Samayeli1 16 - LAWA A BOO SONBORE

Samayeli nyɔɔ lɔ Davida ganaa

¹ Dɛnaa Lawa pɛ Samayeli ni: «Ma n die gɛ̀ wuu pii Sayulu a lɛa n belebɔ nɛ? A da yia, masɛ dinmaa lɛ Sayulu tii, a ba Izirayeli a kii lɛa doo wa. N nyɔɔ kaa ǹ bɛn lɛ pã ka nyɔɔ nɛ, n yoo n zii saa. Zesee mɛn nə́ ke Bɛtlehɛmu min lɛa, ma nə n diɛ bɛ li. A giala, ma doamaa bɛ́ ka kii mɛn nɛ, má bɛ yɛ Zesee a nɛgiĩn bii.»

² Samayeli pɛ: «Man siɛ lɔn ma tɔn wo walan? Bɛ̀ Sayulu bɔ a siére-a, a n masɛ nyin boe.» Dɛnaa Lawa pɛ nɛ: «Wo ka dii luu ni n gɔn, n nə n toa mà nsɛ n die *wúlu màn koe Dɛnaa Lawa la.

³ Wúlu lɛ a bɔ waáraa, n die n Zesee bíi a tɔ-a. N doamaa bɛ́ nɛ, n sii mɛn zɛnaa, ma din tá re bɛ nyɛɛ n nɛ. Ma din bɛ́ re min mɛn nyɛɛ n nɛ, n die n nyɔɔ lɛ lɔ bɛ ganaa masɛ wɔ lɛa.»

⁴ Dɛnaa Lawa boo mɛn pɛ, Samayeli bɛ zɛnaa. Á dɔ Bɛtlehɛmu kiwi. Kiwi lɛ a min golen nə́ n da lɛ, bɛ̀ ǹ gɔ̀nɔn tá bìn diɛ. Ǹ nə́ nɔ̀n da la: «Bǐɛ̃ nɛ, ń daa a ganaa?» Á ǹ lɛ si mà hiĩ, mà bǐɛ̃ nɛ.

⁵ Man die wúlu màn koe Dɛnaa Lawa la, bɛ lɛ nɛ ma daa. Ka *gɔ̀ bɔ ka dinin ganaa, ka kiɛ̃ ka wo wúlu bɔ kun ka masɛ nɛ. Samayeli gɔ̀ bɔ Zesee laanka a nɛnyaanan ganaa, á ǹ bíi wúlu bɔ lɛ ganaa.

⁶ Ǹ bɛ́ ǹ nə́ dɔ, Samayeli Eliabu yɛ, á taasɛ mà Dɛnaa Lawa min mɛn bɔ, mà a din ni ke asɛ nyɛɛnɛ.

⁷ Sɛnɛ, Dɛnaa Lawa pɛ Samayeli ni: «N yii bɛ́ Eliabu ganaa lɔn ke, n baran n saa bɛ li wa, n baran n saa a sasabaa kɛ li wa. Ma lɛ kɔ a ganaa wa. Minbuiin nɛ a ga màn ganaa ǹ gɔn laanka Lawa wɔ ba goon wa. Màn mɛn bɛ́ yii n boe la a yɛ dəə̃nəə ne, minbuiin nɛn man giɛ bɛ-a, sɛnɛ, Dɛnaa Lawa n giɛ foo ganaa.»

⁸ Zesee lɛ dia Abinaadaabu la, á daa nɛ Samayeli yɔrɔ-a, sɛnɛ Samayeli pɛ: «Kɛ dɔ bie wa, Dɛnaa Lawa bɔ wa.»

⁹ Zesee daa ka Saamaa nɛ Samayeli yɔrɔ-a, sɛnɛ Samayeli pɛ: «Kɛ dɔ bie wa, Dɛnaa Lawa bɔ wa.»

¹⁰ Zesee na á daa ka a nɛgiĩ sɔbaa lɛ nɛ Samayeli yɔrɔ-a kɛa gɔn lɛ la. Samayeli tɔ́n pɛ Zesee ne: «Ǹ mɛnɛn yii kiɛ̃ ma yɔrɔ-a, Dɛnaa Lawa nə ǹ kɔn bɔ wa.»

¹¹ Bɛ kio, Samayeli pɛ Zesee-n kɛnɛn: «N nɛgiĩn lɛn tumaa n ke ya?» Zesee ná a lɛ si: «Nɛgiĩn lɛn kiɛɛrɛdɛnaa tá tɔn kio, a na á woo tɔɔn lɛduə̃.» Samayeli pɛ Zesee ne: «Ǹ dia ǹ wo ga li. Bɛ̀ a bie a daa wa, wɔ a re màn bii a kio wa.»

¹² Zesee tɔ́n nə ǹ dia, ǹ nə́ woo kũ ǹ nə́ daa nɛ. A na á goã siĩni, a yɔrɔ n tɛ pii a gamaa n kɔɔ̃nɛ. Dɛnaa Lawa nə́ n toa Samayeli ganaa: «Yoo n nyɔɔ lɔ a ganaa, a giala, a din lɛ nɛ.»

¹³ Samayeli nyɔɔ lɛ saa màn bɛn lɛ nɛ á lɔ a ganaa ǹ golon lɛn yɔrɔ-a. Dɛnaa Lawa yiri gisĩ Davida la. A kũ bɛa pinaa kɛ lɛ ganaa, a na á goã Davida la miɛ̃. Bɛ kio, Samayeli zii saa á woo Ramaa.

Davida goã dí mɛn nyɛɛ Sayulu ni

¹⁴ Dɛnaa Lawa yiri woo, á Sayulu daa. Dɛnaa Lawa toa nɔ̀ɔn baraa gisĩ Sayulu la, á goã a yiri lɔlɛkɔn.

¹⁵ Sayulu a dí-nyalin nə́ pɛ Sayulu-n kɛnɛn: «Á ke, Lawa nɔ̀ɔn baraa dia n la, a tá n yiri lɔlɛkɔn.

¹⁶ Yǎa wɔsɛn dɛnaagiĩ boo da! Wɔsɛn man a din a dí-nyalin lɛa. Wɔ á re woe giɛ tùtu dɛ doɛ̃ wole li. Bɛ̀ Lawa toa nɔ̀ɔn baraa lɛ gisĩn la ǹ mɛn waáraa, tùtu-dɛli lɛ tá re tùtu lɛ dii, bɛ á die toɛ a soɛ kɔ.»

¹⁷ Sayulu pɛ a dí-nyalin lɛn manɛ: «Min mɛn bɛ́ boe a dɛ la, sɔnbɔraanɛ ka bǐɛ kɔ ka ga bɛ li ka kɔ ma la.»

¹⁸ Dí-nyalin lɛn min goon ná a lɛ si: «Sonbore, Zesee lɛ, Bɛtlehɛmu min lɛa, ma bɛa nɛginin kɔn yɛ, á boe a dɛ la. Zia-baali sonbore ne, á nɛginin lɛa, á boo diɛ ka yiri ni, a n giĩ siĩn dɔ lɛa. Dɛnaa Lawa tá kun ni.»

¹⁹ Sayulu minin dia pii Zesee ne: «N nɛginin Davida mɛn bɛ́ tɔɔn lɛduĩ bɛ dia masɛ li.»

²⁰ Zesee tɔ́n dundun kũ, á buuru laanka yɔ bɔnaa goon kaa dundun lɛ la, ka bòe ten goon ne, a ná a nɛgiĩ Davida dia, á woo ǹ kɔ Sayulu la.

²¹ Davida woo dɔ Sayulu li, á giã a giulun, á n dí nyɛɛ nɛ. Sayulu Davida narɛ parsiini, á kũ, á baa a ziabaa ǹ mànan-gũli lɛa.

²² Sayulu minin dia, mà ǹ wo pɛ Zesee-n kɛnɛn: «Bǐɛ̃ kɔ n Davida toa masɛ giulun a dí nya ma nɛ, a giala a tá kɔɔ̃nɛ ma ganaa.»

²³ A saa bɛ lɛ-a lɔn, bɛ̀ Lawa toa nɔ̀ɔn baraa lɛ gisĩ Sayulu la, Davida na á goã tùtu siɛ bɛ̀ a dɛ. Bɛ̀ á dɛ miɛ̃, Sayulu n soɛ koe, a golee kiĩ ni. Nɔ̀ɔn baraa lɛ n soe a n bɔ a nɛ.