Samayeli1 26 - LAWA A BOO SONBORE

Davida a wusoo a Sayulu toa walan

¹ Ziifu minin nə́ daa Sayulu yǎa Gibeya kiwi. Ǹ nə́ pɛ-n kɛnɛn: «N ba doɛ̃ mà Davida á durii-n Akiilaa kele la, diə gole yɔrɔ-a wa?»

² Sayulu yoo, á woo Ziifu don, kun ka Izirayeli a sɔraasi sonbore, sonbore duu sɔɔ (3 000) nɛ, mà a n giɛ Davida li Ziifu don lɛ nɛ.

³ Sayulu giã Akiilaa kele la, zii genli Zudaa diə gole yɔrɔ-a. Davida goã giã-n diə gole lɛ nɛ. Á yɛ mà Sayulu na á daa asɛ basa bɔ don lɛ nɛ.

⁴ Davida minin dia, ǹ nə́ woo ga ka durii ni, bɛ́ toa á waa la, mà Sayulu daa ga li sonbore.

⁵ Davida zii saa, Sayulu goã giã-n bǎã mɛn nɛ, á woo dɔ walan. Sayulu laanka a sɔraasin goledɛnaa, Nɛɛrɛ a nɛgiĩ Abnɛɛrɛ, goã waa-n tán bǎã mɛn nɛ, Davida bɛ yɛ. Sayulu na á goã waa-n tán, giã ǹ bǎã lɛ bii, a sɔraasin lɛn ná a lɛnpɛnɛ.

⁶ Davida nɔ̀n da Ɛti tɔrɔ Ayimelɛki la, á nɔ̀n dɔ da Seruya a nɛgiĩ Abisayii la, Zoabu n dɔɔ̃ngiĩ ke á pɛ: «Die n die woe kun ka masɛ nɛ Sayulu a giã ǹ bǎã nɛ?» Abisayii nə́ n toa mà asɛ á woe kun ni.

⁷ Davida laanka Abisayii woo dɔ sɔraasin lɛn li tèlò-n, bɛ̀ Sayulu bɛ̀ waa-n tán, giã ǹ bǎã lɛ bii nyuù we, a sɛmiɛ̃ n dere-n tán a mìi wɔlɔ-a. Abnɛɛrɛ laanka sɔraasin lɛn nə́ goã ǹ nə́ nyuù wɔ ǹ nə́ da bii.

⁸ Abisayii pɛ Davida-n kɛnɛn: «Pelo, Lawa na á n zɔ́ɔ wɔ n gɔn. Zii kɔ masɛ la, ma fɔ̃ a dama tán ka sɛmiɛ̃ lɛ yii goon toto ne.

⁹ A din ba doe maa fɔ̃ gunyin paa ganaa wa.» Davida pɛ Abisayii ni: «N baran dɛ wa! Dɛnaa Lawa min mɛn bɔ á koa, die gɔn nə boe la a mɛn bɛ ganaa, ǹ dɛnaa goã kooro dɔlɔ bɔmaa baã?»

¹⁰ Davida tɔ́n pɛ: «Dɛnaa Lawa yii tá koo! Dɛnaa Lawa din nə die Sayulu dii. Bɛ̀ a tɔ gɛ̀ dɛ a biikoo li wa, a wo zia la, zia bii.

¹¹ Dɛnaa Lawa min mɛn bɔ á koa, Dɛnaa Lawa die a ma kanbaa bɛa dɛ ganaa! Sɛmiɛ̃ mɛn bɛ́ a mìi wɔlɔ li, bɛ laanka mu tɔn lɛ sɛ saa, wɔ n tan.»

¹² Sɛmiɛ̃ lɛ laanka mu tɔn mɛn nə goã Sayulu mìi wɔlɔ li Davida bɛn goã, ǹ nə́ tɔ́n kiɛ̃ ǹ nə́ woo. Min kɔn bɔ a siére-a wa, min kɔn nə ǹ yɛ wa, min kɔn dɔ yii kaa wa, a giala, ǹ tumaa na á goã nyuù we. Dɛnaa Lawa din na á nyuù golee da ǹ ganaa.

¹³ Davida kiɛ̃ á woo wàã kɔsɔ-a, á woo golee kele mìi lalan, tìã lɛ-a. Ǹ wɔlɔ goã lui ni kɔn-a parsiini.

¹⁴ Nɛɛrɛ a nɛgiĩ Abnɛɛrɛ laanka sɔraasin lɛn bɛ́ bǎã mɛn nɛ, Davida goã n toɛ kele lɛ mìi ni n lɛ dii walan li pii. «Abnɛɛrɛ, n ba ma lɛ sii wa ya?» Abnɛɛrɛ tɔ́n ná a lɛ si kɛnɛn: «Nsɛ n die lɛa, nsɛ kɛ lɛ, n lɛ dii sù kiɛ kii too ne?»

¹⁵ Davida pɛ Abnɛɛrɛ-n kɛnɛn: «Táa n nə n giĩ lɛa, n miã ná a banban Izirayeli gána-n wa. Sɛnɛ, wàa na á baa, n kii lɛ lɛduə̃ wa, n dɛnaagiĩ lɛ? Zaman lɛ a min goon daa mà a n kii lɛ dii, n dɛnaagiĩ lɛ.

¹⁶ N sii mɛn zɛnaa ke, a bǐɛ̃ kɔ wa. Dɛnaa Lawa Yiikoonaa tɔ taman yii, kaa dɛnaagiĩ lɛ, Lawa bɔ á koa, ka bɛ́ ka a lɛduə̃ mɛnɛn ke wa, ka kɔnbɔ ka gɛ̀ nɛ. Kii lɛ a sɛmiɛ̃ laanka a mu tɔn mɛn goã a mìi li, ga sisia bɛn bɛ́ maa.»

¹⁷ Sayulu Davida lɛn gɔ́ɔ̃ dɔ̃, á tɔ́n pɛ: «Maa nɛgiĩ Davida, n din lɛn gɔ́ɔ̃ nɛ?» Davida ná a lɛ si: «Maa dɛnaagiĩ kii, ma din lɛn gɔ́ɔ̃ nɛ.»

¹⁸ Davida tɔ́n nɔ̀n da kɛnɛn: «Wàa na á baa maa dɛnaagiĩ tá a bɛ̀rɛgiĩ kio lui? Man má wàa sii la kəni? Wàa sii baraa-n ma gòɛ̃ nɛ?

¹⁹ Maa dɛnaagiĩ kii lɛ die a bǐɛ̃ kɔ sisia, a n too kɔ a bɛrɛgiĩ a boo ganaa. Bɛ̀ Dɛnaa Lawa nə n sɔmɛ n diɛ ma ganaa, Lawa gɔ ǹ màn die a Dɛnaa Lawa foo basã! Sɛnɛ, bɛ̀ minin manə n sɔmɛ n diɛ ma ganaa, bɛn dɛnan wɔ die a ziziɛ̃ Dɛnaa Lawa yɔrɔ-a. A giala, maǹ nə́ ma loo pelo, ǹ nə́ ma bɔ Dɛnaa Lawa a kíɛ̃ ganaa, ǹ nə́ die ma diɛ lawa kɔsɔn guguru kɔ ganaa.

²⁰ Sisia, ma ba li, ma gã bǎã kɔsɔ nɛ ma wɔlɔ n sɔsɔɔ Dɛnaa Lawa ganaa wa. A giala, masɛ din dìwi kooro kɛ lɛ, Izirayeli a kii na á soo á n giɛ ma li a n ma lui, ka ǹ bɛ́ dɔɔn lui kele yii-n lɔn.»

²¹ Sayulu nə́ n toa: «Má sii baraa zɛnaa. N bɔyaa n daa, maa nɛgiĩ Davida! Ma ba re sii baraa zɛnɛɛ n nɛ doo wa, a giala, pelo kɛ lɛ nɛ, n sàn kɔ ka masɛ a yiikoonaabaa-n wa. Taãnɛ, ma gaãnaabaa ǹ sii zɛnaa, má sã gole wɔ.»

²² Davida ná a lɛ si á pɛ: «Kii, n sɛmiɛ̃ lɛ á ke. Min tenən lɛn goon kiɛ̃ a da si.

²³ Dɛnaa Lawa die a didie saraa a kɔnpɛ ka a peperebaa laanka a bɔlɔgoondɛnaabaa nɛ. Dɛnaa Lawa na á goã á n wɔ ma gɔn pelo, sɛnɛ, Dɛnaa Lawa min mɛn bɔ á koa, má n piã, man gɔn da bɛ ganaa wa.

²⁴ Ma bɛ́ ma sàn kɔ ka n yiikoonaabaa n lɔn pelo ke wa, Dɛnaa Lawa die a masɛ dɔ wɔ lɛ kũ miɛ̃, ka bɛ dɔ nɛ, Dɛnaa Lawa die a ma kanbaa foo ziziɛ̃ ǹ sii tumaa ganaa.»

²⁵ Sayulu pɛ Davida nɛ: «Maa nɛgiĩ Davida, Lawa die a barka da n ganaa! N tá re sii dadaran zɛnɛɛ n boo ǹ la. Nɔ̀n-diɛ din ba bɛ ganaa wa.» Davida woo nyɛɛnɛ ka a zii ni, Sayulu dɔ nə́ n bɔyaa, á woo a bǎã nɛ.