Rɔmu minin 7 - LAWA A BOO SONBORE

Sii a kɔnboe mɛn nə n saa kɔn-wɔ la

¹ Ma dɔɔ̃nɔn lɛn, ma bɛ́ re màn mɛn diɛ, ma á doɛ̃ máa ka á re bɛ giala miɛ, a giala, man giɛ ka ganaa Lawa a dí-pɛn dɔ̃lin lɛa. Ka á doɛ̃ mà dí-pɛn man min mìi ni, a yiikoonaabaa dinsɔɔ̃ gɔ́ɔ̃ nɛ.

² Bɛa yɔrɔ kɛ la, bɛ̀ lɔ wɔ giĩ li, dí-pɛ na á tan, a nə́ ǹ doɛ kɔn yǎa giĩ lɛ giɛ̃. Sɛnɛ, bɛ̀ giĩ lɛ gã, doa-kɔn-a ǹ dí-pɛ ba lɔ lɛ mìi-n doo wa.

³ Bɛ lɛ taman yii, bɛ̀ lɔ zuũ yii á koo, yǎa lɔ lɛ wo wɔ giĩ kɔsɔ li, maǹ die bíi lɔ kɔrɔ. Sɛnɛ, bɛ̀ lɔ zuũ gã, bɛ̀ á wɔ min kɔsɔ li, ǹ ba re bíi lɔ kɔrɔ wa, a giala, doa-kɔn-a ǹ dí-pɛ a biɛ ba a bɔlɔ-a doo wa.

⁴ Ma dɔɔ̃nɔn lɛn, ka dɔn man miɛ̃. *Krita a gɛ̀ lɛ gɔ́ɔ̃ nɛ, ka dɔn man ká gã dí-pɛn wɔ gɔn la. Sisia, ka ǹ min kɔsɔ wɔn lɛa, min mɛn bɛ́ a yii kaa á n bɔ geren bii. Wɔ ǹ bɛ wɔn lɛa, màn mɛn bɛ́ toɛ, wɔ dí nya Lawa nɛ.

⁵ Sonbore, wɔ bɛ́ wɔ goã tɔ we, á n kɔnpii wɔ dinin dùũ ni ǹ mɛn waáraa, wɔ n wɔ́ goã dùũ sii babaraan pàã giulun, bɛn nə́ wɔ diɛ sii baraa zɛnaa ganaa. Dí-pɛn lɛn dinin man nə́ bɛa dùũ sii babaraan kɛn lɛn yii kaa. Haya kəni, siin mɛnɛn bɛ́ wɔ diɛ gɛ̀ nɛ, wɔ n wɔ́ goã bɛn zɛnɛɛ.

⁶ Sisia, Lawa wɔ si dí-pɛn la. Siin mɛnɛn nə goã wɔ yii lɛlɛ ka kaka, wɔ n goon ka geren ne bɛn wɔ a paǹ li kanna. Bɛ lɛ nɛ, wɔ bie dí nyɛɛ Lawa-n doo á kɔnpii ka sii zɛnaa ǹ gɔn zizi kɛ nɛ a din a dí-pɛn boo kiɛ̃ kɛ-n wa. Lawa din a Yiri Fu n pàã koe wɔ la, wɔ n dí nyɛɛ nɛ sisia, á kɔnpii ka sii zɛnaa ǹ gɔn dii ni.

Dí-pɛn lɛn mìi n ka wàa nɛ?

⁷ Wɔ ǹ die pii mà wàa kəni? Mà dí-pɛn man màn baraa lɛa? Haayii dɛ! Sɛnɛ, wɔ ǹ wɔ́ sii baraa dɔ̃ dí-pɛn barka nɛ. Bɛ̀ dí-pɛn bie ǹ nə́ pɛ mà «n yii baran bɔ min kɔsɔ gɔn màn kɔn li wa», bɛ̀ wɔ a yii bɔ min kɔsɔ gɔn màn li doɛ̃ sii baraa lɛa wa.

⁸ Sii baraa sɛ na á bɛ lɛ gɔn kũ gɔrɔ, á yii bɔ min kɔsɔ gɔn màn li tɔrɔ tumaa da wɔ foo ne, bɛa dí-pɛ kɛ lɛ pàã ganaa. Bɛ̀ dí-pɛn banban, pàã ba sii baraa-n wa.

⁹ Lɛlɛ-lɛlɛ, dí-pɛ bɛ́ a banban, gɛ̀ goã wɔ mìi-n wa. Sɛnɛ, dí-pɛ lɛ bɛ́ á daa, pàã wɔ sii baraa nɛ, gɛ̀ daa wɔ mìi ni.

¹⁰ Dí-pɛ mɛn doamaa bɛ́ nɛ, a wo wɔ da nyin nyabaã nɛ, bɛ nə́ n bɔyaa á woe wɔ diɛ gɛ̀ nɛ.

¹¹ Sii baraa na á dí-pɛ lɛ gɔn kũ, á n doa a pàã ganaa, á wɔ sã, á gɛ̀ da wɔ mìi ni.

¹² Bɛa yɔrɔ kɛ lɛ la, dí-pɛn man nə́ bɔ Lawa li. Dí-pɛ gogoonmaa mɛn bɔ Lawa li ke, bɛ n pepere, a n siĩni.

¹³ Bɛ n nyɛɛ mà dí-pɛn mɛnɛn bɛ́ siĩni, mà bɛn man wɔ diɛ gɛ̀ nɛ? Haayii dɛ! Sɛnɛ, sii baraa na á n doa dí-pɛ sonboren kɛn ganaa, á gɛ̀ da wɔ mìi ni. Dí-pɛn pàã ganaa, sii baraa a bɔnɛɛbaa kɛ tumaa bɔ kanaa.

Zia mɛn bɛ́ n diɛ minbuiin gɔ́ɔ̃ nɛ

¹⁴ Wɔ á doɛ̃, wáa dí-pɛn man nə́ bɔ Lawa li. Sɛnɛ, wɔsɛn man minbuiin nɛn lɛa, wɔ n sii baraa gɔn bɛ̀rɛn lɛa.

¹⁵ Sonbore, wɔ á màn mɛn zɛnɛɛ, wɔ a bɛ giala miɛ wa. Wɔ bɛ́ giɛ li wɔ màn mɛn zɛnaa, wɔ a bɛ zɛnɛɛ wa. Sɛnɛ, màn mɛn tìĩ bɛ́ boe-n wɔ nyin ni ke, wɔ ǹ bɛ zɛnɛɛ.

¹⁶ Bɛ̀ á daa yaa, wɔ bɛ́ wɔ a giɛ li wɔ màn mɛn zɛnaa wa, wɔ n bɛ zɛnɛɛ, bɛ n nyɛɛ, mà wɔ golee dí-pɛ li, mà wɔ dɔ̃ mà á siĩni.

¹⁷ Wɔ dinin bie bɛa dí kɛ lɛ nyɛɛ kɛnɛn wa, sii baraa nɛ, sii baraa mɛn bɛ́ wɔ gɔ́ɔ̃-n ke lɛn.

¹⁸ A giala, wɔ́ dɔ̃ wáa sii sonbore kɔ́n ba wɔ gɔ́ɔ̃-n wa, bɛ giala mà ǹ kɔ́n ba wɔ dinin ni wa. Ga sii bǐɛ̃ li n kɔɔ̃n wɔ ganaa, sɛnɛ, a zɛnaa ke, wɔ a boe bɛ la wa!

¹⁹ Wɔ bɛ́ giɛ bǐɛ̃ mɛn li, wɔ a bɛ zɛnɛɛ wa. Wɔ bɛ́ wɔ a giɛ baraa mɛn li wa, wɔ n bɛ zɛnɛɛ.

²⁰ Bɛ̀ ń yaa wɔ bɛ́ giɛ bǐɛ̃ mɛn li, wɔ a bɛ zɛnɛɛ wa, wɔ dinin bie bɛa dí kɛ lɛ nyɛɛ kɛnɛn wa, sii baraa nɛ, sii baraa mɛn bɛ́ wɔ gɔ́ɔ̃-n ke lɛn.

²¹ Sii lɛ nə n zɛnɛɛ masɛ-n kɛnɛn: masɛ mɛn bɛ́ giɛ li ma bǐɛ̃ zɛnaa, man boe sii baraa dinsɔɔ̃ a zɛnaa la.

²² Ma gɔ́ɔ̃ nɛ, Lawa a dí-pɛn man kɔɔ̃n ma ganaa.

²³ Sɛnɛ, man yii ma din ni, ma yiri bɛ́ dí-pɛn mɛnɛn li ke, pàã kɔsɔ na a tan, á n zia biɛ bɛa dí-pɛn kɛn lɛn ganaa. Bɛa pàã kɛ lɛ n ma biɛ sii baraa a bɛ̀rɛ lɛa, sii baraa mɛn bɛ́ ma gɔ̀nɔn nɛ.

²⁴ Maa wɔ n ka bɔ̀n nɛ! Maa sii baraa gɔ̀nɔn kɛ lɛ n woe ma diɛ gɛ̀ nɛ! Die n die ma sii la kəni?

²⁵ Lawa nɛ! Ma á barka diɛ nɛ ka wɔa Dɛnaa Yezu Krita tɔ nɛ! Á ke le! Wɔ gogoonmaa, wɔ yiri n lɛ koe Lawa a dí-pɛn ganaa, wɔ dùũ siin man dí nyɛɛ sii baraa nɛ.