Samayeli1 21 - LAWA A BOO SONBORE

¹ Davida zii saa á woo, Zonaatan nə́ n bɔyaa á woo kiwi.

Davida a tá Nɔɔbu

² Davida dɔ Nɔɔbu, Lawa a wúlu-bɔle Akiimelɛki li. Akiimelɛki daa n da Davida lɛ, bɛ̀ a gɔ̀nɔn tá bìn diɛ. Á nɔ̀n da Davida la: «Wàa na á baa n dinsɔɔ̃ nɛ, min ná a ba kunun n ni wa?»

³ Davida Lawa a wúlu-bɔle Akiimelɛki lɛ si: – Kii lɛ na á pɛ masɛ-n kɛnɛn: «Dí mɛn bɛ́, má n dia a ganaa, min kɔn doamaa bie a bɛ dɔ̃ wa.» Maa nɛ tenən lɛn sɛn, má bǎã pɛ ǹ nɛ, ma á re woe ǹ yiɛ walan.

⁴ Sɛnɛ wàa mɛn màn nə yii n gɔn? Buuru mìi sooro kɔ ma la hinlaa bɛ̀ màn mɛn yɛ.

⁵ Lawa a wúlu-bɔle lɛ Davida lɛ si: «Buuru kooro ba masɛ gɔn wa, yǎa ǹ mɛn bɛ́ á n kɔ Lawa la. N tá boe la n bɛ lɛ yɛ, bɛ̀ a da yaa, n minin lɛn nə giã kun ka lɔ-n sisia wa.»

⁶ Davida Lawa a wúlu-bɔle lɛ lɛ si, á pɛ nɛ: «Sonbore ne, bɛ̀ kɛ miã sii lɛ tan lɔn, wɔsɛn doamaa bie wɔ giã kun ka lɔ-n wa, ka bɛ dɔ nɛ, bɛ̀ masɛ á woe zia la lɔn, ma maa takun wolen lɛn ziabaa ǹ mànan koe Lawa la, a kɔnpɛ ka a zɛnaa ǹ gɔn nɛ. Ta kɛ n zia kooro lɛa wɔ n diɛ, a n Lawa wɔ lɛa pelo, a giala, ziabaa ǹ mànan lɛn dɔn man Lawa wɔn lɛa.»

⁷ Ǹ bɛ́ ǹ nə́ buuru mɛn kɔ Lawa la, Lawa a wúlu-bɔle lɛ tɔ́n bɛ kɔ Davida la. A giala, buuru kɔsɔ goã a tan wa, bɛ̀ á n bɔ bɛa buuru kɛ lɛ nɛ, koa nɛ Dɛnaa Lawa yɔrɔ-a, a gɔ ǹ wɔ lɛa. Bɛ̀ ǹ tá re siɛ ǹ mɛn pinaa, maǹ buuru fuu koɛ a bǎã nɛ.

⁸ A da yaa, a din pinaa lɛ nɛ, Sayulu a dí-nyali goon goã bǎã lɛ nɛ, maǹ nə́ goã ǹ nə́ kurəə, ǹ nə́ koa Dɛnaa Lawa yɔrɔ-a. A tɔ na á goã Dowɛgi, Edɔmu min ni. A na á goã Sayulu a tɔɔn-lɛduə̃lin kiã lɛa.

⁹ Davida nɔ̀n da Akiimelɛki la: «Sɛmiɛ̃ hinlaa gɔya sa tá yii n gɔn kànaa ya? Ma da ka maa gɔya sa nɛ ma gɔn wa, ma da ka maa ziabaa ǹ mànan nɛ wa, a giala, kii lɛ a dí lɛ goã dí fuu lɛa.»

¹⁰ Lawa a wúlu-bɔle lɛ nə́ n toa a ganaa: «Filisiti min Goliati lɛ, ń dɛ Elaa a nyankɔrɔ basa lɛ nɛ, bɛa gɔya sa lɛ tan. A tá Lawa a dí nya ǹ mɔnaa lɛ kio, dɔnkɛ n pɛnɛɛ nɛ a ganaa. Bɛ̀ n tá li, n saa. A dinsɔɔ̃ na a tan kànaa zia da ǹ màn lɛa.» Davida pɛ: «A kɔ ma la! Ǹ miã din banban wa.»

Davida woo Filisiti minin li Gaati kiwi

¹¹ Bɛa pinaa kɛ lɛ nɛ, Davida zii saa, á baa si á n wɔlɔ lui Sayulu ganaa. Á woo dɔ Gaati kiwi a kii, Akiisi li.

¹² Akiisi a dí-nyalin nə́ pɛ nɛ: «Gána lɛ a kii, Davida bie wa? Táa a din lɛ nɛ, ǹ nə́ goã loe loe, bɛ̀ biɛ, a tɔ boe ne mà Sayulu min gigiã dɛ sɛnɛ Davida min duu damata dɛ?»

¹³ Bɛa boon lɛn nə́ baasi boo baa Davida gɔn, á nyɛ́ɛ gole baa Gaati kiwi a kii Akiisi ni.

¹⁴ A bɛ́ miɛ̃, Davida yoo ǹ yii ni, á n din baa ka gàãnaa nɛ, á mɛ la a tá n sinbirin boe ǹ bii, a n mànan kikiɛ̃ kiɛnlɛ goon ganaa, á n toɛ a sɛ̀n soe gisĩ a lɛtoro ka ganaa.

¹⁵ Akiisi pɛ a dí-nyalin manɛ: «Ka bɛ́ doɛ̃ mà giĩ kɛ lɛ n gàãnaa lɛa. Wàa na á baa ka á die ne ma li?

¹⁶ Gàãnaa din woɛ nɛ masɛ li parɛ, yǎa ka die ka kɛ nɛ, a gàãnaabaa ǹ siin zɛnɛɛ ma genli? Kɛa we masɛ a kion wa!»