Piɛrɛ2 1 - LAWA A BOO SONBORE

¹ Masɛ Simɔn Piɛrɛ mɛn bɛ́ Yezu *Krita a bɛ̀rɛ laanka a dia dí-a wole lɛa, man sɛ́wɔ kɛ diɛ ka la, kasɛn mɛnɛn bɛ́ kaa goleemali n goon ka wɔsɛn wɔ nɛ, wɔa Lawa laanka wɔ Nyin-sili Yezu Krita a peperebaa barka nɛ.

² Lawa á re bǐɛ̃ gigiã zɛnɛɛ ka nɛ, a là nyantoro gigiã kɔ ka la. Bɛ á re n zɛnɛɛ, bɛ̀ ka á Lawa laanka wɔa Dɛnaa Yezu kɛ doɛ̃, ka á woe nyɛɛnɛ.

Lawa bɛ́ á ka bíi á ka bɔ a din wɔn lɛa lɔn

³ Sonbore ne, wɔ laadoo bɛ́ màn mɛn tumaa ganaa, wɔ boo la wɔ tɔ wɔ ka nyɛ́ɛbaa Lawa yii-n ni, Dɛnaa na á bɛ kɔ wɔ la ka a din pàã nɛ. Wɔ n bɛ tumaa yii, bɛ̀ wɔ á Dɛnaa doɛ̃, asɛ mɛn bɛ́ á wɔ bíi, wɔ́ daa a ganaa, ka a din a gugurubaa laanka a sonborebaa barka nɛ.

⁴ A din lɛ barka nɛ, wɔ́ naforo laanka bǐɛ̃baa sonboren yɛ, a n lɛ kɔ wɔ la ka ǹ mɛnɛn lɛn nɛ, mà asɛ á re wɔ sii kanaa gɔ́ɔ̃ nɛ ǹ dùũ sii babaraan kɛn laanka bɔnɛɛbaa kɛ la, á wɔ bɔyaa wɔ sɔ̀n nə́ n baa ka a din wɔ bɛ́ lɔn.

⁵ Bɛ lɛ taman yii-n dinin ma á pii ka nɛ, máa ka n wen waa parsiini, ka tɔ wɔ ǹ gɔn sonbore naa kaa golee Lawa li lɛ ganaa, ka doɛ̃ naa tɔ wɔ ǹ gɔn sonbore kɛ dɔ ganaa.

⁶ Ka n doa dɔn ka boo ma din la naa doɛ̃ ganaa, ka sii simaa naa boo ma din la ganaa, ka tɔn nyɛ́ɛ baa Lawa-n naa sii simaa kɛ ganaa.

⁷ Ka dɔɔ̃nbaa a kɔn kũ doɛ̃ naa nyɛ́ɛ baa Lawa-n lɛ ganaa. Bɛ din tumaa kio kəni, ka kɔn-narɛɛ naa dɔɔ̃nbaa a kɔn kũ doɛ̃ kɛ ganaa.

⁸ A giala, bɛa para pɛ ǹ siin kɛn lɛn, bɛ̀ bɛn tá ka lon gigiã, ǹ ba toɛ ka goã dí-nyali baãnaan lɛa wa, ǹ ba toɛ dɔn ka fɔ̃ wɔa Dɛnaa Yezu Krita doɛ̃ li wa.

⁹ Sonbore, bɛ̀ bɛa para pɛ ǹ siin kɛn lɛn ba min mɛn lon wa, ǹ dɛnaa n goon ka yii tere-a nɛ, á n tatalɛɛ. A yiri n boe mà Lawa ná a lɛlɛ a sii baraan pii, á ǹ bɔ a ganaa.

¹⁰ Bɛ lɛ nɛ, dɔɔ̃nɔn lɛn, Yezu Krita bɛ́ á ka bíi á ka yii gɔgɔɔ̃ ke, ka n doa ka n gù wen yii, ka kaa bíi-wɔ kɛ lɛ laanka kaa yii-gɔgɔɔ̃ kɛ lɛ tamaa. Bɛ̀ ka á bɛ zɛnɛɛ, ka a re mɛnɛɛ duduu wa.

¹¹ Sonbore, wɔa Dɛnaa laanka wɔ Nyin-sili Yezu Krita a kiibaa ǹ bǎã kɛ a kiɛnlɛ á re n buĩ ka nɛ. Kiibaa ǹ bǎã mɛn bɛ́ a nyɛɛ duduu wa, ka á re we bɛ nɛ, a ka kũ doɛ̃ sɔnbɔraanɛ.

Daraan mɛnɛn doamaa bɛ́ ka tamaa nɛ

¹² Bɛ lɛ a lɛa-n ma á giɛ li biikoo tumaa li, ma ka yiri gisĩ kɛ nɛ, a laanɛ ka á doɛ̃ gɔrɔ, ka n tɔ dɔ din we sɔnbɔraanɛ ke sonbore la, ka sonbore mɛn si ke lɛn.

¹³ Sɛnɛ, má yɛ máa á pepere, a ma toa maa tá kanaa kɛ gɔ́ɔ̃ nɛ, ma boo da ka nɛ, ma ka yiri gisĩ bɛa siin kɛn lɛn nɛ, màn mɛn bɛ́ toɛ, ka n yii dɔraa.

¹⁴ Masɛ á doɛ̃ máa maa kanaa toa biikoo diri, ka wɔa Dɛnaa Yezu Krita din bɛ́ á nyaa ma-n lɔn.

¹⁵ Sɛnɛ, ma á re n doɛ sɔnbɔraanɛ, màn mɛn bɛ́ toɛ, maa woo kio, ka boo la sii din tumaa gɔ́ɔ̃ nɛ, ka daraan kɛn tamaa ka yiri ni.

¹⁶ Sonbore, wɔ bie wɔ́ n gòãn koa minbuiinin yiridɛnaabaa ǹ lɛlɛ boon la, wɔ́ wɔa Dɛnaa Yezu Krita a wusoo a da ka pàã-n kɛ boo da ka-n wa. Wɔ n wɔ́ n gòãn koa wɔ dinin wɔa yɛ ka wɔ yii-n kɛ la. Wɔ́ yɛ ka wɔ yii ni a golebaa kɛ nɛ,

¹⁷ bɛ̀ Díi Lawa din bɛ́ zín laanka gugurubaa koe la. Bɛ na á n zɛnaa wɔ yii ni, bɛ̀ Lawa din bɛ́ á n toa a din a gugurubaa gole kɛ nɛ, á pɛ: «Kɛ n maa Nɛgiĩ narɛɛ wole lɛa, a na á kɔɔ̃n kɔ ma din ni má bɔ.»

¹⁸ Bɛa boo-diɛ lɛn kɛ lɛ, wɔsɛn dininmaan nə́ ma boe lon, bɛ̀ wɔ bɛ́ kun Yezu Krita lɛ nɛ kele sonbore kɛ la.

¹⁹ Ka bɛ din tumaa nɛ, Lawa a boo gii-dalin nə màn mɛn da, wɔ foo á doa-n bɛ ganaa dinin. Á soɛ ka ga bɛ ganaa, a giala, a n goon ka bólon ne, kuĩ wɔlɔ tì bǎã nɛ yǎa lɛ̀ wɛɛ, Yezu Krita n baayɛlɛ a leere kɛ lɛa, die wɔlɔ fúlu kiɛ ka foon ne.

²⁰ Bibinaa nɛ, ka dɔ̃, mà min kɔn ba boe la a Lawa a boo gii yɔrɔ pɛ a din li wa.

²¹ A giala, Lawa a boo gii kɛ lɛ kɔ́n bie boe minbuiin nɛ dùũ-n wa. Sɛnɛ, Yiri Fu na á minin nyɛɛnaan bɔ, ǹ nə́ Lawa wɔ gii lɛ da.