Samayeli1 4 - LAWA A BOO SONBORE

Filisiti minin man Dɛnaa Lawa a lɛ kɔ kɔn la ǹ goo sii

¹ Samayeli a boo lɛ yɔrɔ na á goã dia-n Izirayeli minin tumaa la. Izirayeli minin nə́ woo kɔ Filisiti minin lɛ ka zia nɛ. Izirayeli minin nə́ giã kunu Ebɛn-Ezɛrɛ ganaa, Filisiti minin lɛn man nə́ goã Afɛki.

² Filisiti minin lɛn nə́ n tele Izirayeli minin li ka zia nɛ. Zia lɛ wɔ̃. Filisiti minin lɛn nə́ boo Izirayeli minin la, ǹ nə́ min duu sii kɛ miã dɛ zia lɛ la.

³ Zaman lɛ woo ǹ giã ǹ bǎã nɛ. Izirayeli a min zizin man nə́ goã pii kɛnɛn: «Wàa na á baa Dɛnaa Lawa toa Filisiti minin nə́ boo wɔsɛn la pelo? Ka n tá, wɔ wo Dɛnaa Lawa a *lɛ kɔ kɔn la ǹ goo kɛ saa Siiloo: A kiɛ̃ a da wɔsɛn bii, a wɔ si wɔa zɔ́ɔn la.»

⁴ Dɛnaa Lawa Pàãyiidɛnaa mɛn lɛ bɛ́ lon màn yiikoonaa nyínin mìi la, zaman lɛ minin dia ǹ nə́ woo bɛa lɛ kɔ kɔn la ǹ goo lɛ saa Siiloo. Elii a nɛgiĩ min paa lɛ, Ɔfunii laanka Fineyasi ni, bɛn nə́ goã Lawa a lɛ kɔ kɔn la ǹ goo lɛ diɛ zii.

⁵ Dɛnaa Lawa a lɛ kɔ kɔn la ǹ goo lɛ bɛ́ á dɔ ǹ giã ǹ bǎã nɛ lɔn gɔrɔ Izirayeli minin lɛn tumaa nə́ n lɛ dɛ parsiini, yǎa tán bìn da.

⁶ Filisiti minin nə́ lɛ-dɛ lɛ ma, ǹ nə́ tɔ́n pɛ: «Wàa dɔ lɛ-dɛ gole n ke boe *Ebrəə minin bǎã nɛ?» Ǹ nə́ dɔ̃ mà Dɛnaa Lawa a goo lɛ dɔ giã ǹ bǎã lɛ nɛ.

⁷ Nyɛ́ɛ Filisiti minin lɛn kũ, a giala, maǹ nə́ goã pii, mà lawa kɔn ná á daa giã ǹ bǎã lɛ nɛ, mà koe bɔ ǹsɛn ganaa! Bɛ kio ǹ nə́ pɛ kɛnɛn: «A giala, kɛ miã tɔn nə n zɛnaa bɔrɔ wa.

⁸ Koe bɔ wɔsɛn ganaa! Die n die wɔ sii bɛa Lawa Pàãdɛnaa kɛ la? A din lɛ na á bɔ̀n tɔrɔ tumaa da Ezipti minin ganaa diə gole nɛ.

⁹ Filisiti minin lɛn ganaa, ka n gù we yii, ka giĩbaa zɛnaa bɛ́ bie wa, n wɔ dɔn yaa kiɛ̃ kanna Ebrəən lɛn bɛ̀rɛn biɛ ka ǹ bɛ́ ǹ nə́ goã wɔsɛn wɔn lɛa lɛlɛ lɔn. Ka toa ka goã giĩn lɛa, ka zia baa.»

¹⁰ Filisiti minin lɛn nə́ zia baa. Ǹ nə́ boo Izirayeli minin la, ǹ didie nɔmaa á n gòã da baa nɛ á woo a mɔnaa kion. Zia lɛ baraa kɔ Izirayeli minin ganaa parsiini, ǹ giĩ duu pɔsɔɔ na á goã a nɛ.

¹¹ Filisiti minin nə́ Lawa a goo lɛ si. Elii a nɛgiĩn lɛn: Ɔfunii laanka Fineyasi ni, ǹ paanan gã.

Elii laanka ǹ manaa a gɛ̀

¹² Giĩ goon ne, Bɛnzamɛn tɔrɔ nɛ, á n toa zia bǎã lɛ nɛ ka baa nɛ á daa dɔ Siiloo a din pinaa. Foo ziziɛ̃ taman yii, a mɔnaan man nə́ goã tɔtoɛ̃ nɛ, a mìi yii n tii lɛa.

¹³ A bɛ́ doe ǹ mɛn waáraa, Elii na á goã giã-n tán a dankan nɛ, zii para-a, n yii diɛ, a giala, a ná goã ǹ gɔ́ɔ̃ bii ka Lawa a goo lɛ nɛ. Bɛa giĩ lɛ boo lɛ saa kɛnɛn á pɛ kiwi gɔ́ɔ̃ nɛ, kiwi lɛ tumaa nə́ ń lɛ da lɛ-dɛ nɛ.

¹⁴ Elii lɛ-dɛ lɛ ma á tɔ́n nɔ̀n da: «Zaman kɛa lɛ-dɛ mìi n ka wàa nɛ?» Giĩ lɛ nə́ n nanaa á daa boo lɛ giala pɛ Elii ni.

¹⁵ Elii lɛ̀ na á goã lɛ̀ pɔmanangɔrɔ ka kiwisi (98). A yii pàã goã á nya, a yii goã boe la á wɔlɔ yii wa.

¹⁶ Giĩ lɛ pɛ Elii ni: «Ma din ni boe zia bǎã lɛ nɛ. Man má n gòã da baa nɛ zia bǎã lɛ nɛ pelo dinin.» Elii nɔ̀n da la: «Maa nɛ ganaa, a na á n baa lɔn?»

¹⁷ Dí-pɛli lɛ ná a lɛ si: «Izirayeli minin nə́ n gòã da baa nɛ Filisiti minin nyɛɛnɛ, bɔ̀n gole din zaman lɛ yɛ, n nɛgiĩ min paa lɛ dɔ́ gã: Ɔfunii laanka Fineyasi. Ǹ nə́ Lawa a goo lɛ dɔ si.»

¹⁸ A lɛ bɛ́ á dɔ Lawa a goo lɛ a boo ganaa lɔn gɔrɔ, Elii bɔ a dankan la á mɛnaa a làfu la tán kiɛnlɛ-a, a dungiala wuru, á gã. A giala, a na á goã giĩ zizi lɛa, gù kidɛnaa lɛa guguru. Elii goã á dɔ lɛ̀ pusi, sii yɔrɔbole lɛa Izirayeli gána nɛ.

¹⁹ Elii ǹ manaa mɛn bɛ́ Pineyasi a lɔ lɛa, bɛ́ goã min guguru lɛa, a gisĩ biikoo goã á dɔ á nya. Lawa a goo lɛ a si boo kaa a too-n lɔn, ka ǹ zuũ di laanka ǹ zuũ a gɛ̀ boo ne, nɔɔrɔ kũ, a din bǎã nɛ, á gisĩ.

²⁰ A bɛ́ giɛ mà a gã, lɔn mɛnɛn nə goã a li bɛn nə́ nɔmaa ǹ nə́ pɛ nɛ: «Nyɛ́ɛ baran n kũ wa, a giala, n nə́ n nɛginin yɛ!» Sɛnɛ a n lɛ tã, a bɛ da sii li wa.

²¹ A ná a nɛ lɛ tɔ kɔ: "Ikabodi" bɛ giala mà gugurubaa banban doo wa. Á pɛ: «Gugurubaa wɔlɔ lui Izirayeli ganaa.» A giala, ǹ nə́ Lawa a goo lɛ si, ǹ zuũ di laanka ǹ zuũ dɔ gã.

²² Á goã á pɛ: «Gugurubaa wɔlɔ lui Izirayeli ganaa, a giala ǹ nə́ Lawa a goo lɛ si.»