Samayeli1 23 - LAWA A BOO SONBORE

Davida n Kelaa kiwi sii á diɛ

¹ Ǹ nə́ daa pɛ Davida-n kɛnɛn: «Á ke, Filisiti minin lɛn nə́ daa kɔ Kelaa kiwi lɛ ka zia nɛ. Ǹ nə́ goã ǹ wuru gɔ́ɔ̃ mànan gɔgoɛ ǹ duwəə ǹ bǎã nɛ.»

² Davida nɔ̀n da Dɛnaa Lawa la: «Ma doamaa nɛ ma wo Filisiti minin kɛn gialaa? Ma á die boe ǹ la?» Dɛnaa Lawa ná a lɛ si mà a woo, mà a tá re boe Filisiti minin lɛn la, a Kelaa kiwi si a da.

³ Davida a minin nə́ pɛ nɛ: «Zudaa gána-n kànaa dinin gɔrɔ, nyɛ́ɛ tá wɔsɛn ganaa. Bɛ̀ wɔ́ woo Filisiti sɔraasin lɛn gialaa Kelaa, bɛ tɔn nə n baa lɔn?»

⁴ Davida tɔ́n nɔ̀n da Dɛnaa Lawa la doo; Dɛnaa Lawa pɛ nɛ: «Yoo n zii saa, n wo Kelaa, a giala, ma á re Filisiti minin lɛn we n gɔn.»

⁵ Davida woo Kelaa, kun ka a minin ni, á yoo Filisiti minin lɛn gialaa. Á ǹ tɔɔn loo á kiɛ̃ ǹ nɛ, á bɔ̀n gole da ǹ ganaa. Bɛ na á n baa Davida a Kelaa minin si a kaa lɛa.

⁶ Akiimelɛki a nɛgiĩ Abiataara bɛ́ baa sii liɛ, woe Davida li Kelaa kiwi, Lawa a wúlu-bɔlen dí nya ǹ mɔnaa goã a gɔn.

⁷ Ǹ ná a boo da Sayulu ni, mà Davida woo Kelaa. Sayulu tɔ́n pɛ: «Lawa wɔ ma gɔn, a giala, a wo kiwi mɛn nɛ, kungɔn tá a lɛnpɛnɛ, a kiɛnlɛn tá n tiɛ̃ sɔnbɔraanɛ. A dinmaa na á woo n din lɛ tã walan.»

⁸ Sayulu zia gu da zaman lɛ tumaa ne, mà ǹ wo Kelaa kiwi, ǹ Davida laanka a minin lɛnpɛnɛ.

⁹ Davida bɔ a siére-a, mà Sayulu n sii baraa yɔrɔ boe asɛ taman yii. Á tɔ́n pɛ Lawa a wúlu-bɔle Abiataara nɛ: «Da ka Lawa a dí nya ǹ mɔnaa lɛ nɛ.»

¹⁰ Davida pɛ: «Dɛnaa Lawa, Izirayeli a Lawa, má a boo ma, mà a tá Sayulu gɔ́ɔ̃ nɛ, a da Kelaa kiwi bɔ̀n baa masɛ taman yii.

¹¹ Kelaa a pàãdɛnan tá re masɛ we a gɔn? Sayulu tá re die ka ma ma lɔn sonbore? Dɛnaa Lawa, Izirayeli a Lawa, ma lɛ si.» Dɛnaa Lawa pɛ mà Sayulu lɛ á re die.

¹² Davida nɔ̀n da: «Kelaa a pàãdɛnan tá re masɛ laanka maa minin we Sayulu gɔn?» Dɛnaa Lawa ná a lɛ si mà ǹ tá re ǹ we a gɔn.

¹³ Davida tɔ́n yoo, á zii saa kun ka a minin ni. Ǹ nə́ dɔ min biɛ sɔrɔ (600) kɛ miã. Ǹ nə́ soo ǹ nə́ n bɔ Kelaa kiwi, ǹ wo bǎã mɛn nɛ, mà ǹ nə́ woo walan. Ǹ nə́ pɛ Sayulu ni, mà Davida baa si á n bɔ Kelaa, Sayulu nɔmaa á wo zia la lɛ da.

¹⁴ Davida giã Ziifu diə gole ne, á goã duru ǹ bǎãn nɛ, kele yii ni. Bɛa biikoo kɛ lɛ yii gɔ́ɔ̃ nɛ, Sayulu goã giɛ Davida li, sɛnɛ, Lawa wɔ a gɔn wa.

¹⁵ Davida daa dɔ̃, mà Sayulu na á woo ga asɛ li, mà a n die asɛ nyin boe. Davida na á goã daã nɛ, Ziifu diə gole lɛ nɛ.

¹⁶ Sayulu a nɛgiĩ, Zonaatan lɛ yoo, á bɔ á mɛ zii la, á woo Davida yaa daã lɛ nɛ. Á Davida foo taã ka Lawa a sii ni.

¹⁷ Zonaatan pɛ nɛ: «Nyɛ́ɛ baran n kũ wa. Ma di Sayulu gɔn ba re doe n ganaa wa. N din nə die pàã zɛnɛɛ Izirayeli mìi la, masɛ n die koɛ n la, n kio. Ma di Sayulu dinmaa lɛ tá bɛ doɛ̃, a giala yii li.»

¹⁸ Ǹ dinin paanan lɛ-kɔ wɔ Dɛnaa Lawa yɔrɔ-a. Davida goã daã lɛ nɛ, Zonaatan nə́ n bɔyaa á woo piɛ.

Davida la Sayulu la

¹⁹ Ziifu minin nə́ woo dɔ Sayulu li Gibeya ǹ nə́ pɛ nɛ: «Davida tá durii bbni wɔsɛn tán la, daã nɛ, Akiilaa tenten la, diə gole lɛ a gusin a lɛ̀gɔn la.

²⁰ Bɛ̀ woo sii tá n ganaa, haya koɛ kii, woo. Wɔsɛn dinin man die we n gɔn!»

²¹ Sayulu nə́ n toa: «Ma makara ka dinin mɛnɛn kũ, Dɛnaa Lawa die a barka da ka ganaa.

²² Ka bǐɛ̃ kɔ ka woo kəni, ka n gɔn da la doo. A bɔ bǎãn mɛnɛn nɛ, ka ga, ka a basa dɔ̃. Min mɛn dɔ yɛ walan, ka n doa ka bɛ dɔ a dɛnaa dɔ̃. A giala, ǹ tá pii masɛ nɛ, mà ma yiri á wooro á la yii ni.

²³ Duru ǹ bǎãn mɛnɛn tumaa bɛ́, á n boe la, a n duru ǹ ni, ka ga bɛn li, ka ǹ dɔ̃. Bɛ̀ ka waa la ǹ mɛn waáraa, ka n bɔyaa ka da bɔ masɛ li, ma á die woe kun ka nɛ. Bɛ̀ a ta gána lɛ nɛ, ma á die n yii talɛɛ li sɔnbɔraanɛ Zudaa a tanlɛn tumaa a minin bii, ma yɛ.»

²⁴ Ǹ nə́ zii saa, ǹ nə́ woo Ziifu, Sayulu nyɛɛnɛ. Davida laanka a minin man nə́ goã diə fúlu kɛ nɛ Maahɔ̃ don, gusin a lɛ̀gɔn la.

²⁵ Sayulu laanka a minin nə́ woo ga Davida li. Davida ná a boo ma, á woo gɛ̀fu tenten la Maahɔ̃ don, á giã walan. Sayulu bɔ a siére-a, á Davida kio loo Maahɔ̃ don.

²⁶ Sayulu na á goã tɔ we kele lɛ a wàã goon ganaa, Davida dɔ laanka a minin man nə́ goã wàã kɔsɔ-a. Davida na á goã n nanaɛ tɔ we, màn mɛn bɛ́ toɛ, a la Sayulu la. Sayulu laanka a minin lɛn nə́ goã ǹ nə́ dɔ Davida laanka a minin lɛn ganaa á nya, ǹ nə́ die ǹ lɛnpɛnɛ, ǹ nə ǹ kũ

²⁷ bɛ̀ min bɛ̀ á daa pɛ Sayulu ni: «Da fufuu, Filisiti minin nə́ daa kɔ gána lɛ lɛ ka zia nɛ.»

²⁸ Sayulu Davida loo lɛ da, á woo Filisiti minin lɛn gialaa. Bɛ lɛ n ke, ǹ nə́ bɛa bǎã lɛ tɔ kɔ, mà Toɛ̃ kɔn-a ǹ gɛ̀fu.