin lɛn nə́ lɛ dia wúlu bolen laanka wɔ-kũlin la, ǹ nə́ pɛ ǹ nɛ: «Wɔsɛn man die Dɛnaa Lawa a goo lɛ biɛ lɔn? Wɔ bɛ́ re siɛ lɔn wɔ tɔn dia a bǎã nɛ, ka bɛ nyaa wɔsɛn manɛ.»

³ Ǹ nə́ tɔ́n pɛ: «Bɛ̀ ka tá Izirayeli a Lawa a goo lɛ diɛ, ka baran a gɔ́ɔ̃ kooro dia wa, sɛnɛ, ka n yiri kɔ, ka sii baraa sawaa ǹ *wúlu màn dia la. Bɛ n die n biɛ kaa kakabaa yɛ lɛa. Màn mɛn dɔ toa Lawa goã n niɛ kaa dɔlɔ bɔma-a wa, ka á re bɛ doɛ̃.»

⁴ Filisiti minin lɛn nə́ nɔ̀n da: «Wɔ doa nɛ wɔ wàa kɔ la, wɔa sii baraa sawaa ǹ wúlu màn lɛa.» Ǹ nə́ tɔ́n nə ǹ lɛ si: «Filisiti minin kiin lɛn dinin bɛ́ lɔn min sooro, ka màn nyín sooro zɛnaa ka sana nɛ, gɔ̀nɔn kokoree busu a konboe lɛa, ka kɛ́n sooro nyín zɛnaa ka sana nɛ. A giala, a din fuu goon na á goã ka tumaa mìi ni ka kaa kiin ni.

⁵ Ka nyínin zɛnaa kaa gɔ̀nɔn kokoree busu lɛ a kɔnboe lɛa. Kɛ́nɛn mɛnɛn dɔn nə́ goã bɔ̀n diɛ kaa gána lɛ-a, ka bɛn dɔn nyín zɛnaa ka gugurubaa kɔ Izirayeli a Lawa la: Kɔntan, á die kaa dɔlɔ bɔma-a lɛ diɛ, ka dinin ni, kaa dìn ni ka kaa gána nɛ.

⁶ Wàa na á baa ka tá li ka n foo laa, ka *Faarahɔn laanka Ezipti minin nə́ ǹ wɔ laa lɔn? Lawa bɛ́ á bɔ ka yii ni biikoo mɛn li, ka Izirayeli minin lɛn toa walan, ǹ nə́ woo wa?

⁷ Sisia kəni. Ka wotoro dii zɛnaa, ka dii nɛ ǹ dan paa kũ, gɔn bɛ́ a tɔn nə n da ǹ mɛnɛn wìi li wa. Ka wotoro lɛ da dii daanan lɛn ganaa, ǹ nɛn mɛnɛn bɛ́ ǹ kio, ka wusoo ka da ka bɛn nɛ zàã nɛ.

⁸ Ka die ka Dɛnaa Lawa a goo lɛ saa ka da wotoro lɛ la. Ka bɛ́ re sana mànan mɛnɛn koe la sii baraa sawaa ǹ wɔn lɛa, ka ǹ kaa goo boɛɛn nɛ, ka da goo lɛ genli ka tɔn toa a woo.

⁹ Ka n yiri kɔ li, bɛ̀ á ná a gána zii saa, á n yɔrɔ dia Bɛti-Semɛsi kiwi li, ka dɔ̃ mà Dɛnaa Lawa din na á sii baraa gole kɛ zɛnaa wɔsɛn manɛ. Bɛ̀ a n baa miɛ̃ wa, wɔ á re doɛ̃ wáa a sii kɔn zɛnaa wɔ-n wa, sɛnɛ sii na á goa á wɔ yɛ tapaan nɛ.»

¹⁰ Minin lɛn nə́ zɛnaa a yɔrɔ li. Ǹ nə́ dii nɛ ǹ dan paa kũ, ǹ nə́ ǹ kaa wotoro lɛ-a, ǹ nə́ ǹ nɛn toa zàã nɛ.

¹¹ Dɛnaa Lawa a goo lɛ nɛ, ka kɛ́n nyín sanadɛnan lɛn laanka gɔ̀nɔn kokoree busu nyínin lɛn bɛ́ goo boɛɛn mɛn nɛ, ǹ nə́ bɛn kaa wotoro lɛ la.

¹² Dii daanan lɛn nə́ Bɛti-Semɛsi zii saa turuu ni, ǹ nə́ kɔ a din zii goon lɛ lɛ miɛ̃ ka lɛ baa nɛ, ǹ kanaa ǹ nə́ woo gusin wa, ǹ wo gɔsɛ wa. Filisiti minin kiin lɛn nə́ kɔ wotoro lɛ lɛ, yǎa Bɛti-Semɛsi gèlè la.

¹³ Bɛti-Semɛsi minin man nə́ goã ǹ *belee kuri don, nyankɔrɔ basa kɛ nɛ. Ǹ nə́ ǹ mìi saa lon ǹ nə́ ga, ǹ nə́ goo lɛ yɛ, a yɛ nyɛnyɛɛ da ǹ ganaa.

¹⁴ Wotoro lɛ dɔ Bɛti-Semɛsin Zozoe a wuru-n, á golee walan kɔlɔ gole goon genli. Ǹ nə́ wotoro lɛ a gɔn yu, ǹ nə́ dii daanan lɛn tã wúlu màn lɛa ǹ nə́ kɔ Dɛnaa Lawa la.

¹⁵ Sana mànan nə goã màn mɛn nɛ goo lɛ genli, *Levii tɔrɔn nə́ goã ǹ nə́ bɛ laanka Dɛnaa Lawa a goo lɛ saa ǹ nə́ da tán. Ǹ nə́ ǹ kaa kɔlɔ gole lɛ la. Bɛa pinaa kɛ lɛ nɛ, Bɛti-Semɛsi minin nə́ wúlu mànan dɛ, ǹ nə́ ǹ tã Dɛnaa Lawa wɔ lɛa.

¹⁶ Filisiti minin kii sooro lɛ bɛ́ á bɛ yɛ ǹ nə́ ǹ bɔyaa ǹ nə́ woo Ekrɔn a din pinaa.

¹⁷ Filisiti minin lɛn nə wúlu mànan mɛnɛn kɔ Dɛnaa Lawa la, ǹ sii baraa sawaa ǹ wɔn lɛa bɛn nə́ ke: Asidɔdi kiwi wɔ n goon, Gaazaa kiwi wɔ n goon Asikalɔn wɔ n goon, Gaati wɔ n goon, Ekrɔn wɔ n goon.

¹⁸ Filisiti minin kii min sooro lɛn kiwin lɛn dinin lɛ bɛ́ lɔn, kungɔn tá pɛnɛɛ nɛ kiwi lɛ ganaa hinlaa kungɔn ba pɛnɛɛ nɛ a ganaa wa, ǹ tumaa kɛ́n nyín sanadɛnaa kɔ. Ǹ Dɛnaa Lawa a goo da kɔlɔ gole mɛn la, bɛ n siére lɛa, á n koa bɛa siin kɛn lɛn tumaa la. Bɛa kɔlɔ lɛ tá tɔn na a tan Bɛti-Semɛsi kiwi min Zozoe a wuru-n haalɛ tɔn pelo.

¹⁹ Dɛnaa Lawa dɔlɔ bɔ Bɛti-Semɛsi minin ganaa, a giala, ǹ nə́ goã ǹ nə́ n yiin doa Dɛnaa Lawa a goo lɛ la. Zaman duu posooro bii a na á min pɔsɔbaa dɛ. Zaman lɛ foo ziziɛ̃ bɛn lɛn gɛ̀ taman yii, a giala, Lawa na á dɔlɔ gole bɔ ǹ ganaa.

²⁰ Bɛti-Semɛsi minin nə́ pɛ: «Die n die boe la a golee Dɛnaa Lawa yɔrɔ-a, bɛa Lawa *yoreen kɛ lɛ? A n die woe dien li, a n bɔ wɔsɛn li.»

²¹ Ǹ nə́ minin dia maǹ wo pɛ Kiriyati-Yarimu minin manɛ kɛnɛn: «Filisiti minin nə́ n gɔn bɔ Dɛnaa a goo lɛ-a, ka da saa ka wo ne ka li.»