Samayeli1 30 - LAWA A BOO SONBORE

Izirayeli minin zia da Amalɛki tɔrɔn ganaa

¹ Lɛawaa sɔɔ bɛ kio, Davida laanka a minin nə́ dɔ Siklagi kiwi. Bɛ́ dɔ daa yaa, bɛ̀ Amalɛki tɔrɔn nə́ daa soo Zudaa gána a gusin a lɛ̀gɔn la, ǹ nə́ kɔ Siklagi kiwi lɛ ka zia nɛ. Ǹ nə́ bɔ̀n da a ganaa, ǹ nə́ tɛ da a ganaa.

² Ǹ nə́ kiwi lɛ a lɔn kũ, ka a nɛnyaanan laanka a min dadaran nɛ, sɛnɛ ǹ min dɛ wa. Ǹ minin mɛnɛn lɛn kũ, ǹ nə́ wusoo ǹ nə́ ǹ zii saa, ǹ nə́ woo ka bɛn nɛ.

³ Davida laanka a minin bɛ́ ǹ nə́ dɔ kiwi lɛ nɛ, ǹ nə́ yɛ mà minin nə́ tɛ da a ganaa, ǹ nə́ woo ka ǹ lɔn nɛ, ǹ nɛgininin ni ka ǹ nɛlɔn nɛ.

⁴ Davida laanka ǹ miãn lɛn nə́ kaa wuu ni. Ǹ nə́ wuu pɛ miɛ̃, yǎa pàã din ba ǹ lon doo ǹ tá wuu pii wa.

⁵ Minin lɛn nə́ goã ǹ nə́ Davida a lɔ min paa lɛ kũ: Zizereyɛli nɛ Ayiinoamu lɛ nɛ ka Abigayili ni, Naabaali a lɔ zizi ke boe Karmɛli kiwi.

⁶ Nyɛ́ɛ gole goã Davida ganaa, a giala, minin lɛn man nə́ goã pii, mà ǹ dɛ ka kɔlɔ nɛ. Didie foo na á goã busi parsiini bɛ̀ á n yiri kɔ ka a nɛgininin laanka a nɛlɔn nɛ. Sɛnɛ, Dɛnaa Lawa barka nɛ, Davida a Lawa lɛ, Davida foo wusoo á taã.

⁷ Lawa a wúlu-bɔle Abiataara lɛ, Ayimelɛki a nɛ lɛa, Davida pɛ-n kɛnɛn: «Bǐɛ̃ kɔ n da ka Lawa a dí nya ǹ mànan lɛn nɛ!» Abiataara daa ǹ kɔ Davida la.

⁸ Davida nɔ̀n da Dɛnaa Lawa la kɛnɛn: «Bɛ̀ masɛ sɔraasin kɛn kio loo, ma á die doe ǹ ganaa?» Dɛnaa Lawa pɛ nɛ: «Ǹ kio loo. N tá re doe ǹ ganaa n nə minin lɛn si, n nə ǹ kaa.»

⁹ Davida woo kun ka ǹ miã min biɛsɔrɔ nɛ (600), ǹ nə́ dɔ Besɔɔrɔ pɛrɛ lɛ-a, ǹ min gialakunun nə́ golee walan.

¹⁰ Sɛnɛ Davida sɛ goã sɔraasin lɛn kio miɛ̃ kun ka min biɛsii ni (400). Nɔmaa na á toa min biɛpaa (200) Gialakun kɛ boo la ǹ nə́ Besɔɔrɔ pɛrɛ lɛ kuru wa, bɛ lɛ nɛ ǹ nə́ gole walan.

¹¹ Ǹ nə́ Ezipti giĩ goon yɛ don ǹ nə́ kũ ǹ nə́ daa nɛ Davida li. Ǹ nə́ buuru kɔ la á sɔ̃, ǹ nə́ mu kɔ la á mi.

¹² Ǹ nə́ rezɛ̃ laa san paa laanka ǹ gɔ́rɔ laa kɔ̀n kɔ la. A màn bii a nya kio, a yii toɛ̃, a giala, a goã á man bii wa, a goã á mu mi wa yǎa tèlò sɔɔ laanka lɛawaa sɔɔ.

¹³ Davida pɛ nɛ: «Die a min ni n ni, ma n boe bǎã mɛn nɛ?» Á n toa: «Man Ezipti tɔntɔraa lɛa, man Amalɛki tɔrɔ goon a bɛ̀rɛ lɛa. A lɛawaa sɔɔ n ke maa dɛnaagiĩ nə́ n la bɔ ma ganaa, a giala, man ma goã lon wa.

¹⁴ Wɔsɛn dinin man ke, wɔ́ goã wɔ kɔ Keriti minin bǎã a gusin a lɛ̀gɔn lɛ ka zia nɛ, Zudaa gána a gusin a lɛ̀gɔn la. Wɔ́ kɔ Kalɛbu a tanlɛ minin bǎã dɔ a gusin a lɛ̀gɔn lɛ, wɔ́ tɛ da Siklagi kiwi ganaa.»

¹⁵ Davida pɛ nɛ: «N tá re lɛ koe n wo ka masɛ nɛ bɛa sɔraasin lɛn bǎã nɛ?» Á Davida lɛ si: «N liɛ masɛ nɛ ka Lawa tɔ nɛ, mà n ba re ma dii wa, mà n ba re ma we maa dɛnaagiĩ lɛ gɔn wa. Bɛ̀ á re n zɛnɛɛ miɛ̃, ma á re woe n ne bɛa sɔraasin lɛn bǎã nɛ.»

¹⁶ Á tɔ́n woo Davida koa ǹ li. Amalɛki tɔrɔn lɛn man nə́ goã pɛsiɛ̃ nɛ gána lɛ paǹ yii-a, bɛ̀ ǹ tá màn bii, màn mii, ǹ màn damata mɛn si Filisiti gána laanka Zudaa gána nɛ, bɛ̀ ǹ tá zɔ́n zɛnɛɛ ka bɛn nɛ.

¹⁷ A saa baayɛlɛ yiisoon ganaa, Davida nə́ ǹ dɛ miɛ̃ yǎa bɛa lɛawaa wasamiɛ̃nɛ. Min kɔn nə n si á la wa, bɛ̀ á n bɔ min ten biɛsii (400) n ke, bɛn nə́ dii nyɔɔmaan la ǹ nə́ baa si.

¹⁸ Amalɛki tɔrɔn lɛn nə màn mɛn yii goa, Davida wusoo á bɛn yii si, á ná a lɔ min paa lɛ dɔ si.

¹⁹ Min kɔn nə n bɔ ǹ lɛ wa. A n bɔ ǹ dadaran lɛ wa, a n bɔ ǹ bɔnboɛɛnɛn lɛ wa, a n bɔ ǹ nɛgininin laanka ǹ nɛlɔn lɛ wa. Ǹ goã ǹ nə́ màn mɛn yii goa ǹ nə́ woo ne, màn nə n bɔ bɛ kɔn lɛ wa. Davida nə́ n bɔyaa ka a yii tumaa nɛ.

²⁰ Davida tɔɔ dadaran laanka a bisinin tumaa si. Min mɛnɛn nə goã tɔ we tɔɔn lɛn nyɛɛnɛ, ǹ nə́ woe ǹ ne, maǹ nə́ goã pii: «Davida a bɔ zia la ǹ mànan nə́ ke.»

²¹ Davida woo dɔ min biɛpaa lɛ li, ǹ mɛnɛn lɛn bɛ́ ǹ nə́ goã ǹ nə́ nɔmaa á la yii ni kɔ Davida lɛ ganaa, á tɔ́n nə ǹ toa Besɔɔrɔ pɛrɛ lɛ-a. Ǹ nə́ soo ǹ nə́ n da Davida laanka a minin lɛ. Davida nə́ n mɔrɔ kun ka a minin ni á fòo da ǹ nɛ.

²² Min mɛnɛn nə goã ǹ nə́ woo kun ka Davida nɛ, min baraan laanka min kɔrɔn mɛnɛn yii tumaa goã ǹ bii, bɛn nə́ n lɛn saa lon ǹ nə́ pɛ: «Ǹ bɛ́ ǹ bie ǹ nə́ daa kun ka wɔsɛn nɛ wa, wɔ wusoo wɔ́ mànan mɛnɛn si, bɛ kɔn ba miɛ̃ ǹ nɛ wa, bɛ̀ á n bɔ ǹ lɔn laanka ǹ nɛnyaanan nɛ. Ǹ die ǹ bɛn lɛn kũ, ǹ nə n ta ǹ nɛ!»

²³ Sɛnɛ Davida pɛ: «Ma dɔɔ̃nɔn lɛn, Dɛnaa Lawa màn mɛn kɔ wɔ la, ka baran n baa bɛ la kɛnɛn wa. A giala, Dɛnaa Lawa din na á wɔ tamaa, sɔraasin mɛnɛn nə́ goã ǹ nə́ daa wɔsɛn gialaa, a din na á ǹ wɔ wɔ gɔn.

²⁴ Ka bɛ́ màn mɛn diɛ, die n boe la a lɛ kɔ bɛ ganaa? Min mɛn wo zia la, bɛ wɔ gii doamaa nɛ a goã goon ka min mɛn nə́ ke á goã guĩn li: Ǹ yii n gii kɔn.»

²⁵ A kũ bɛa pinaa kɛ lɛ ganaa, Davida bɛ baa landa lɛa, á ná a zɛnaa baa pàã lɛa Izirayeli minin lɛn ganaa. Bɛa sii lɛ tá tɔn a giala la haalɛ pelo.

²⁶ Davida bɛ̀ á dɔ Siklagi kiwi, ǹ mànan mɛnɛn si, á bɛ kɔn pɔrɔ á dia a giaáran Zudaa min golen la, á pɛ ǹ nɛ kɛnɛn: «Mànan mɛnɛn nə n si Dɛnaa Lawa a zɔ́ɔn la, bɛ kɔn nə́ ke man bǐɛ̃ biɛ ka la nɛ.»

²⁷ Á ǹ kɔn dia Betɛli minin la, á ǹ kɔn dia Ramaa minin la Zudaa a gusin a lɛ̀gɔn la, á n kɔn dia Zaatiiri minin la,

²⁸ á dia Zatibi kiwi minin la, á dia Aroɛɛrɛ kiwi minin la, á dia Sifumɔɔti kiwi minin la, á dia Ɛsitemaa minin la,

²⁹ ka Rakaali minin ni. Á dia Zeraameli a tanlɛ minin la, á dia Kenii tɔrɔn la,

³⁰ ka min mɛnɛn bɛ́ Ɔrmaa kiwi, Booraasan kiwi, Ataasi kiwi

³¹ ka Ebrɔn kiwi ni. Davida laanka a minin nə bɔ bǎãn mɛnɛn tumaa nɛ, á ǹ dia walan nɛ.