Rɔmu minin 14 - LAWA A BOO SONBORE

Lawa a sɔmɔ minin giã kun boo

¹ Min mɛn pàã bɛ́ kiɛɛrɛ golee Lawa li gɔ́ɔ̃ nɛ, ka lɛ kɔ a ganaa, ka baran liere kɔ a taasiɛn wɔ gɔn la wa.

² Min tan, a n taasɛ, mà asɛ á boe la a màn tumaa bii, min kɔsɔ mɛn pàã bɛ́ kiɛɛrɛ golee Lawa li gɔ́ɔ̃ nɛ, bɛa siĩ tɔrɔ kɔ́n soɛ̃ wa.

³ Pàã bɛ́ min mɛn lon á n màn tumaa bii, bɛ doamaa bie a n din gole kɔ màn tɛn biili kɛ ganaa wa. Màn tɛn biili dɔ doamaa bie a kiri kuru màn tumaa biili la wa, a giala Lawa na á bɔ.

⁴ Die n ka nsɛ nɛ, n tá kiri kuri min kɔsɔ a dí-nyali la? A dí sonbore nya laanka a dí baraa nya nɛ, ǹ kɔ́n ba n bǎã-n wa, ǹ tumaa na a goledɛnaa bǎã nɛ. A n die goɛ̃ dí sonbore nyɛɛ, a giala, pàã tá Dɛnaa lon a n dɔ lɛ, a ná a ba a baraa nyɛɛ wa.

⁵ Min tan, á n taasɛ, mà lɛawaa tɛn nə soɛ ǹ miã nɛ, min kɔ́n dɔ tan, lɛawaa yii n goon a gɔn. Didie doamaa nɛ, a sii zɛnaa a kɔnpɛ ka a din a goleemali ni.

⁶ Min mɛn bɛ́ barka we lɛawaa tɛn nɛ, bɛa dɛnaa n bɛ zɛnɛɛ á Lawa tɔ boe ne. Min mɛn bɛ́ màn tumaa bii, bɛ dɔ a dɛnaa n Lawa tɔ boe, a giala, á barka diɛ Lawa nɛ, a màn-bii lɛ a lɛa. Min mɛn dɔ bɛ́ a màn tumaa bii wa, bɛ dɔ n bɛ zɛnɛɛ Dɛnaa a lɛa. A dɔ́ bɛ́ màn mɛn bii, a dɔ n barka diɛ Lawa-n bɛa lɛa.

⁷ Sonbore ne, min kɔ́n bie a tan a din a lɛa wa, min kɔ́n dɔ bie giɛ̃ a din a lɛa wa.

⁸ A giala, bɛ̀ wɔ tan, wɔ n wɔ tan Dɛnaa a lɛa, bɛ̀ wɔ á giɛ̃ dɔn, wɔ ǹ giɛ̃ Dɛnaa a lɛa. Ta wɔ tan, ta wɔ ǹ giɛ̃, wɔ n Dɛnaa wɔn lɛa.

⁹ A giala, *Krita lɛ na á gã, a yii kaa, màn mɛn bɛ́ toɛ, a geren laanka yiikoonaan Dɛnaa baa.

¹⁰ Nsɛ dɔ, wàa na á baa n tá kiri kuri n dɔɔ̃n la? Nsɛ dɔ, wàa na á baa n tá n din koɛ n dɔɔ̃n ganaa? Sonbore ne, wɔ tumaa n die golee Dɛnaa a kiri wɔ ǹ bǎã lɛ yɔrɔ-a, kiri nə n kuru wɔ la.

¹¹ A giala, a n kiɛ̃ nɛ: «Dɛnaa pɛ: Masɛ din yii bɛ́ koo ke, min din tumaa á re n musin kurumii tán ma yɔrɔ-a. Min din tumaa á re n lɛ buĩ a masɛ Lawa tɔ bɔ.»

¹² Bɛa yɔrɔ kɛ lɛ la, didie n die n bɔlɔ pii Lawa-n biɛ̃.

N baran n dɔɔ̃n Lawa-nyankɔle da sii baraa-n wa

¹³ Ka daa wɔ kiri kuru kɔn la lɛ da. Màn mɛn bɛ́ soɛ, a ba siĩni min nə ǹ miã nyanaa a da sii baraa-n wa.

¹⁴ Wɔa tá kun ka Dɛnaa Yezu-n lɛ a lɛa, má dɔ̃, má waa la dɔn taãn-taãnɛ, máa màn kɔ́n ba min *gɔgɔrɛ koe Lawa yɔrɔ-a wa. Sɛnɛ, bɛ̀ min taasɛ, mà màn mɛn tá min gɔgɔrɛ koe Lawa yɔrɔ-a, bɛa màn lɛ n goɛ̃ gɔgɔrɛ ǹ dɛnaa din gɔn.

¹⁵ N dɔɔ̃n bɛ́ giɛ màn mɛn ganaa, mà a ba kɔnboe ka bii-n wa, nsɛ a zɛnaa ǹ sii kɔ́n baran n dɔɔ̃n lɛ nyanaa, a da bɛa màn lɛ a bii ganaa wa. Bɛ̀ n zɛnaa miɛ̃, ma nə n kɔn-narɛ ǹ zii tɔ wɔ wa. Táa Krita na á gã bɛa dɔɔ̃n kɛ lɛ dɔ a lɛa. N bii ǹ màn baran toa bɛa dɔɔ̃n lɛ papaã ǹ zii kũ wa.

¹⁶ Màn mɛn bɛ́ siĩni n yɔrɔ-a, bɛ baran zii kɔ min kɔsɔn la, ǹ boo baraa da wa.

¹⁷ A giala, *Lawa a kiibaa ǹ sii bie màn-bii laanka màn-mii sii lɛa wa. Sɛnɛ, a n peperebaa sii lɛa, là nyantoro ne, ka nyɛnyɛɛ nɛ, Yiri Fu bɛ́ ǹ mɛnɛn lɛn koe.

¹⁸ Min mɛn bɛ́ dí nyɛɛ Krita nɛ bɛa yɔrɔ kɛ lɛ la, bɛa dɛnaa n kɔɔ̃n Lawa ganaa, ka minbuiinin dɔn nɛ.

¹⁹ Sii mɛn bɛ́ toɛ, wɔ goã là nyantoro la kun, wɔ n dɔ kɔn lɛ, wɔ pàã yɛ kun golee Lawa li gɔ́ɔ̃ nɛ, ka daa wɔ n doa wɔ ga bɛ li.

²⁰ Ta n taasɛ mà n tá boe la n màn tumaa bii, n baran Lawa a dí sàabaa bɛa lɛa wa! Sonbore ne, màn-bii din tumaa n siĩni, sɛnɛ, màn mɛn a bii bɛ́ die n dɔɔ̃n nyanɛɛ a da sii baraa nɛ, bɛa bii a siĩn wa.

²¹ Sii mɛn bɛ́ siĩni, bɛ n ka kɛ nɛ, ta siĩ soɛ̃ nɛ, ta màn mii ni, ta sii woo sii ni, bɛ̀ bɛa sii lɛ á die n dɔɔ̃n diɛ sii baraa nɛ, n baran zɛnaa wa.

²² Goleemali mɛn bɛ́ n nɛ, bɛa siin lɛn wɔ gɔn la, bɛ nə n din laanka Lawa bii ni. Min bɛ́ giɛ sii mɛn ganaa sii pepere lɛa, bɛ̀ á boe la á bɛ zɛnɛɛ, bɛ̀ a foo ná a ba a zɛ̀rɛ biɛ wa, bɛa dɛnaa foo á re kɔɔ̃n koe

²³ Sɛnɛ, min mɛn bɛ́ a gɔ́ɔ̃ nə n lonlankoe màn-bii kɔ́n wɔ gɔn la, bɛ̀ bɛa dɛnaa bɛa màn lɛ bii, Lawa n dɔlɔ boe a ganaa. A giala, a sii lɛ zɛnaa á kɔnpɛ a golee Lawa li-n wa. Sii woo sii, a nə n zɛnɛɛ ka golee Lawa li baã nɛ, bɛ n sii baraa lɛa.