Samayeli1 10 - LAWA A BOO SONBORE

Samayeli nyɔɔ lɔ Sayulu ganaa, kii lɛa

¹ Samayeli nyɔɔ màn saa, á nyɔɔ kaa Sayulu mìi ni. Bɛ kio, á n sɔɔ Sayulu ni, á pɛ nɛ: – Dɛnaa Lawa na á n bɔ, á n koa kii lɛa n din a zaman Izirayeli minin lɛn mìi la.

² Pelo, n kiɛ̃ a bɔ masɛ li kio, n tá re kiɛ giĩ min paa lɛ, Sɛlsaa Kiwi, Raseli a yala genli Bɛnzamɛn tɔrɔn tán gèlè la. Ǹ tá re pii n ni: «N bɛ́ ń woo ga dundun daanan mɛnɛn li, n nə́ ǹ yɛ. Á ke, n díi yiri din bɔ ka dundun daanan lɛn sii ni sisia, sɛnɛ, a nə n gɔ́ɔ̃ bii ka n din ni kanna, bɛ̀ á n pii: Man die wàa zɛnɛɛ maa nɛginin lɛ wɔ paǹ li.»

³ Sayulun bɛ́ bǎã mɛn nɛ, bɛ̀ ń woo nyɛɛnɛ sɔsɔɔ á la bɛ nɛ, n nə n doe Tabɔɔrɔ a da sasa kɛ li. Giĩ min sɔɔ tá re die n yiɛ walan, kiɛ̃ woe Lawa guguru koe Betɛli. Bòe banɛɛ sɔɔ tá goon gɔn, buuru mìi sɔɔ tá goon gɔn, yɔ bɔnaa tá goon gɔn.

⁴ Ǹ tá re fòo diɛ n nɛ, ǹ buuru mìi paa kɔ n la, n die n lɛ kɔ n si.

⁵ Bɛ kio, n tá re die doe Gibea-Eloyimu, bɛ n Filisiti minin sɔraasin giã ǹ bǎã goon lɛa. Bɛ̀ n tá re we kiwi lɛ nɛ, n tá re kɔnpii ka Lawa a boo gii-dali zaman kɔn nɛ, boe *wúlu bɔ ǹ bǎã nɛ, minin nə́ ǹ nyɛɛnɛ, tùtun didii, maàn didi, pìin pipii, kɔnkoɛɛ̃nɛn didii, bɛ̀ ǹ dininmaan tá Lawa a boo gii-dali baa ǹ siin zɛnɛɛ.

⁶ Dɛnaa Lawa yiri tá re gisĩ n la, n tá re Lawa a boo gii-dali baa ǹ siin zɛnɛɛ kunun ǹ ni, n tá re n bɔyɛɛ n nə n baa ka min kɔsɔ tɔrɔ nɛ.

⁷ Bɛ̀ ń bɛa siin kɛn lɛn yɛ n zɛnɛɛ ǹ mɛn waáraa, n gɔn bɛ́ re kɔnpii ka sii woo sii ni, bɛ zɛnaa, a giala Lawa tá kunun n ni.

⁸ N die n wo Gilgaali ma nyɛɛnɛ, masɛ á die n yiɛ walan, wɔ wúlu bɔ: *wúlu màn tiɛ̃n laanka barka da ǹ wúlu mànan nɛ. N die n ma ma duə̃ lɛawaa sɔbaa gɔ́ɔ̃ nɛ yǎa ma die n yiɛ. N doamaa bɛ́ nɛ n sii mɛn zɛnaa, ma tɔn bɛ nyaa n nɛ.

⁹ Sayulu nə n dɔ̀ɔ̃ kɔ lɔn, mà a n kiɛ̃ n boe Samayeli li, Lawa ná a foo bɔyaa. Samayeli boo mɛn yii da nɛ, a yii lɛ pã bɛa pinaa kɛ lɛ nɛ.

¹⁰ Ǹ bɛ́ ǹ nə́ dɔ Gibeya, Lawa a boo gii-dalin nə́ kaa kun ǹ nə́ daa ǹ da lɛ. Lawa yiri gisĩ la, á Lawa a boo gii-dali baa ǹ siin zɛnaa kunun ǹ ni.

¹¹ Min mɛn din tumaa goã doɛ̃ lɛlɛ, bɛn nə́ yɛ Lawa a boo gii-dali baa ǹ siin zɛnɛɛ, kun ka Lawa a boo gii-dalin ni. Maǹ nə́ goã pii kɔn nɛ zaman lɛ bii: «Wàa sii na á Kiisi a nɛgiĩ lɛ yɛ? Sayulu dɔ n kun ka Lawa a boo gii-dalin lɛn nɛ ya?»

¹² Bǎã lɛ a min goon nə́ n toa: «Die n Lawa a boo gii-dalin lɛn mìi la?» Bɛ lɛ n ke boo lɛ nɔmaa á suusu baa: «Sayulu dɔ n kun ka Lawa a boo gii-dalin ni ya?»

¹³ Sayulu bɛ́ á Lawa a boo gii-dali baa ǹ siin zɛnaa á nya, á kiɛ̃ á woo wúlu bɔ ǹ bǎã nɛ.

¹⁴ Sayulu ǹ di lɛ dɔɔ̃ngiĩ pɛ Sayulu laanka a dí-nyali ni: «Ka n ká woo maa?» A ná a lɛ si: «Wɔ n wɔ́ woo ga dundun daanan li, sɛnɛ wɔ màn kɔn yɛ wa. Wɔ tɔ́n kiɛ̃ wɔ́ woo Samayeli li.»

¹⁵ Sayulu ǹ di ǹ dɔɔ̃ngiĩ lɛ pɛ nɛ: «Samayeli màn mɛn pɛ ka nɛ, bǐɛ̃ kɔ, n bɛ laakalaa wɔsɛn manɛ.»

¹⁶ Sayulu ná a lɛ si: «Samayeli pɛ wɔsɛn manɛ, mà dundun daanan lɛn nə́ yɛ.» Sɛnɛ, Samayeli boo mɛn da kiibaa lɛ wɔ paǹ li, Sayulu bɛ pɛ-n wa.

Sayulu a koa kii lɛa boo

¹⁷ Samayeli zaman lɛ bíi á ǹ sɔkɔn Dɛnaa Lawa yɔrɔ-a, Misipaa kiwi.

¹⁸ Á pɛ Izirayeli minin lɛn manɛ mà Dɛnaa Lawa lɛ, Izirayeli a Lawa lɛa, mà bɛ n kɛ pii: – Masɛ din ni má Izirayeli minin waa Ezipti gána nɛ, má soo ǹ ne. Má ǹ si Ezipti minin la má ǹ kaa, ka gánan mɛnɛn tumaa goã pàã nyɛɛ ka nɛ.

¹⁹ Sɛnɛ ka dinin man ke pelo, ká n piã ka kaa Lawa nɛ, asɛ mɛn bɛ́ n doe ka lɛ, kaa nɔmaan laanka kaa fuu tumaa gɔ́ɔ̃ nɛ. Ka pɛ nɛ mà yǎa ma kii koe kasɛn la. «Ka kiɛ̃ kanna kəni, ka giã bii-a Dɛnaa Lawa yɔrɔ-a, tɔrɔ lɛ yii li, tanlɛ yii li.»

²⁰ Samayeli Izirayeli tɔrɔn lɛn tumaa wɔlɔ kunu kɔ a din ganaa. Dɛnaa Lawa nə́ n gɔn nyaa Bɛnzamɛn tɔrɔn ganaa.

²¹ Samayeli Bɛnzamɛn tɔrɔ wɔlɔ kunu kɔ, tanlɛ yii li: «Dɛnaa Lawa nə́ n gɔn nyaa Matri a tanlɛ ganaa. Bɛ kio, Dɛnaa Lawa tɔ́n nə n gɔn nyaa Kiisi a nɛgiĩ Sayulu ganaa. Ǹ nə́ ga li, ǹ yɛ wa.»

²² Ǹ nə́ wusoo ǹ nə́ nɔ̀n da Dɛnaa Lawa la: «Min kɔsɔ tan, ǹ dɛnaa n kànaa?» Dɛnaa Lawa pɛ: «Á ke durii-n tán guĩn genli.»

²³ Ǹ nə́ baa si ǹ nə́ woo bɔ walan, á daa giã bii-a zaman lɛ bii. A sasabaa goã á la zaman lɛ tumaa wɔ nɛ. Maǹ nə́ goã kuĩ a kɔkɔrɔ nɛ.

²⁴ Samayeli pɛ zaman lɛ tumaa nɛ: «Min mɛn bɛ́ Dɛnaa Lawa bɔ, ká yɛ? A miã banban kun ka zaman lɛ-n wa.» Zaman lɛ tumaa nə́ n lɛ dɛ ka foo ne: «Lawa na a gɔn belebɔ a nɛ!»

²⁵ Kiibaa lɛ doamaa bɛ́ nɛ, a n zɛnaa lɔn, Samayeli bɛ yɔrɔ nyaa zaman lɛ nɛ, á kiɛ̃ sɛ́wɔ nɛ á da tán Dɛnaa Lawa yɔrɔ-a. Bɛ kio, Samayeli nə́ ǹ gɔn bɔ zaman lɛ tumaa ganaa. Didie woo piɛ.

²⁶ Sayulu dɔ kiɛ̃ á woo a piɛ Gibeya kiwi. Min foo taãnaan mɛnɛn bɛ́, Lawa dí nya ǹ foo ne, bɛn nə́ woo kun ka Sayulu ni.

²⁷ Sɛnɛ min kɔrɔn nə́ yɛ, ǹ nə́ goã pii kɛnɛn: «Wàa-n sɛn! Kɛ lɛ n die wɔsɛn boe a nɛ!» Ǹ pàã wɔ Sayulu n wa, ǹ bǐɛ̃ goon baa la wa. Sɛnɛ Sayulu giã ka a din ni.