Rɔmu minin 15 - LAWA A BOO SONBORE

Miã kɔsɔ foo kɔɔ̃n kɔ boo

¹ Wɔsɛn mɛnɛn pàã bɛ́ gole golee Lawa li gɔ́ɔ̃ nɛ, wɔ doamaa nɛ, min mɛnɛn pàã bɛ́ kiɛɛrɛ golee Lawa li gɔ́ɔ̃ nɛ, wɔ bɛn sii si wɔ ganaa. Siin mɛnɛn bɛ́ kɔɔ̃n wɔ ganaa, wɔ baran ga bɛn li wa.

² Min gogoonmaa n siĩni a ga li, mà a kɔɔ̃n kɔ ǹ miã kɔsɔ ganaa. Bɛ nə n baa sii bǐɛ̃ lɛa, a n dɔ ǹ miã lɛ lɛ, a wo nyɛɛnɛ golee Lawa li gɔ́ɔ̃ nɛ.

³ Sonbore, *Krita dinmaa lɛ bie á ga a dùũ siin li wa. Sɛnɛ, ká a bɛ́ á n kiɛ̃ lɔn: «N sɔ kɔma a wolen sɔ na á dɔ masɛ ganaa.»

⁴ A da yaa, màn mɛn yii nə n kiɛ̃ lɛlɛ, bɛ na á n kiɛ̃ wɔa yiri kɔmala a lɛa, màn mɛn bɛ́ toɛ, Lawa a boo lɛ wɔ foo taã, a sii simaa kɔ wɔ la, wɔ foo boo la a goã doa nɛ.

⁵ Lawa n foo tãbaa laanka sii simaa koe. Bɛa Lawa lɛ nə n dɔ ka lɛ, ka lɛ boo la a goã kun, ka Yezu Krita bɛ́ giɛ li lɔn.

⁶ Màn mɛn bɛ́ toɛ, ka wɔa Dɛnaa Yezu Krita n Di Lawa lɛ guguru kɔ, ka gɔ́ɔ̃ goon ne, ka lɛn goon ne.

Zuifun lɛ kɔ tɔrɔ kɔsɔn ganaa boo

⁷ Ka lɛ kɔ kɔn ganaa, ka Krita din bɛ́ á lɛ kɔ ka ganaa lɔn ke, á Lawa tɔ bɔ.

⁸ Man bɛ lɛ pii ka nɛ, máa Krita na á daa Zuifun lɛa, á nyaa mà Lawa n bɔlɔgoondɛnaa lɛa. Lawa bɛ́ a n lɛ kɔ Zuifun digolon la ka siin mɛnɛn nɛ, a na á bɛn zɛnaa á ǹ lɛ pã, ka Krita lɛ barka nɛ.

⁹ Krita lɛ na á daa, màn mɛn bɛ́ toɛ, tɔrɔ kɔsɔn mɛnɛn bɛ́ ǹ ba Zuifun lɛa wa, bɛn dɔn nə Lawa tɔ bɔ, a bǐɛ̃baa a lɛa. A na á n kiɛ̃: «Bɛ lɛ taman yii ni ma á re n guguru koe tɔrɔ kɔsɔn bii, ma á re loe loe man tɔ bɔ nɛ.»

¹⁰ Lawa a boo lɛ n pii doo: «Tɔrɔn lɛn, ka n nyɛnyɛɛ kun ka Lawa din a tɔrɔ boe lɛ nɛ!»

¹¹ Á wusoo á pɛ doo: «Ka Lawa guguru kɔ, tɔrɔ kɔsɔn lɛn, tɔrɔ din tumaa Lawa tɔ bɔ!»

¹² Lawa a boo gii-dali Izayii dɔ́ pɛ: «Zesee tɔrɔ lɛ á re die, á re yui a giã gánan dinin tumaa mìi la, ǹ tá re n foo doɛ a din ganaa.»

¹³ Lawa mɛn bɛ́ foo-doa koe, a din die a foo kɔɔ̃nbaa kɔ ka la, ka là nyantoro ne, kaa golee a din li lɛ gɔ́ɔ̃ nɛ. Màn mɛn bɛ́ toɛ, kaa foo-doa lɛ pàã gole kɔ, Yiri Fu pàã barka nɛ.

Pooli a sɛ́wɔ kɛ a kiɛ̃ ka boo kaka-n mìi

¹⁴ Masɛ dinmaa waa la, máa ka á sii sonbore zɛnɛɛ, haalɛ ta ma yiri kɔ ka la dinin wa. Ka á Lawa dùũ sii doɛ̃, bɛ lɛ taman yii ni, ka á boe la ka á yiri koe kɔn la.

¹⁵ Má sɛ́wɔ kɛ a paǹ tɛn kiɛ̃ ka boo kaka nɛ, a mìi n ka kɛ dinsɔɔ̃ nɛ: Ka bɛ́ màn mɛn doɛ̃ gɔrɔ ke lɛn, man ka yiri gisĩ bɛ nɛ. Lawa din bɛ́ á dí mɛn kɔ ma la, ká a din a bǐɛ̃ barka nɛ, bɛ n zii koe ma la ma á zɛnɛɛ miɛ̃.

¹⁶ A giala, Lawa na á ma bíi, mà ma Yezu Krita lɛ boo da tɔrɔ kɔsɔn bii. Mà ma Lawa a Boo Tii Kɔɔ̃n kɛ pɛ ǹ nɛ, màn mɛn bɛ́ toɛ, ma boo la ma ǹ kɔ Lawa la, ǹ nə́ kɔɔ̃n a ganaa. Man bɛa dí lɛ nyɛɛ ka wúlu-bɔle bɛ́ *wúlu màn koe Lawa la lɔn. Yiri Fu lɛ n toɛ, Lawa boo la a lɛ kɔ ǹ ganaa.

¹⁷ Bɛ lɛ na á toa, masɛ á boe la ma n din gole kɔ, maa kaa-kun ka Yezu Krita-n lɛ gɔ́ɔ̃ nɛ, Lawa a dí kɛ lɛ wɔ gɔn la.

¹⁸ Masɛ a re n foo taɛ̃ ma màn kɔ́n boo da wa, bɛ̀ á n bɔ Krita din nə ǹ mɛnɛn zɛnaa ma gɔn, á tɔrɔ kɔsɔn bíi, á ǹ kaa Lawa bɔlɔ-sii ganaa. A na á bɛa di lɛ nya maa boo laanka maa sii-zɛnaan barka nɛ,

¹⁹ ka kaãbaa ǹ sii dadaran barka nɛ, ka Yiri Fu pàã barka nɛ. Bɛ lɛ na á toa, a kũ Zeruzalɛmu kiwi ganaa a wo Ilirii gána yaa, má Krita a Boo Tii Kɔɔ̃n lɛ pɛ paǹ din tumaa ganaa.

²⁰ Krita tɔ bɛ́ a tɔn nə n pɛ bǎã mɛn nɛ bɔrɔ wa, má n doa ma Boo Tii Kɔɔ̃n kɛ pɛ walan. A giala, ma ba li ma dí nya min kɔsɔ a dí giala kɔ ǹ bǎã-n wa.

²¹ Man maa dí nyɛɛ á kɔnpii ka Lawa a boo gii-dali a boo kɛ-n kiɛ̃-n kɛnɛn: «Ǹ bɛ́ ǹ tɔn na a boo da min mɛnɛn man wa, bɛn tá re yii. Min mɛnɛn bɛ́ ǹ na a boo ma wa, bɛn tá re a giala miɛ.»

Pooli boo mɛn da a wo Rɔmu wɔ gɔn la

²² Bɛa dí gole lɛ na á ma sàabaa gunyin damata, ma boo la má dɔ ka li wa.

²³ Sɛnɛ sisia, maa dí nya bɛa gánan kɛn lɛn nɛ. A lɛ̀ damata n ke a n ma gɔ́ɔ̃ nɛ máa ma da bɔ ka li.

²⁴ Man giɛ li ma bɛ zɛnaa sisia. Bɛ̀ ma á woe Espanyi ǹ mɛn waáraa, man giɛ li ma golee ka li. Bɛ̀ má golee wɔ kɔn sii bɔ ǹ mɛn waáraa, ma á doɛ̃ ka á re n doe ma lɛ ma woo.

²⁵ Sɛnɛ sisia, man woe Zeruzalɛmu, Lawa-nyankɔlen dí yɔrɔ boe walan.

²⁶ A giala, Masedoanɛ laanka Grɛki gána a Lawa-nyankɔlen man a gialaa wɔrɔ boboe, ǹ nə́ die koe Zeruzalɛmu wɔn kɛn la doobaabaa gɔ́ɔ̃ nɛ.

²⁷ Bɛa Lawa-nyankɔlen lɛn man nə́ bɛ bɔ ǹ dinin ni. Ǹ doamaa dɔ nɛ. A giala, naforon mɛnɛn bɛ́ golee Lawa li gɔ́ɔ̃ nɛ, Zuifu Lawa-nyankɔlen nə́ bɛn gii kɔn ka tɔrɔ kɔsɔn nɛ, tɔrɔ kɔsɔn dɔn doamaa nɛ, ǹ nə ǹ gɔn mànan gii kɔn ka bɛa Zuifun lɛn nɛ.

²⁸ Bɛ̀ má bɛa dí lɛ yɔrɔ bɔ má nya ka lenlen, bɛ̀ má bɛa màn boboe kɛ lɛ a kaa kun kɔ ǹ la ǹ mɛn waáraa, ma á die woe Espanyi, sɛnɛ, ma á re boe ka li ma tɔ́n kiɛ̃.

²⁹ Ma á doɛ̃ máa ma bɛ́ re doe ka li ǹ mɛn waáraa, man die doe ka Krita a barka lɛ piɛ̃maa-n ma lon kaa wɔ lɛa.

³⁰ Sɛnɛ, sii goon nə́ ke, má n die a nyankoe ka la taãn-taãnɛ, dɔɔ̃nɔn lɛn. Wɔa Dɛnaa Yezu Krita lɛ tɔ ganaa, ka kɔn-narɛɛ tɔ nɛ, Yiri Fu bɛ́ kɔn-narɛɛ mɛn koe, ka n doa parsiini ka Lawa nyankɔ maa lɛa. Ka Lawa nyankɔ kun ma nɛ,

³¹ màn mɛn bɛ́ toɛ, Lawa ma kanbaa Zudee gána a Lawa-doɛ̃ baãnaan kɛn ganaa. Màn mɛn bɛ́ toɛ dɔn, ma bɛ́ woe ka dɔmalɛ mɛn nɛ Zeruzalɛmu, Lawa a minin kɛn nə lɛ kɔ bɛ ganaa ka foo kɔɔ̃n nɛ.

³² Bɛa yɔrɔ kɛ la, man die doe ka li ka nyɛnyɛɛ gole ne, bɛ̀ Lawa golee li dɔn, ma á re susui yii ka bii.

³³ Lawa mɛn bɛ́ là nyantoro koe, bɛ die a goã kun ka tumaa nɛ. A n baa wɔ-n miɛ̃.