Rɔmu minin 1 - LAWA A BOO SONBORE

Boo Tii Kɔɔ̃n mɛn bɛ́ n pii min tumaa nɛ

¹ Masɛ Pooli mɛn bɛ́ Yezu *Krita a bɛ̀rɛ lɛa, masɛ n sɛ́wɔ kɛ kiɛ̃. Lawa na á ma bíi, mà ma dia dí-a wole baa. A na á ma bɔ, mà ma a din a Boo Tii Kɔɔ̃n kɛ pɛ.

² Lawa din na á wɔ a boo gii-dalin lɛ-n, ǹ nə́ pɛ a din a boo sonbore kɛ nɛ, mà asɛ nə́ n lɛ kɔ ka Boo Tii Kɔɔ̃n nɛ.

³ Bɛa Boo Tii Kɔɔ̃n lɛ n boo diɛ a din a Nɛgiĩ Yezu Krita wɔ gɔn la. Wɔa Dɛnaa Yezu kɛ lɛ kii Davida tɔrɔ lɛa, gɔ̀nɔn siĩ wɔ gɔn la,

⁴ a na á goã Lawa a Nɛgiĩ dɔ lɛa. Lawa a Yiri Fu na á bɛ nyaa, ka pàã gole ne, ka bɛa Yezu lɛ a yii-kaa a bɔ geren bii barka nɛ.

⁵ A din lɛ pàã ganaa, Lawa na á bǐɛ̃ baa masɛ la, á ma baa dia dí-a wole lɛa. Mà ma dí nya Yezu ni, ma tɔrɔ kɔsɔn tumaa nyɛɛnaan sabɔ, ǹ Lawa bɔlɔ si, ǹ goleemali wɔ.

⁶ Ka dɔn man bɛa minin kɛn lɛn lɛa, Lawa ka bíi mà ka Yezu Krita wɔn baa.

⁷ Ka mɛnɛn tumaa bɛ́ Rɔmu kiwi, Lawa n ka narɛ, á ka bíi á ka baa a din wɔn lɛa, ma á fòo diɛ ka nɛ. Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.

Pooli laanka Rɔmu a Lawa-nyankɔlen boo

⁸ Bibinaanɛ, ma á barka diɛ maa Lawa nɛ, ka Yezu Krita tɔ nɛ, ka tumaa a lɛa. Maǹ pii kanaa paǹ din tumaa ganaa, mà ká golee Lawa li sonbore.

^9-10 Biikoo tumaa waáraa, bɛ̀ ma á Lawa nyankoe, ma nə n yiri koɛ ka nɛ. Ma na a nyankoe Lawa lon, máa a zii kɔ ma la, ma da bɔ ka li sisia. Lawa á doɛ̃ mà boo taãn nɛ ma á diɛ. Ma bɛ́ dí nyɛɛ asɛ Lawa mɛn nɛ, ka ma foo din tumaa nɛ, ma ná a Nɛgiĩ Yezu kɛ boo pii min tumaa nɛ, a din nə maa siére lɛa.

¹¹ Sonbore, masɛ n giɛ li taãn-taãn ma ka yɛ, màn mɛn bɛ́ toɛ, Lawa a Yiri Fu bǐɛ̃baa ǹ mànan mɛnɛn kɔ ma la, ma da bɛn kɔ ka la, ka boo la ka wo nyɛɛnɛ.

¹² Haayii, man die ka li, golee Lawa li goon mɛn bɛ́ wɔ lon, wɔ pàã yɛ kun ka bɛ barka nɛ, kaa wɔ ma foo taã, ma dɔ wɔ ka dɔn foo taã.

¹³ Dɔɔ̃nɔn lɛn, masɛ n giɛ li ka dɔ̃, má a lɛn zɔɔ̃ gunyin damata, máa man die ka li, màn mɛn bɛ́ toɛ, mà maa dí bǎã kɔ́n yɛ ka bii, ka ma bɛ́ má yɛ tɔrɔ kɔsɔn bii lɔn. Sɛnɛ, ma tɔn boo la ka pelo yii-n wa.

¹⁴ Min din tumaa a giɔ̀mɔ n ma ganaa: Sii-doɛ̃ wolen ne woo ka sii-doɛ̃baã wolen ne, sɛ́wɔ-doɛ̃ wolen ne woo ka sɛ́wɔ-doɛ̃baã wolen ne.

¹⁵ Bɛ lɛ taman yii, masɛ n giɛ li taãn-taãnɛ, ma Boo Tii Kɔɔ̃n kɛ pɛ ka dɔn manɛ, kasɛn mɛnɛn bɛ́ giã-n Rɔmu kiwi.

Boo Tii Kɔɔ̃n kɛ lɛ bɛ́ pàã mɛn lɛa

¹⁶ Maa sìi koe ka Lawa a Boo Tii Kɔɔ̃n pɛ kɛ-n wa. A giala, Lawa pàã n dí nyɛɛ a nɛ, á kirisibaa koe a goleemali wolen tumaa la: Bibinaa nɛ Zuifun manɛ, bɛ kio tɔrɔ kɔsɔn mɛnɛn bɛ́, ǹ ba Zuifun lɛa wa.

¹⁷ A giala Boo Tii Kɔɔ̃n nə nyɛɛ Lawa bɛ́ min biɛ min pepere lɛa a din yɔrɔ-a lɔn goleemali dinsɔɔ̃ barka nɛ, ka a bɛ́ kiɛ̃-n Lawa a boo sɛ́wɔ-n lɔn: «Min mɛn bɛ́ a pepere wa, bɛa dɛnaa á re mɛnɛɛ. Sɛnɛ, min mɛn bɛ́ pepere, a bɔlɔgoondɛnaabaa n die toɛ a yii goã koo.»

Minbuiin nɛn zɛ̀rɛ boo

¹⁸ Sonbore, Lawa nyaa mà asɛ a foo-busii á re gisĩ min tumaa la, a giala, minbuiinin ba Lawa guguru koe wa, ǹ ba pepere wa. Minin tá Lawa a sonbore lɛ doɛ̃, sɛnɛ, maǹ pìi koe lɛ ka ǹ zɛnaa ǹ sii baraan nɛ.

¹⁹ A giala, minbuiin nɛ á boe la a màn mɛn dɔ̃ Lawa wɔ gɔn la, a tá bɛ siére-a. Lawa dinmaa na á bɛ nyaa nɛ.

²⁰ Sonbore, min ba boe la a Lawa yɛ wa, sɛnɛ, a nə n din nyɛɛ minin manɛ ka a nya ǹ dín ni, a kũ kanaa diɛ biikoo ganaa. Bɛ lɛ taman yii, minin tá boe la ǹ na a pàã nyabaã wole kɛ dɔ̃, ka a Lawabaa kɛ nɛ, yǎa ǹ baran n yiin tã wa. Bɛ lɛ nɛ, sonbore yɛ ǹ gɔn kɔ́n ba ǹ lon wa.

²¹ Ta ǹ nə́ Lawa dɔ̃, ǹ na a guguru kɔ Lawa lɛa wa, ǹ barka dɔ da-n wa. Ǹ taasiɛn nə́ kooro baa, ǹ nə́ n piã ka sii giala miɛ nɛ, ǹ gɔ́ɔ̃ tii.

²² Maǹ nə́ goã n dinin biɛ màn-dɔ̃lin lɛa, a da yaa sonbore, maǹ gàãnaan lɛa.

²³ Lawa mɛn bɛ́ a nyɛɛ duduu wa, ǹ bɛ guguru kɔ wa. Maǹ nə́ goã màn gã wolen nyínin guguru koe, minbuiinin ni, bàanan nɛ, tɔɔ gòã siidɛnan nɛ, ka màn nɔ̀ giɛraa tán wolen ne.

²⁴ Bɛ lɛ na á toa, Lawa nə́ ǹ toa bɛa sii gɔgɔrɛ zɛnaan kɛn lɛn nɛ, á kɔnpɛ ǹ dinin foo dùũsiin ni, màn mɛn bɛ́ toɛ, ǹ sàn kɔ ka ǹ dinin gɔ̀nɔn nɛ.

²⁵ Lawa màn mɛn da, maǹ bɛ guguru koe, sɛnɛ, Lawa din mɛn bɛ́ màn lɛ a diɛ wole lɛa, ǹ ba bɛ guguru koe wa. Haalɛ ka bɛ yii ni, Lawa tɔ n goɛ̃ guguru miɛ̃ yǎa duduu. A n miɛ̃! Ǹ bɛ́ ǹ nə́ Lawa a sonbore kɛ dɔ̃, ǹ ná a lonkɔ ka soɛ nɛ.

²⁶ Bɛ lɛ taman yii, Lawa nə́ ǹ toa ǹ dinin sìi sii zɛnaan gɔn. Lawa giĩ laanka lɔ sii mɛn yɔrɔ bɔ, ǹ lɔn nə́ bɛ bɔyaa. Siin mɛnɛn bɛ́ ǹ ba kɔnboe ka zɛnaa-n wa, maǹ bɛn zɛnɛɛ.

²⁷ Bɛa yɔrɔ kɛ lɛ la, giĩn dɔn nə́ lɔn toa walan, ǹ dinin miã giĩn sii n wɛ̃ nɛ ǹ ganaa. Giĩn nə́ sìi-doɛ̃baã siin zɛnaa ǹ miã giĩn ganaa. Bɛ lɛ nɛ, Lawa á re ǹ baraabaa ǹ dí kɛ a dɔlɔ boe ǹ dinin gɔ̀nɔn ganaa a giala yii li.

²⁸ Ka bɛ dɔ-n doo, ǹ lɛ kɔ ǹ nə́ Lawa doɛ̃ sii toa ǹ gɔ́ɔ̃-n wa. Bɛ lɛ nɛ, Lawa nə́ ǹ toa ǹ dinin yiri gɔgɔrɛ kɛ gɔn, màn mɛn bɛ́ toɛ, siin mɛnɛn doamaa bɛ́ n bie ka zɛnaa-n wa, ǹ bɛn zɛnaa.

²⁹ Ǹ piɛ̃maa-n ka kɔkɔrɔbaa laanka sii baraa tɔrɔ tumaa nɛ. Ǹ foo n wuu pii, ǹ dinin dɔn man baraa. Maǹ minin bebele, maǹ zia diɛ, maǹ gɛ̀ dii. Maǹ gɔn diɛ ǹ miãn ganaa. Maǹ boo baraa diɛ kɔn kio ganaa,

³⁰ ǹ nə́ kɔn tɔ ziziɛ̃. Ǹ ba Lawa narɛ wa, ǹ ba min guguru koe wa. Din gole-kɔlen manɛ, ka din-laakalaalin ni. Maǹ nə n taasɛ biikoo tumaa li, ka sii baraa zɛnaa ǹ gɔn nɛ. Ǹ ba n too koe ǹ yɛ wolen lon wa,

³¹ maǹ koe ǹ dinin dùũ dinsɔɔ̃ lɛ. Bɛ̀ ǹ nə́ n lɛ kɔ ka boo mɛn nɛ, ǹ ba bɛa sii zɛnɛɛ wa. Ǹ ba kɔn-narɛɛ doɛ̃ wa, ǹ ba makara dɔ doɛ̃ wa.

³² A laanɛ ǹ tá doɛ̃ ke mà Lawa pɛ mà bɛa siin kɛn lɛn zɛnaalin doamaa-n ka gɛ̀ nɛ, ǹ ba goɛ̃ bɛa siin kɛn lɛn zɛnaa dinsɔɔ̃ li wa, sɛnɛ, a zɛnaali kɔsɔn dɔn man kɔɔ̃nɛ ǹ ganaa.