Samayeli1 11 - LAWA A BOO SONBORE

Sayulu boo Amɔn tɔrɔn la

¹ Naasi n Amɔn tɔrɔ lɛa. Á woo Zaabɛsi kiwi gialaa, Galaati gána nɛ, á kũ. Zaabɛsi minin tumaa pɛ Naasi ni: «Lɛ kɔ, wɔ giã kun ka là nyantoro ne, wɔ á re dí nyɛɛ n nɛ.»

² Sɛnɛ Amɔn tɔrɔ Naasi lɛ nə́ ǹ lɛ si á pɛ: «Wɔ laan bɛ̀ wɔ n lɛ-kɔ lɛ we ka ka nɛ, yǎa ma ka tumaa gusin a yii puri, masɛ bɛa sìi kɛ lɛ da Izirayeli kuturu ganaa.»

³ Zaabɛsi kiwi a min golen nə́ pɛ nɛ: «Wɔsɛn toa walan a dɔ lɛawaa sɔbaa. Wɔ tá re minin diɛ ǹ boo da Izirayeli a bǎãn tumaa nɛ. Bɛ̀ min nə da wɔ si, á wɔ kaa wa, wɔ á re soe wɔ tele n ganaa, wɔ n dinin kɔ n la.»

⁴ Ǹ min mɛnɛn dia, ǹ nə́ dɔ Sayulu a kiwi, Gibeya. Ǹ nə́ boo lɛ saa ǹ nə́ pɛ zaman lɛ nɛ. Zaman lɛ tumaa kaa wuu ni. Bɛ á zɛnɛɛ, bɛ̀ Sayulu n boe wuru-n die, a diin kio.

⁵ Sayulu nə́ n toa: «Wàa na á baa zaman lɛ á wuu pii?» Zaabɛsi minin nə goã ǹ nə́ boo mɛn da, ǹ nə́ bɛ saa ǹ nə́ pɛ Sayulu ni.

⁶ Sayulu bɛ́ á bɛa boo lɛ ma, Lawa yiri gisĩ la. A foo yoo parsiini.

⁷ Sayulu dii màn paa kũ, á ǹ dɛ, á ǹ kakã. Min mɛnɛn nə da boo lɛ pɛ, á siĩ kukurii lɛ kɔ ǹ la, ǹ nə́ woo ne Izirayeli a bǎãn yii ni. Á pɛ ǹ nɛ dɔn, mà ǹ pɛ mà min mɛn bɛ́ a ba re koe Sayulu laanka Samayeli lɛ a wo zia la wa, mà maǹ die ǹ dɛnaa a diin dii n nə ǹ kakã kɛnɛn. Nyɛ́ɛ zaman lɛ kũ parsiini. Ǹ nə́ yoo ǹ nə́ ǹ wɔ yii kɔn ǹ nə́ woo.

⁸ Sayulu nə́ ǹ nimi Bezɛki kiwi. Izirayeli minin man nə́ goã min duu biɛsɔɔ (300 000). Zudaa minin man nə́ goã min duu pɔsɔɔ (30 000).

⁹ Min mɛnɛn nə goã ǹ nə́ daa boo lɛ pɛ, ǹ nə́ pɛ bɛn manɛ mà ǹ wo pɛ Zaabɛsi minin manɛ kɛnɛn Galaati Gána nɛ: «Biɛ̃, wasa bɛ́ re parɛɛ taãnɛ ǹ mɛn waáraa, ka á re dɔmalɛ yii.» Ǹ nə́ kiɛ̃ ǹ nə́ daa pɛ Zaabɛsi minin manɛ. Zaabɛsi minin foo kɔɔ̃n kɔ.

¹⁰ Zaabɛsi minin lɛn nə́ pɛ Amɔn tɔrɔn lɛn manɛ: «Biɛ̃, wɔsɛn tá re ǹ dinin koe ka la, bɛ̀ sii mɛn dɔ ka yii li, ka bɛ zɛnaa wɔsɛn manɛ.»

¹¹ Bɛa Lɛawaa kəni, Sayulu zaman lɛ na kɔn wɔlɔ sɔɔ. Lɛ̀ laan bɛ̀ a n wɛɛ, ǹ nə́ woo kaa ǹ zɔ́ɔn bǎã nɛ. Ǹ nə́ Amɔn tɔrɔn lɛn dɛ yǎa wasa a paraa taãn biikoo li. Zia lɛ bɛ́ a min mɛnɛn bii wa, bɛn nə́ n pɛsɛ̃, n ba ǹ kɔnɔn yii kun min paa wa.

¹² Zaman lɛ pɛ Samayeli ni: «Dien man nə́ goã pii mà Sayulu doamaa bie a wɔa kii baa wa? Ka bɛa minin kɛn lɛn kɔ wɔsɛn la, wɔ ǹ dɛ ǹ gã.»

¹³ Sayulu pɛ: «Min kɔn ba n dii lɛawaa kɛ miã li wa, a giala, pelo lɛ nɛ Dɛnaa Lawa Izirayeli si á da.»

¹⁴ Samayeli pɛ zaman lɛ nɛ: «Ka daa, wɔ wo Gilgaali, wɔ wo nyaa mà Sayulu n kii lɛa.»

¹⁵ Zaman lɛ tumaa woo Gilgaali. Ǹ nə́ Sayulu koa kii lɛa Dɛnaa Lawa yɔrɔ-a walan. Ǹ nə́ barka da ǹ wúlu bɔ Dɛnaa Lawa nɛ. Bɛ kio, Sayulu laanka Izirayeli minin tumaa nə́ n nyɛnyɛɛ walan parsiini.