Samayeli1 12 - LAWA A BOO SONBORE

Samayeli a boo giala nyɔmiɛ̃ Izirayeli minin manɛ

¹ Samayeli pɛ Izirayeli minin tumaa nɛ: «Á ke, ka bɛ́ ka màn mɛn tumaa pɛ ma nɛ, má n too kɔ a ganaa: Ka bɛ́ mà ma kii koa ka mìi la,

² kii lɛ á ke ka nyɛɛnaan boe kanna kəni. Masɛ din nə́ zizi kɔ, ma ka fulu. Maa nɛnyaanan tan kun ka nɛ. A kũ masɛ a tenmaa ganaa, ma din ni má tɔ wɔ ka nyɛɛnɛ á daa kaa pelo lɛ.

³ Ma á ke! Bɛ̀ má sii kɔn la, ka ma biɛ kɔ Dɛnaa Lawa yɔrɔ-a, ka kii kɛ nɛ Dɛnaa Lawa din bɔ. Man má die a dii hinlaa a dundun si la? Man má mɛnaa die la hinlaa man má bɔ die yii ni? Die na á masɛ lɛ pii, má kiɛ̃ ǹ dɛnaa sii la? Ka pɛ, ma á sarɛɛ.»

⁴ Izirayeli minin lɛn ná a lɛ si: «N mɛnaa wɔ la wa. N bɔ wɔ yii-n wa. N màn si min la wa.»

⁵ Á pɛ ǹ nɛ doo: «Dɛnaa Lawa n kaa siére lɛa. Lawa kii mɛn bɔ, a dɔ n siére lɛa pelo kɛ lɛ nɛ, ka màn kɔn yɛ ma gɔn wa.» Ǹ ná a lɛ si: «A n miɛ̃ lɛn.»

⁶ Samayeli tɔ́n pɛ zaman lɛ nɛ: – Dɛnaa Lawa lɛ din na á Muizu laanka Aarɔn bɔ, á ka digolon waa nɛ, á ǹ bɔ Ezipti gána nɛ.

⁷ Sisia, ka kiɛ̃ ka da Dɛnaa Lawa yɔrɔ-a, Dɛnaa Lawa sii bǐɛ̃ mɛn tumaa zɛnaa ka dinin laanka ka digolon manɛ, ka bɛ nimi ǹ ni bɔrɔ, ǹ yɛ.

⁸ Zakɔba bɛ́ á dɔ Ezipti gána nɛ, ka digolon lɛn bɛ́ nɔmaa gɔ́ɔ̃ nɛ, ǹ nə́ n lɛ dɛ Dɛnaa Lawa ganaa. Dɛnaa Lawa tɔ́n Muizu laanka Aarɔn dia ǹ nə́ ka digolon lɛn waa Ezipti gána nɛ, ǹ nə́ soo ǹ ne, ǹ nə́ daa ǹ kaa tán kɛ lɛ la kanaa.

⁹ Dɛnaa Lawa lɛ, kaa Lawa lɛa, ka yiri bɔ nɛ. Bɛ lɛ nɛ, á ka wɔ Asɔɔrɔn sɔraasin goledɛnaa Sizeraa gɔn, ka Filisiti minin laanka Moabu gána a kii ni, bɛn nə́ zia da ka ganaa.

¹⁰ Ka nə́ n lɛ dɛ Dɛnaa Lawa ganaa, ka nə́ pɛ: «Wɔsɛn nə́ sii baraa zɛnaa, a giala, wɔ́ Dɛnaa Lawa lɛ toa walan wɔ́ dìn guguru kɔ, *Baali laanka Asitartee ne. Sisia, wɔsɛn si wɔ zɔ́ɔn la, wɔ tá re n guguru koe.»

¹¹ Dɛnaa Lawa na á tɔ́n Zerubaali dia, Bedan nɛ, ka Zɛftee ka masɛ Samayeli ni. Kaa zɔ́ɔn mɛnɛn bɛ́ ǹ nə́ ka da bii, á ka si bɛn la á ka kaa. Ká giã gána lɛ nɛ, ka yii-nyɛɛ nɛ.

¹² Sɛnɛ, ka bɛ́ ka yɛ mà Amɔn gána a kii Naasi lɛ n die koe ka lɛ ka zia nɛ, ka pɛ ma nɛ mà haba! Mà yǎa kii goɛ̃ kasɛn mìi la. A da yaa kaa Lawa, Dɛnaa Lawa lɛ n kaa kii lɛa.

¹³ Sisia, ka min mɛn bɔ kii lɛa á ke. Ka dinin man ka nɔ̀n da nɛ, á ke Dɛnaa Lawa koa ka mìi la sisia.

¹⁴ Bɛ̀ ka tá nyɛ́ɛ biɛ Dɛnaa Lawa yii ni, ka tá a guguru koe, ka tá n too koe a lon, ka n ka a n piɛ̃ ka a boo-n wa, bɛ n die toɛ, ka dinin ni, ka kii mɛn bɛ́ ka mìi la, ka kɔn wɔ ma ka kaa Lawa, Dɛnaa Lawa lɛ nɛ.

¹⁵ Sɛnɛ, bɛ̀ ka n too kɔ Dɛnaa Lawa lon wa, bɛ̀ ka n piã ka Dɛnaa Lawa a boon ne, ka á re nɔmiɛ̃ Dɛnaa Lawa gɔn ka ka din wɔ bɛ́ lɔn.

¹⁶ Bɛ lɛ nɛ, ka golee kànaa sisia Dɛnaa Lawa bɛ́ re sii gole mɛn zɛnɛɛ ka dinin yii ni ka bɛ yɛ.

¹⁷ Táa *belee kurii biikoo n ka kɛ-n sisia? Masɛ n die Dɛnaa Lawa nyankoe. Á re die ka la a paraa laanka la nɛ. Bɛ̀ bɛ nə́ n zɛnaa, ka tɔn dɔ̃ kəni mà ka nɔ̀n mɛn da Dɛnaa Lawa la ka kii-n ke, sii baraa gole ne, ka zɛnaa Dɛnaa Lawa yii li.

¹⁸ Samayeli Dɛnaa Lawa nyankɔ. Dɛnaa Lawa la da ginii ganaa, á la kaa, a din pinaa kɛ lɛ nɛ. Zaman lɛ tumaa nyɛ́ɛ baa Dɛnaa Lawa laanka Samayeli ni parsiini.

¹⁹ Zaman lɛ tumaa pɛ Samayeli ni: «Dɛnaa Lawa lɛ, n Lawa lɛa, a nyankɔ n di-nyanlin lɛn lɛa, màn mɛn bɛ́ toɛ, wɔ baran gã wa. A giala, wɔa sii baraan lɛn tumaa a là kaa, ka wɔa ga kii li kɛ nɛ.»

²⁰ Samayeli pɛ zaman lɛ nɛ: «Ka baran nyɛ́ɛ baa wa! A laanɛ ka dinin man ka sii baraa bɔbɔnɛɛ kɛ zɛnaa ke, ka baran n paǹ kɔ Dɛnaa Lawa-n wa. Sɛnɛ ka Dɛnaa Lawa guguru kɔ ka ka foo din tumaa nɛ.

²¹ Ka baran ǹ paǹ kɔ wa. Bɛ̀ bie wa, ka ǹ die koe màn kokooron kio lɛ, mànan mɛnɛn bɛ́ ǹ ba sii kɔn bǐɛ̃ koe wa, ǹ nə́ ǹ ba min dɔ boe sii-n wa. A giala, maǹ màn kooroon lɛa.

²² Dɛnaa Lawa tɔ golebaa lɛ taman yii, a ba re a zaman lɛ toɛ walan wa. A giala, Lawa na á bɔ a din ni, á ka baa a zaman lɛa.

²³ Masɛ din wɔ paǹ li, bɛ̀ má Lawa nyankɔ lɛ da kaa lɛa, man má sii baraa zɛnaa Lawa nɛ. Màn mɛn nə́ ke siĩni, pepere, masɛ n die ka darɛɛ bɛa zɛnaa ganaa.

²⁴ Sii kɔsɔ banban, ka nyɛ́ɛ baa Dɛnaa Lawa yii ni, ka a guguru kɔ ka bɔlɔgoondɛnaabaa nɛ, ka ka foo din tumaa nɛ. A giala Dɛnaa Lawa sii dadaran mɛnɛn zɛnaa ka nɛ, ka ga bɛ-a dɛ!

²⁵ Sɛnɛ, bɛ̀ ká sii baraa zɛnaa, ka tá re bɔ̀n biɛ, ka dinin laanka kaa kii lɛ nɛ.»