Samayeli1 3 - LAWA A BOO SONBORE

Samayeli a bíi

¹ Samayeli bɛ́ tɔn ten, a na á goã Dɛnaa Lawa a dí nyɛɛ Elii giulun. Bɛa biikoo li, Lawa goã boo diɛ pataa wa, sii-nyaa dɔ goã yii papaa wa.

² Ǹ kɔn pinaa tèlò-n Elii na á goã waa-n tán a babaraa a bǎã nɛ, bɛ á zɛnɛɛ bɛ̀ a yiin manə n koɛ nɛ, ǹ ba wɔlɔ yii taãn doo wa.

³ Lɛ kɔ kɔn la ǹ goo lɛ goã bǎã mɛn nɛ, Samayeli dɔ́ goã waa-n tán walan, Dɛnaa Lawa a kion kɛ nɛ, bɛ̀ ǹ tɔn Lawa a bolon lɛ nimi bɔrɔ wa.

⁴ Bɛa biikoo li, Dɛnaa Lawa lɛ dia Samayeli la. Á n nyəə mà asɛ á ke.

⁵ Á baa si á woo Elii li á pɛ nɛ: «Ń bɛ́ ń lɛ dia masɛ la, ma á ke» Elii ná a lɛ si: «Masɛ lɛ dia n la wa. Wusoo n wo waa tán.» Á woo waa tán.

⁶ Dɛnaa Lawa wusoo á lɛ dia Samayeli la doo. Samayeli yoo á woo Elii yaa, á pɛ nɛ: «Ń bɛ́ ń lɛ dia ma la, ma á ke.» Samayeli ná a lɛ si: «Maa nɛgiĩ ganaa, masɛ lɛ dia n la wa. Wusoo n wo waa tán.»

⁷ Bɛa biikoo li, bɛ̀ Samayeli tɔn Dɛnaa Lawa dɔ̃ bɔrɔ wa. Bɛ̀ Dɛnaa Lawa din bin tɔn boo da-n wa.

⁸ Dɛnaa Lawa wusoo doo, á lɛ lɛ a sɔɔbaa ǹ wɔ dia la. Samayeli yoo, á woo Elii yaa. Á pɛ nɛ: «Ń bɛ́ ń lɛ dia ma la, ma á ke.» Bɛa waáraa, Elii tɔ́n dɔ̃, mà Dɛnaa Lawa n lɛ diɛ nɛnyaan lɛ la.

⁹ Elii pɛ Samayeli ni: – Wusoo n wo waa tán. Bɛ̀ a lɛ dia n la kɛ kio, n pɛ nɛ: «Dɛnaa Lawa, boo da, n bɛ̀rɛgiĩ too tá n lon.» Bɛ kio, Samayeli woo waa tán a lɛlɛ a bǎã nɛ.

¹⁰ Dɛnaa Lawa daa, á golee bii-a. A goã lɛ diɛ lɔn, á dia miɛ̃ doo: «Samayeli, Samayeli!» Samayeli ná a lɛ si: «Boo da, n bɛ̀rɛgiĩ too tá n lon.»

¹¹ Dɛnaa Lawa tɔ́n pɛ Samayeli ni: «Á ke, man die sii kɔn zɛnɛɛ Izirayeli minin bii, a bɛ́ re kiɛ min woo min too ne, ǹ dɛnaa gɔ̀nɔn tá re n sii la.

¹² Masɛ bɛ́ má màn mɛn tumaa pɛ Elii a kion wɔ paǹ li, man die a yii lɛ piɛ̃ tɛtɛtɛ bɛa pinaa.

¹³ Má pɛ nɛ, máa ma á re dɔlɔ boe a kion ganaa duduu a sã lɛ taman yii. Á goã doɛ̃ mà a nɛnyaanan lɛn man barka boe masɛ Lawa nɛ, sɛnɛ, a na á bɔ ǹ gɔn lɛ-a wa.

¹⁴ Bɛ lɛ na á toa, man liɛ kɛ we Elii a kion li: Wúlu màn hinlaa Lawa gɔ ǹ màn kɔn ba re boe la duduu, a Elii a kion lɛ a sã tuturu wa.»

¹⁵ Samayeli waa tán yǎa lɛ̀ waa, á tɔ́n yoo á Dɛnaa Lawa a kion lɛ a kiɛnlɛn bũ. Nyɛ́ɛ na á goã Samayeli ganaa, a sii-nyaa lɛ laakalaa Elii ni.

¹⁶ Elii lɛ dia Samayeli la, á pɛ nɛ: «Maa nɛgiĩ Samayeli.» Samayeli na a lɛ si mà asɛ á ke.

¹⁷ Elii tɔ́n pɛ: «Lawa na á wàa mɛn boo da n nɛ? Bǐɛ̃ kɔ n baran duru ma la wa. Lawa boo mɛn tumaa pɛ n nɛ, bɛ̀ ń bɛ mɛn a goon duru masɛ la, Lawa die a dɔlɔ babaraa bɔ n ganaa.»

¹⁸ Bɛ kio, Samayeli boo lɛ yii laakalaa nɛ, a ǹ kɔn duru la wa. Elii tɔ́n pɛ: «N din ni Dɛnaa Lawa lɛa, sii mɛn bɛ siĩni n din yii li, n die n bɛ zɛnaa.»

¹⁹ Samayeli bɛ́ gole koe woe, Dɛnaa Lawa goã kun ni, a boon lɛn kɔn goã kooro, lɛ-pã baã wa.

²⁰ A saa Dan kiwi ganaa a wo Bɛɛr-Sebaa yaa, Izirayeli minin tumaa dɔ̃ mà ǹ nə́ Samayeli koa Dɛnaa Lawa a boo gii-dali lɛa.

²¹ Dɛnaa Lawa goã bɛ́ a n din nyaa Siiloo. Sonbore ne, a na á goã n din nyɛɛ Samayeli ni walan ka a boo ne.