Samayeli1 17 - LAWA A BOO SONBORE

Davida laanka Goliati

¹ Filisiti minin lɛn nə́ ǹ sɔraasin sɔkɔn Sookoo kiwi, Zudaa gána nɛ, ǹ nə́ die zia biɛ. Ǹ nə́ giã bǎã kɔn nɛ, a tɔ n Efɛsi-Damimu, Sookoo kiwi laanka Azekaa kiwi biin ni.

² Sayulu laanka Izirayeli minin lɛn dɔn nə́ n sɔkɔn. Ǹ nə́ giã Elaa a nyankɔrɔ basa kɛ nɛ, ǹ nə́ n tele Filisiti minin lɛn li ka zia nɛ.

³ Filisiti minin lɛn nə́ goã giã-n kele wàã goon-a, Izirayeli minin dɔn nə́ goã giã-n kele lɛ a wàã kɔsɔ-a, nyankɔrɔ basa lɛ nə́ ǹ biin ni.

⁴ Sɛ̀mɔɔ goon soo Filisiti minin bǎã nɛ, n zoɛ̃ woe Izirayeli minin sɔraasin laanka Filisiti minin sɔraasin lɛn biin ni. A tɔ na á goã Goliati, Gaati kiwi min ni. A sasabaa dɔ mɛtərə sɔɔ kɛ miã.

⁵ Zan bafolo na á goã a mìi ganaa, ziabaa ǹ dɔnkɛ mɛn goã a ganaa, zan nɛ, a lalan nə́ kóo lɛa, a gugurubaa goã á dɔ kilo pɔsɔrɔ ka sɔbaa kɛ miã.

⁶ Màn mɛn goã koe ne a gòãn lɛ, a dɔ na á goa zan lɛa. Á zan sɛmiɛ̃ lɔɔ a kɔkɔrɔ nɛ.

⁷ A sɛmiɛ̃ mɛn goã a gɔn bɛ na á goã gole ka kurunbirin ni. Sɛmiɛ̃ lɛ a nàn a gugurubaa goã á dɔ kilo sɔbaa kɛ miã. Min mɛn goã góoro guĩ, bɛ́ goã tɔ we Goliati nyɛɛn nɛ.

⁸ Goliati nə́ n zɔ̃ á golee, á n toa Izirayeli minin sɔraasin lɛn ganaa, ka paraa nɛ: «Ka n soe ka tá n tele ka zia-n kooro. Filisiti min lɛ bie ka ma din ni wa ya? Ka bie Sayulu a bɛ̀rɛn lɛn lɛa wa ya? Ka min goon bɔ, a kiɛ̃ a da masɛ ganaa.

⁹ Bɛ̀ a pàã tá re yii a lon, a zia da masɛ-a, a ma dɛ. Wɔ á re kaa bɛ̀rɛn biɛ. Sɛnɛ bɛ̀ masɛ pàã la a wɔ nɛ yǎa ma dɛ, ka tá re wɔa bɛ̀rɛn biɛ ka dí nya wɔsɛn manɛ.»

¹⁰ Filisiti min lɛ nə́ n toa. «Pelo, man yoo diɛ Izirayeli minin sɔraasin lɛn ganaa! Kaa min goon da masɛ-a, wɔ kɔn dɛ.»

¹¹ Filisiti min lɛ boon mɛnɛn da, Sayulu laanka Izirayeli minin tumaa bɛn ma. Nyɛ́ɛ gole nə́ ǹ kũ, á ǹ gù yii dɛ.

¹² Davida na á goã Zesee a nɛ lɛa. Zesee lɛ n Efrataa dala min lɛa, boe Bɛtlehɛmu kiwi, Zudaa gána nɛ. Nɛgiĩ kiwisi na á goã a lon. Sayulu a kiibaa biikoo li, Zesee yii goã fulii ni zaman lɛ bii.

¹³ Zesee a nɛgiĩ dadara sɔɔ lɛ kɔ Sayulu lɛ ǹ nə́ woo zia la. Zesee a nɛgiĩ sɔɔ mɛn goã ǹ nə́ woo zia lɛ la, a goledɛnaa tɔ n Eliabu, bɛa zizi tɔ n Abinaadaabu, Abinaadaabu dɔ a zizi tɔ n Saamaa.

¹⁴ Davida na á goã ǹ kiɛɛrɛn lɛa. Nɛgiĩ dadara sɔɔ lɛ kɔ Sayulu lɛ.

¹⁵ Sɛnɛ Davida na á goã woe Sayulu li, bɛ̀ a n toa walan a wo ǹ di a tɔɔn lɛduə̃ Bɛtlehɛmu.

¹⁶ Filisiti min lɛ na á goã giɛ Izirayeli minin lɛn lɛ li miɛ̃ baayɛlɛ laanka wasamiɛ̃n nɛ, yǎa lɛawaa pusi.

¹⁷ Zesee pɛ a nɛgiĩ Davida nɛ: «*Belee nàn paparɛɛ kɔn si, ka buuru mìi fù ni, n baa si n wo kɔ n golon lɛn la ǹ giã ǹ bǎã nɛ.

¹⁸ Nàari mìi fù kɛ dɔ si n wo kɔ zia mìilandɛnaa la. N die n ga n golon lɛn ganaa, bɛ̀ ǹ tá kakabaa la, n da pɛ ma nɛ. N toa màn yɛ n gɔn, bɛ́ n nyɛɛ mà ǹ tá kakabaa la sonbore.

¹⁹ Sayulu ni, ǹ golon lɛn nɛ, ka Izirayeli minin gialakunun lɛn tumaa tá Elaa a nyankɔrɔ basa kɛ nɛ, zia biɛ kɔn ka Filisiti minin lɛn nɛ.»

²⁰ Davida yoo baayɛlɛ yiisoone, á ná a tɔɔn lɛn lɛduə̃ toa min kɔsɔ gɔn. Á tɔ́n a guĩ saa, Zesee bɛ́ mà Davida wo ǹ golon giã ǹ bǎã nɛ, Davida woo á dɔ walan, bɛ̀ sɔraasin lɛn nə́ ke die woe zia la, ǹ nə́ ziabaa ǹ lɛ-dɛ we.

²¹ Izirayeli minin lɛn laanka Filisiti minin lɛn nə́ n tele, ǹ nə́ n yɔrɔ da kɔn la ka zia nɛ.

²² Davida nə́ n yu ka a guĩ ni, min mɛn bɛ́ guĩn lɛduĩ, á toa bɛ gɔn. Bɛ kio, á baa si á woo zia bǎã lɛ nɛ. A dɔmaa nɛ, á woo fòo da ǹ golon lɛn manɛ.

²³ A Davida toa boo diɛ ǹ nɛ, bɛ̀ sɛ̀mɔɔ lɛ á ke á soo Filisiti minin sɔraasin li. A tɔ n Goliati, Filisiti min mɛn lɛ á ke boe Gaati. A goã boo mɛn diɛ lɛlɛ, á wusoo á bɛ lɛ miã da doo, Davida ma.

²⁴ Bɛa giĩ kɛ lɛ, Izirayeli minin lɛn bɛ́ ǹ nə́ yɛ, nyɛ́ɛ nə́ ǹ kũ parsiini ǹ nə́ baa si.

²⁵ Izirayeli minin lɛn man nə́ goã pii: «Ka giĩ kɛ yɛ soe die? A n soe die giɛ Izirayeli minin lɛ li. Min mɛn bɛ́ re dii, kii lɛ á die pàãma baa ǹ màn gigiã koe la. Kii lɛ tá re a nɛlɔ koe la, a n dɛnaa a sumu minin goɛ̃ bɔ a bɔ nyin giɔ̀mɔ saraa nɛ.»

²⁶ Min mɛnɛn nə goã Davida genli, á nɔ̀n da ǹ la. «Min mɛn bɛ́ re Filisiti min kɛ dii, a sìi saa a bɔ Izirayeli minin la, maǹ die wàa zɛnɛɛ bɛa dɛnaa nɛ? Asɛ n die lɛa, bɛa Filisiti min *soroma kɛ lɛ, a tɔn yoo a sɔ kɔ Lawa yiikoonaa a sɔraasin ganaa?»

²⁷ Minin lɛn ná a lɛ si a din gɔn goon lɛ la: «Min mɛn bɛ́ re boe la a dɛ, a n die n zɛnɛɛ ǹ dɛnaa nɛ ka a n da lɔn.»

²⁸ Eliabu lɛ, ǹ golon lɛn gole lɛa, Davida boo mɛn pɛ minin lɛn manɛ, á ma. A foo yoo Davida li, á pɛ nɛ: «Ma nə n daa wàa pɛ kànaa? Ma nə n die koa n sèren lɛn li don? Ma nə n yii we sii la, n taasiɛ a siĩn wa, zia lɛ a gamaa lɛa nɛ, ń daa.»

²⁹ Davida nə́ n toa: «Ma n má wàa mɛn sii la? Boo kɔsɔ n bie kanna koɛ, maa boe la ma nɔ̀n dɔ da wa?»

³⁰ Davida kiɛ̃ á n bɔ a li, á wusoo á nɔ̀n lɛ da min kɔsɔ la. Zaman lɛ ná a lɛ si ka lɛlɛ wɔ lɛ bɛ́ lɔn.

³¹ Davida boon mɛnɛn da, minin nə́ ǹ ma ǹ nə́ ǹ gũ ǹ nə́ pɛ Sayulu ni. Sayulu nə́ ǹ dia, ǹ nə́ woo Davida bíi ǹ nə́ daa nɛ.

³² Davida pɛ Sayulu ni: «Dɛnaagiĩ, min kɔn foo baran ziziɛ̃ ka Filisiti min kɛa sii-n wa! Masɛ tá re woe zia diɛ kɔn nɛ.»

³³ Sayulu pɛ Davida nɛ: «N ba boe la n zia baa kɔn ka Filisiti min kɛ-n wa. A giala, nɛnyaan bɔnbɔnɔn kooro nə n ne, a da yaa, Filisiti min lɛ yoo ten lɛa lɔn, a n zia-baali lɛa.»

³⁴ Davida pɛ Sayulu ni: «Man má goã tɔɔn lɛduĩ, maa díi li piɛ. Bɛ̀ yàra hinlaa gòon màn gole daa, mà a n tɔɔn lɛn goon kuĩ,

³⁵ man má goã baa sii a kio, ma dɛ, ma tɔɔ lɛ bɔ a lɛ-a. Bɛ̀ a tá ma kuĩ, ma má goã kuĩ a ka ganaa, ma dɛ, a gã.

³⁶ Ma bin yàra dɛ, ká don màn babaraa kɔn nɛ. Kɛa Filisiti min soroma lɛ dɔ n die n biɛ ka bɛn goon bɛ́ lɔn, a giala, a na á sɔ kɔ Lawa Yiikoonaa a sɔraasin ganaa.»

³⁷ Davida nə́ n toa doo: «Dɛnaa Lawa mɛn nə ma si yàra laanka kuruu la, a din ni die ma sii Filisiti min kɛ lɛ la.» Sayulu pɛ Davida nɛ: «Woo, Dɛnaa Lawa die a goã kunun n ni.»

³⁸ Sayulu ná a din a mɔnaan wɔ Davida ganaa. Á zan bafolo wɔ a mìi ganaa, á zia da ǹ dɔnkɛ dɔ wɔ a ganaa.

³⁹ Davida Sayulu a gɔya da a mɔnaan lɛn la, a binbin ni. Mà a n tɔ we, á fɔ̃ li. A giala a lɛ mui-n wa. Davida pɛ Sayulu ni: «Ma a die boe la ma tɔ wɔ ka kɛ tumaa-n wa, a giala ma lɛ mui-n wa.» Davida nə́ ǹ sɔlɔ á ǹ bɔ a din ganaa.

⁴⁰ Á ná a bàlà saa a gɔn, á kɔlɔ zɔzɔnɔ sooro goa mu zii la, á kaa a tɔɔn lɛduə̃ ǹ takoo a zéwo ne. Á n zɔ̃ á woo Filisiti min lɛ gialaa, ka a baragii ná a gɔn.

⁴¹ Filisiti min lɛ na a giala kɔ tɔ we dirii Davida la, a goóro-gũli ná a nyɛɛnɛ.

⁴² Filisiti min lɛ ga, a bɛ́ á Davida yɛ, á zɔ̀ɔ dɔ a nɛ, a giala, a na á goã giɛ Davida ganaa nɛnyaan bɔnbɔnɔn kooro lɛa, a yɔrɔ koa ǹ gɔn nə́ siĩni, tɛ pii.

⁴³ Filisiti min lɛ pɛ Davida nɛ: «Ma n die masɛ ganaa ka bàlàn nɛ, gin nə ka ma-n nɛ?» Filisiti min lɛ ná a dìn bibii Davida li mà ǹ koe bɔ a ganaa.

⁴⁴ Filisiti min lɛ pɛ Davida-n doo: «Kiɛ̃ n da kànaa, man siĩ kɔ bàanan laanka don mànan la.»

⁴⁵ Davida pɛ Filisiti min lɛ nɛ: «Ma n die masɛ ganaa ka gɔya sa laanka sɛmiɛ̃n nɛ, sɛnɛ, masɛ n die n ganaa ka Dɛnaa Lawa Pàãyiidɛnaa tɔ nɛ. Ma nə n sɔ kɔ a din lɛ ganaa, Izirayeli minin Lawa lɛ.

⁴⁶ Pelo dinin, Dɛnaa Lawa tá re n we ma gɔn, masɛ n die n dii, man mìi na. Pelo dinin, man die Filisiti sɔraasin geren koe bàanan laanka don mànan la, tán kuturu tá re doɛ̃, mà Izirayeli a Lawa tan.

⁴⁷ Zaman kɛ lɛ tumaa á re doɛ̃, mà Dɛnaa Lawa bie min sii diɛ ka gɔya nɛ, hinlaa ka sɛmiɛ̃-n wa. Zia a gɔ̀lɔ̀baa n Dɛnaa Lawa wɔ lɛa, a tá re ǹ we wɔ gɔn.»

⁴⁸ A Filisiti min lɛ toa, ǹ zoɛ̃ dirii Davida la, Davida baa si fufuu, á woo a gialaa zia dù lɛ nɛ.

⁴⁹ Davida nə́ n gɔn wɔ a takoo ne fufuu, á kɔlɔ goon bɔ, á da baragii ni, á Filisiti min lɛ dɛ a nyanlɛ ganaa. Kɔlɔ lɛ ná a nyanlɛ lɛ wuru á kaa nɛ. Á nɔmaa á bɔ, á n yɔrɔ kɔ tán lɛ.

⁵⁰ Bɛa gɔn kɛ lɛ la, Davida gɔ̀lɔ̀baa yɛ Filisiti min lɛ la, ka baragii laanka kɔlɔ nɛ. A laanɛ gɔya sa goã Davida gɔn wa, á Filisiti min lɛ dɛ á gã.

⁵¹ Davida baa si á woo golee Filisiti min lɛ genli, a ná a gɔya sa saa, á woɛ̃ á bɔ a kii ni, á ná a gɔn nyɔmɔɔ ka bɛa gɔya sa lɛ nɛ, á ná a mìi na. Filisiti minin lɛn bɛ́ ǹ nə́ yɛ mà ǹ sɛmɔɔ lɛ gã, ǹ nə́ n gòã da baa nɛ.

⁵² Izirayeli minin laanka Zudaa minin lɛn nə́ toɛ̃ ka ziabaa ǹ lɛ-dɛ nɛ, ǹ nə́ Filisiti minin lɛn kio loo yǎa ǹ nə́ dɔ nyankɔrɔ basa kɛ lɛ-a, ka Ekrɔn kiwi a wɔ ǹ kiɛnlɛ nɛ. Filisiti minin geren man nə́ goã sabaaa tán Saaraayimu zii la, a wo Gaati laanka Ekrɔn yaa.

⁵³ Izirayeli minin lɛn bɛ́ ǹ nə́ Filisiti minin lɛn loo taãn-taãnɛ, ǹ bɔyaa biikoo li ǹ nə́ daa Filisiti minin lɛn mànan kokoo ǹ giã ǹ bǎã nɛ.

⁵⁴ Davida Filisiti min lɛ mìi saa á woo ne Zeruzalɛmu. A ziabaa ǹ mànan lɛn, á bɛn kaa a din a mɔnaa kion.

⁵⁵ Sayulu bɛ́ á goã á Davida yɛ woe Filisiti min lɛ gialaa, a na á goã á pɛ sɔraasin goledɛnaa Abnɛɛrɛ nɛ: «Abnɛɛrɛ ganaa, nɛginin kɛ n die a nɛ lɛa?» Abnɛɛrɛ tɔ́n pɛ: «E kii ganaa, taãn mà a n pɛ, maa doɛ̃ wa.»

⁵⁶ Kii lɛ pɛ doo: «Abnɛɛrɛ n din nɔ̀n da, nɛ ten kɛ lɛ n die a nɛ lɛa?»

⁵⁷ Davida bɛ́ á Filisiti min lɛ dɛ, á n bɔyaa á daa, Abnɛɛrɛ kũ á woo ne Sayulu yɔrɔ-a, Filisiti min lɛ mìi ná a gɔn.

⁵⁸ Sayulu tɔ́n nɔ̀n da la: «Tɔntɔraagiĩ, die a nɛ n ka n nɛ?» Davida pɛ nɛ: «N dí-nyali Zesee mɛn nə́ ke Bɛtlehɛmu min lɛa, bɛa nɛ n ka ma nɛ.»